21 ¹ خداوندا، پادشاه شادمانه جی قوتی کی اونَ ببخشه دَأری، و اَنِ وَسی کی اونَ پیروزَ کودی شادی کونه. ² تو اونِ دیلِ نأجِه یَ برآوردَه کودی و هیچکودام جی اونِ خواهشانَ ردَه نوکودی. ³ تو خُرمه برکاتِ مرَه بوشویی اونِ پیشواز و ایتَه تاج جی خالصِ طلا بنَأیی اونِ سرِ رو. ⁴ اون تی جَه عُمر طولانی بخَأست و تو اونَ فَأدأیی، ایتَه عُمر طولانی تا اَبدالاباد. ⁵ تی کمک اَمرَه جلالَ برسه، تو اونَ عزت و احترام عطا بوکودی. ⁶ تی برکتان تا اَبد اونِ اَمرَه یه و تی حضور اونَ جی خوشی بینهایت خوشحالَ کونه. ⁷ پادشاه خداوندِ متعالَ توکل دَأره و خدا رحمتِ وَسی همیشه پایدار ایسه. ⁸ تی دس تی همۀ دوشمنانَ مسلط بِهه و تی راستِ دس همۀ کسانی یَ کی تی جَه نفرت دَأردَ به چنگ اَوره. ⁹ وختی ظاهرَه بی اوشَأنَ آتشِ تنورِ مَأنستَأن چَأکونی. خداوند خو غضبِ اَمرَه اوشَأنَ نابودَه کونه و آتش همۀ اوشَأنَ جی میَأن بوره. ¹⁰ و اوشَأنِ نسلَ تَأوَأده و اوشَأنِ زَأکأنَ آدمیانِ میَأنِ جَه محوَ کونه. ¹¹ اگرم بر ضدِ پادشاه نقشه ای بکشد و حیله ای بوکوند، موفق نوبود، ¹² چره کی تی وَسی اوشَأن عقب نشینی کوند و فرار کوند، اونموقع یه کی تی تیروکمانِ اَمرَه اوشَأنِ طرف نیشانه بیگیری. ¹³ خداوندا، تی قدرت و جلالِ وَسی ترَه ستایش کونیم و تی عظمتِ ره سرود خَأنیم.