2 ¹ ای عزیزه برأرأن، منم وختی شیمی ورجَه بأموم، اونموقعی کی خدا پیامَ شمرِه اعلام کودم، کلماتِ اَدبی و اَفکارِ فلسفی جَه استفاده نوکودم. ² چره کی تصمیم بیگیفته بوم وختی شیمی میَأن ایسَم جُز عیسی مسیح، اونم عیسایِ مصلوب بوبُسته، همه چیَه جی خاطر بوبورم. ³ من ضعف و ترس و لرز زیادِ اَمرَه شیمی ورجَه بأموم. ⁴ و می پیام و می گبانَ دلایلِ فلسفی و انسانی اَمرَه شمرَه توضیح ندَم، بلکی روح قوّتِ اَمرَه شمرَه ثابت بوکودم. ⁵ تا شیمی ایمان حکمتِ انسانی یَ مُتکی نیبه، بلکی خدا قدرتِ مرَه اُستوار بیبه. ⁶ ولی کسانی ورجَه کی روح میَأن بالغ بوبُسته دَأرد، می گبانِ میَأن حکمت و فلسفه جَه استفاده کونم، ولی نه حکمتی کی اَ دونیا شینه و اَ دونیا حاکمانِ شینه، کی همه تَه محکوم به نابودَ بوستَأند، ⁷ بلکی خدا حکمتَه گوئیم، یعنی اون جیگا بدَه بوبُسته حکمتَ، کی خدا جی اَزل اَمی جلالِ رِه مُقدر بفرماسته بو. ⁸ اما هیچکودام جی اَ جهانِ حاکمان اَ حکمتَ درک نوکودد، چره کی اگر بفهمسته بود، خداوندِه جلالَ به صلیب فَأنکِشِه ئِد. ⁹ هوطو کی کیتاب مقدسِ دورون بینیویشته بوبُسته:«اونچی یَ کی هیچ چومی نیده، و هیچ گوشی نیشتَأوست، و به هیچ انسانی فکر نرسه، خدا خو دوستدارانِ رِه تدارک بیده دَأره.» ¹⁰ ولی خدا اونَ بواسطۀ خو روح اَمرِه آشکارَ کوده، چره کی روح همه چیَه، حتی خدا اَعماقم گرده. ¹¹ چون کیسه کی آدمی اَفکارِ جَه خبر بدَأره، جُز اونِ روح کی اونِ دورون زندگی کونه؟ هَنه وَسی هم فقط خدا روحه کی خدا اَفکارِ جَه خبر دَأره. ¹² روحی کی اَمَأن بدس بأورده أیم اَ جهانِ شین نیه، بلکی روحی یَ پیدا کوده ایم کی خدا جَه یه، تا اونچی کی خدا اَمرَه عطا بوکوده یَ بدَأنیم. ¹³ و دربارۀ اَ موضوع گب زنیم، ولی نه کلماتی اَمرَه کی جی حکمتِ انسانی یاد بیگیفته دَأریم، بلکی اونچی جَه کی روح القدس اَمَرَه یاد دِهِه، و اَطو روح القدسِ حقیقتَ، کلماتی روحانی اَمرَه گوئیم. ¹⁴ ولی آدمِ بی ایمان نِتَأنه خدا روحِ تعالیمَ قبول بوکونه، چون اونِ نظرِ جَه بی معنیه و نِتَأنه اوشَأنَ بفهمه، چون اَ موضوعه درک و تشخیصِ دوروست، ایتَه دیدِ روحانی خَأیه. ¹⁵ و شخصِ روحانی دربارۀ همه چی حُکم کونه ولی کسی نتَأنه دربارۀ اون قضاوت بوکونه. ¹⁶ «چون کیسه کی خداوندِ فکرَ بدأنه تا بتَأنه اونَ نصیحت بوکونه؟» ولی اَمَأن مسیح فکرَ دَأریم.