19 ¹ آسمان خدا جلالَ اعلام کونه و اونِ دسِ صنعتَ اَمرَه نیشان دِهه. ² روز و شب خدا حکمتَ اعلام کوند. ³ نه حرفی زند و نه اوشَأنِ آواز ایشتَأوسته بِه. ⁴ ولی با اَنحال اوشَأنِ پیام سرتاسرِ زمینَ فَأرسه و اوشَأنِ کلام همۀ جهانِ میَأن منتشرَه بِه. خیمه ای آسمانِ میَأن خورشیدِ رِه بپا بوکوده، ⁵ و اون ایتَه دامادِ مَأنستَأن خو حجله جَه بیرون اَیِه و شادی کونان ایتَه پهلوانِ مَأنستَأن میدانِ میان دووِه. ⁶ جی ایطرفِ آسمان شروع کونه و شتابِ اَمرَه شِه ایطرفه دیگر و هیچ چیزی اونِ حرارتِ جَه در اَمَأن نییِه. ⁷ خداوندِ شریعت کامله و آدمِ جانَه تازَه کونه، خداوندِه اَوامر قابلِ اطمینانه و ساده لوحانَه حکمت بخشه و حکیم کونه. ⁸ خداوندِ دستورات راسته و آدمِ دیلَ شادَه کونه. خداوندِه اَوامر پاکه و آدمِ چومَ وأ کونه. ⁹ خداوندِه احترام نَئن خوبه و اَبدیه. خداوندِه اَحکام حق، و کاملاً عادلانه یه. ¹⁰ جی خالصه طلا مرغوبتره و جی خالصه عَسل شیرینتر. ¹¹ تی اَحکام تی بنده یَ هوشیارَه کونه و اوشَأنِ جَه پیروی کودَأن پاداشِ عظیم دَأره. ¹² کیه کی خو گوناهانَ تشخیص بده؟ خداوندا، می پنهانی گوناهانَ بیامرز. ¹³ و وَأنَأل من گوناهانِ عَمدی انجام بدم، وَأنَأل اَ گوناهان مرَه مسلط بوبود، اونموقع بی عیب و بی گوناه بوم. ¹⁴ ای خداوندی کی می پناهگاه و می نجات دهنده ایی، می گبان و می دوعایان تی نظرِ جَه قبول بیبه.