13 ¹ اگر عطایِ گب زَئَن به فرشته یان و مردمِ زبانانَ بدَأرم، ولی مُحبت ندَأرم، ایتَه توخالی طبل و پور سَروصدا سِنجِه مَأنستأنم. ² اگر بتَأنم نبوّت بوکونم و همه عِلم و اَسرارِ الهی یَ بدَأنم، و چنان ایمانی بدَأرم کی بتَأنم کوه هانَ جابجا بوکونم، ولی مُحبت ندَأرم، هیچی نییم. ³ و یا همۀ می دار و ندارَ صدقه فأدم و خودمِه بدنَ بیسپارم تا آتشِ میَأن بوسوجه، ولی مُحبت ندارم، هیچ سودی نَئره. ⁴ کسی کی محبت دَأره، صبور و مهربانه، حسودی نوکونه، مغرور نییه و خورَه دیگرانِ جَه بهتر نَنه. ⁵ رفتارِ نادوروست نَئره و فقط خو منفعتِ فکر نییه، عصبانی نیبه و کینه به دیل نیگیره. ⁶ بی انصافی و بی عدالتی جَه خوشحالَ نیبه، بلکی راستی و دوروستی اَمرَه شادی کونه. ⁷ هر وضعی میَأن مُدارا کونه و همیشه اُمیدواره، و هر شرایطی یَ تحمل کونه. ⁸ نبوّت جی میَأن شِه، به زبانان گب زَئَن روزی تومامَ بِه، عِلم و اَسرارِ دَأنستَأن روزی به آخر فَأرسه، ولی مُحبت تا اَبد باقی مَأنه و هیچموقع جی میَأن نیشه. ⁹ چره کی اَمی علم جُزئیه و اَمی نبوّت ناتمام، ¹⁰ ولی موقعی کی کامل بأیه، جُزئی جی میَأن شِه. ¹¹ وختی کی زَأی بوم، زَأکأنِ مَأنستَأن گب زَئِم و زَأکأنِ مَأنستَأن فکر کودم و زأکأنِ مَأنستَأن دلیل اَوردم. ولی وختی ایته پیله مردأی بوبُستم، کوچی زَأکأنِ رفتارَ کنار بنَم. ¹² اونچی کی هَسَه دینیم، ایتَه تصویرِ تیره و ماتَ مَأنه آینه دورون، ولی زمانی فأرسه کی همه چیه جی روبرو دینیم، هَسَه اَمی شناخت جُزئی یه، ولی زمانی فأرسه کی اَمی شناخت و معرفت کامل بِه، به هون اندازه ایی کی خدا اَمی جَه شناخت دَأره. ¹³ پس هَسَه اَ سه چیز باقی مَأنه: ایمان، اُمید و مُحبت، ولی پیله ترین مُحبته.