5 ¹ واقعیت اَنه کی خبر برسه دَأره کی شیمی میَأن زناکاری نَهه، اونم جوری کی حتی بُت پرستانِ میَأنم وجود نَئره، چون بیشتَأوستم ایتَه جی شیمی اعضاء خو پئرِ زنِ اَمرَه رابطه دأره. ² و شومَأن افتخارم کونید! آیا نوَأستی ماتم بیگیرید و مُقصرَ شیمی کلیسا جَه بیرون تَأوَأدید؟ ³ هر چند من جسماً شیمی ورجَه نِئسَم، ولی روحاً شیمی ورجَه حاضرم، و هسَه کسی مَأنستَأن کی شیمی میَأن حاضره خودمِه حُکمَه، دربارۀ کسی کی اَ کارَه بوکوده صادر بوکودِم. ⁴ پس به نامِ اَمی خداوند عیسایِ مسیح دورِ هم جمعَ بید و منم روحاً شیمی اَمرَه ایسَم، و اَمی خداوند عیسی مسیح قدرتِ اَمرَه، ⁵ اَ مَردَ بیسپارید شیطانَ تا اونِ جسمِ گوناهکار هلاکَ بِه، تا خداوند عیسی روزِ دورون، اونِ روح نجات پیدا کونه. ⁶ شیمی افتخار بیجایه، مگر نَأنید کی ایبچه خمیرمایه تَأنه همۀ خمیرَ وَر بأوره؟ ⁷ پس خودتانَ خمیرمایه کهنه جَه پاکَ کونید تا تازه خمیر بیبید، هوطو کی واقعاًنم بی خمیرمایه اید، چره کی مسیح اَمی عیدِ فِصَحِه قربانیه کی ذِبح بوبُسته. ⁸ پس بأئید اَ عیدَ بدَأریم، ولی نه کهنه خمیرمایه مرَه یعنی شرارت و بدی خمیرمایه اَمرَه، بلکی نانِ فطیرِه ساده دیلی و صداقتِ اَمرَه.