6 ⁴ پس چره وختی شیمی میَأن اَجور اختلافات پیش اَیه، قضاوت و داوری رِه شید کسانی ورجَه کی کلیسا دورون هیچ اِعتباری نَئرد؟ ⁵ اَنَ گویم تا شمرَه شرمنده بوکونم، آیا شیمی میَأن ایتَه آدمِ حکیم نِئسَه کی بتَأنه ایماندارانِ اختلافانَ رفع و روجوع بوکونه؟ ⁶ آیا ایماندارِ مسیحی، ایتَه ایماندارِ دیگرَ بوره دادگاه اونم ایتَه بی ایمانِ ورجَه؟ ⁷ اَصلاً اَجور شکایت شیمی ضعفِ روحانی نشانه یه، چره حاضر نیئید شیمی حقِ جَه بوگذرید و مظلوم واقع بیبید؟ چره حاضر نیئید ضرر بوکونید؟ ⁸ ولی در عوض ظلم کونید و دیگرانَ ضرر زنید، اونم شیمی برأرأیِ ایماندارَ. ⁹ آیا نَأنید کی ظالمان خدا پادشاهی وارث نوبود؟ گول نوخورید، بی عفتان و بُت پرستان و زِناکاران و لواط کاران ¹⁰ و دوزدان و طمَعکاران و مشروب خوران و کسانی کی فُحش دهد و کسانی کی مردمِ مالَ خورد، خدا پادشاهی میَأن جایی نَئرد. ¹¹ و بعضی جی شومَأن قبلاً اَطو بوئید، ولی خداوند عیسی نامِ اَمرَه و بواسطۀ خدا روح، شیمی گوناهان بوشُسته بوبُست، و تقدیس بوبُسته و عادل به حیساب بأموئید.