7 ¹ ولی دربارۀ اونچی کی مِرِه بینیویشته بوئید: مردِ رِه بهتره کی مُجرد بِئسِه. ² ولی چون اَمی دور و وَر پور جی زِنا وسوسه یه، بهتره کی مرد زن بوبوره و زنم مردَ بِه. ³ و مرد وَأستی خو وظیفه یَ نسبتِ به خو زن، و زنم وَأستی خو وظیفه یَ نسبتِ به خو مرد انجام بده. ⁴ زن خو بدنِ اختیارَ نَئره، بلکی زنِ بدن اونِ مردِ شینه، و مَردَم خو بدنِ اختیارَ نَئره، بلکی اونِ بدن اونِ زنه شینه. ⁵ همدیگرَ حق و حقوقِ زناشویی جَه محروم نوکونید، مگر ایتَه مدتِ کوتاه رِه، اونم همدیگرِ رضایتِ اَمرَه، تا بتَأنید خودتانَ روزه و عبادتِ رِه وقف بوکونید، ولی بعدِ اَ مدت وَأستی روابطِ زناشویی دوباره حالتِ عادی یَ وَأگرده، نوکونه شیطان شمرَه شیمی ضعفِ وَسی وسوسه میأن تَأوَأده. ⁶ من ایتَه مدت دوری جی روابطِ زناشویی یَ حُکم نوکونم، بلکی فقط جایز دَأنم. ⁷ ولی کاش همۀ مردم تَأنستد می مَأنستَأن بوبود، ولی خدا هر کسی یَ ایتَه عطایِ خاصی ببخشه دَأره، ایتَه یَه ایجور، ایتَه یَ ایجور دیگر. ⁸ ولی مُجرده مردکان و بیوه زنَأکانَ گویم کی بهتره می مَأنستَأن مُجرد بِئسد. ⁹ ولی اگر نتَأند خوشَأنِ میلِ جولویَ بیگیرد، بهتره ازدواج بوکوند، چون کی ازدواج کودَأن بهتر جی اَنکی شهوتِ آتشِ دورونِ بوسوجد. ¹⁰ ولی متأهلانِ رِه ایتَه دستوری دَأرم کی میَ جَه نیه، بلکی خداوندِ حُکمه. و اون اَنه کی زن نوَأستی خو مردِ جَه سیوایَ بِه، ¹¹ و اگر اَ کارَه بوکود و سیوایَ بوست نوَأستی دوباره مردَ بِه، یا اگر خَأیه مردَ بدَأره وَأستی خو قبلی مردِ اَمرَه آشتی بوکونه، و مرد هم نوَأستی خو زنَ طلاقَ دِه. ¹² و دیگرانَ گوفتَأن درم، اَنَ من خودمِ جَه گویم نه خداوند، اگر ایتَه مسیحی مردَأی، زنی بدأره کی بی ایمان بیبه، و اون زن راضی بیبه کی اونِ اَمرَه زندگی بوکونه، نوَأستی خو زنَ طلاقَ دِه. ¹³ و هَطو اگر زنی مسیحی ایتَه مردِ بی ایمان بدَأره، و اونِ مرد بخَأیه کی اونِ اَمرَه زندگی بوکونه، نوأستی خو مردِ جَه سیوایَ بِه. ¹⁴ چره کی مردِ بی ایمان بواسطۀ خو زن مقدس بِهه، و زنِ بی ایمان بواسطۀ خو مرد، کی اگر اَطو نوبوسته بِه، زَأکأن ناپاک بوستد، ولی هَسَه دینیم کی اَطو نییه و اوشَأن مُقدسد. ¹⁵ ولی اگر ایتَه بی ایمان خَأیه کی سیوایَ بِه، وَأئَأل کی اَ کارَ بوکونه، در اَ وضعیت، مسیحی مردأی یا زنَأی اجباری نَئره کی اونِ اَمرَه زندگی بوکونه، چون خدا اَمرَه صُلح و آرامشِ رِه دخَأده. ¹⁶ چره کی ای زنأی، تو چی دَأنی کی تَأنی حتماً تی مردِ نجاتَ باعث بیبی؟ و ای مردأی تو چی دَأنی کی تَأنی حتماً تی زنِ نجاتَ باعث بیبی؟ ¹⁷ به هر حال هر کسی هوطویی زندگی بوکونه کی خدا اونِ رِه تعیین بوکوده و اونَ دخَأده دَأره، اَ حُکمی ایسه کی من همۀ کلیسائانِ میَأن اَمر کونم. ¹⁸ اگر کسی پیشتر جی اونی کی مسیحی بیبه ختنه بوبُسته بو، نوَأستی ناراحت بیبه، و اگر کسی هم وختی مسیحی بوبُست ختنه نوبوسته بو، نوَأستی بازن ختنه بیبه. ¹⁹ ختنه بوستَأن یا نوبوستَأن اصلاً مُهم نییه، بلکی خدا اَحکامَ دَأشتن ارزش دَأره. ³² می خواهش اَنه کی شومَأن هر جور دیلواپسی جَه دور بیبید، مُجرد مردأی خداوندِ اُمورِ رِه فکر کونه، و اَنکی چوطو تَأنه خداوندَ خوشحالَ کونه. ³³ در حالی کی مُتأهلِ مردأی اَ دونیا اُمورِ رِه فکر کونه، و اَنکی چوطو تَأنه خو زنَ خوشحالَ کونه. ³⁴ و هَطو دختر یا زنِ مُجردم خداوندِ اُمورِ دیلواپسی یَ دَأره و دیلواپسه اَن کی چوطو تَأنه جسم و روح میَأن مقدس بیبه، در حالی کی زنِ متأهلِ اَ دونیا اُمورِ رِه فکر کونه و اَنکی چوطو تَأنه خو مردَ خوشحالَ کونه. ³⁵ اَشَأنَ شیمی خیرِ وَسی گویم، نه اینکه بخَأیم شمرِه قید و بندی بوجود بأورم، می منظور اَنه کی اونچی کی دوروسته یَ انجام بدید تا هیچ دیلواپسی ایی نِتَأنه شمرَه خداوندِ خدمتِ جَه مُنحرفَ کونه.