34 ¹ هر زمانی خداوندَه ستایش کونم، همیشه اونِ شُکر می زبانِ رویه. ² می جان خداوندِه وجودِه رِه شادمانی کونه، افسرده دیلان بیشتَأود خوشحالَ بود. ³ بأئید می مرَه خداوندِه عظمتَ اعلام بوکونیم، بأئید اونِ نامَ ستایش بوکونیم. ⁴ خداوندِه حضور دوعا بوکودم و اون می دوعایَ مستجاب بوکود و مرَه جی همۀ می ترسَأن نجات بدَه. ⁵ مظلومان اونَ فَأندرستد و خوشحالَ بوستد، اوشَأن هیچموقع شرمنده نوبود. ⁶ اَن حقیرِه تَه فریاد بوکود و خداوند اونِ دوعایَ بیشتَأوست و مُستجاب بوکود و اونَ جی همۀ اونِ مشکلات نجات بدَه. ⁷ خداوندِه فرشته کسانی کی اونِ جَه ترسدِه دؤر و وَر ایسَه و اوشَأنِ جَه محافظت کونه. ⁸ امتحان بوکونید و بیدینید کی خداوند چقدر مهربانه. خوش به حال کسی کی اونَ توکل کونه. ⁹ ای خداوندِه مؤمنین، اونِ جَه بترسید، چون کسانی کی اونِ جَه بترسد هیچ چیَه مُحتاج نوبود. ¹⁰ شیرایِ جوان هم بعضی موقع محتاج بهد و ویشتایی کشد، ولی کسانی کی خداوندِه طالب بوبود هیچ خُرمه چیَه محتاج نوبود. ¹¹ ای زَأکأن بأئید و می جَه بیشتَأوید من خداترسی یَ شمرَه یاد دهم. ¹² آیا خَأئید شیمی زندگی جَه لذت بوبورید؟ آیا خَأئید عُمر دراز بدَأرید و سعادتَ بیدینید؟ ¹³ پس تی زبانَ حرفِ بد و دوروغِ جَه دور بدَأر. ¹⁴ شرارتِ جَه دس بکش و دوروستکار بوبون، صُلح و صفا طالب بوبون و اونِ انجامِ رِه تلاش بوکون. ¹⁵ خداوندِه چومَأن دوروستکاران و صالحانِ رو نَهه و اونِ گوشَأن اوشَأنِ فریادَ ایشتَأوه. ¹⁶ خداوند مردمِ شریر و بدکارِ مخالفه و آخرسر اوشَأنِ خاطره یَ زمین رو جی میَأن بوره. ¹⁷ وختی مؤمنین خداوندِه حضور دوعا کوند، خداوند اوشَأنِ دوعایَ مستجاب کونه و جی مشکلات و سختیان اوشَأنَ نجات دهه. ¹⁸ خداوند بیشکیفته دیلانِ نزدیک ایسَه و اوشَأنی کی خوشَأنِ اُمیدَه جی دس بدَه دَأردَ نجات دهه. ¹⁹ آدمِ دوروستکارِ مشکلات و گرفتاری زیاده، ولی خدا اونَ جی همۀ اوشَأن نجات دهه. ²⁰ خداوند اونِ جَه مواظبت کونه، جوری کی حتی ایتَه جی اونِ استخوانانم نیشکیفه. ²¹ آدمِ شرورَ شرارت گرفتارَ کونه و اونَ کوشه، و دوروستکارانِ دوشمنانِ جَه بازخواست بِهه و سِزا دیند. ²² خداوند خو خدمتکارانِ جانِ رِه کفاره فَأده و کسانی کی اونَ پناه بورودَه سزا نده.