3 ¹ ولی ای برَأرأن، من نتَأنستم شیمی مرَه آدمایِ روحانی مَأنستَأن گب بزنم، بلکی آدمایِ جسمانی مَأنستَأن گب بزم، یعنی کسانی مَأنستَأن کی هنوز ایمانِ به مسیح میَأن طفلد. ² من شمرَه شیر فَأدم کی بوخورید نه گوشت، چره کی اونِ آمادگی یَ نَشتید، هنوزم نَئرید. ³ چون هنوزم نفسانی ئید. وختی شیمی میَأن حسادت و دعوا نَهَه، آیا نیشان نده کی جسمانی اید و آدمایِ معمولی مَأنستَأن رفتار کونید؟ ⁴ چون وختی ایتَه گویه من پولسِ شینم، اوی تَه گویه من اَپُلسِ شینم، آیا آدمایِ معمولی نیئید؟ ⁵ مگر پولس کیسه؟ یا اَپُلس کیسه؟ اوشَأن فقط خادمانی ایسد که خدا هر کودامِ اوشَأنَ وظیفه ایی فَأدَه دَأره تا شومَأن بواسطۀ اوشَأن ایمان بأورید. ⁶ من بکأشتم، اَپُلس آب بدَه، ولی اَن خدا بو کی رُشد بدَه. ⁷ پس نه کسی کی کاره مُهمه نه کسی کی آب دِهِه، بلکی فقط خدا کی رُشد دِهه. ⁸ اون کی کاره و اونی کی آب دِهه، هر دو تَه ایتَه ید، و هر کودام مطابقِ زحمتی کی کشد پاداش فَأگیرد. ⁹ چره کی اَمَأن فقط همکارانی ایسیم کی خدایَ خدمت کونیم، و شومَأن خدا مزرعه و خدا ساختمانید. ¹⁰ فیضی اَمرَه کی خدا مرَه ببخشه دَأره ایتَه ماهرِ بنّا مَأنستَأن ایتَه ساختمانِ پِیَ فوکودم، هَسَه کسِ دیگری اونِ رو چَأکودَأن دره، ولی هر کس وَأستی مراقب بیبه کی چوطو اونِ رو ساختمان چَأکونه. ¹¹ چره کی هیچکی نِتَأنه پِی دیگری فوکونه به غیرِ اونی کی فوکوده بوبُسته، و اون پِی خودِ عیسی مسیحه. ¹² اگر کسی اَ پِی رو، ساختمانی جی طلا یا نقره یا جواهر یا چوب یا علف یا کولوش چَأکونه، ¹³ هر کسِ کار آشکارَ بِه، چره کی روزِ داوری اونَ ظاهرَ کونه، چون اون روز آتشِ اَمرَه همراه بِه و آتش، هر کسِ عمل و اونِ کارِ کیفیتَ آزمایش کونه. ¹⁴ اگر کسی چیزی کی اون پِی رو چَأکوده باقی بمانه، پاداش فَأگیره. ¹⁵ ولی هر کسِ کار بوسوجه ضرر کونه، هر چند خودش نجات پیدا کونه، ولی کسی مَأنستَأن بِه کی آتشِ میَأنِ جَه دوارسته دَأره و فرار بوکوده. ¹⁶ آیا نَأنید کی خدا مَعبدید و خدا روح شیمی میَأن ساکنه؟ ¹⁷ اگر کسی خدا معبدَ خرابَ کونه، خدا اونَ هلاکَ کونه، چره کی خدا مَعبد مُقدسه و شومَأن اونِ مَعبدید. ¹⁸ خودتانَ گول نزنید، اگر کسی خودشَ اَ دونیا معیارِ مرَه حکیم دَأنه، اگر خَأیه واقعاً حکیم بیبه وَأستی جاهل بیبه. ¹⁹ چره کی اَ دونیا حکمت خدا ورجَه نادانیه، هوطو کی بینیویشته بوبُسته:«حکیمانَ خودشانِ فریبِ مرَه گرفتارَ کونه» ²⁰ و باز بینیویشته بوبُسته:«خداوند حکیمانِ اَفکارَ دَأنه کی همه تَه باطله.» ²¹ پس هیچکس نوَأستی انسانی یَ افتخار بوکونه کی مثلاً من اَی تَه طرفدارم یا اوی تَه طرفدارم. چره کی همه چی شیمی شینه، ²² پولس، اَپُلس، پطرس، اَ دونیا، زندگی، مرگ، هَسَه الان و آینده، همه و همه شیمی شینه. ²³ و شومَأن مسیح شینید و مسیح، خدا شینه.