12 ¹ اما دربارۀ روح القدسِ عطایا، ای برأرأن نخَأیم شومَأن بیخبر بیبید. ² حتماً به یاد دَأرید زمانی کی خدایَ ایمان نَأشتید و بُت پرست بوئید، بُتای بی زبانِ طرف شوئید و گومراهَ بوستید. ³ پس شمرَه گویم بدَأنید کی هر کی بواسطۀ روح القدس گب بزنه، نتَأنه عیسی یَ لعنت بوکونه، و هیچکسم جُز بواسطۀ روح القدس نتَأنه بوگویه:«عیسی خداونده» ⁴ بله، انواعِ عطایا وجود دَأره، ولی روح فقط هونه. ⁵ و انواع خدمتان وجود دَأره، ولی خداوند هونه. ⁶ و اَمی فعالیتانم انواعِ مختلف دَأره، ولی ایتَه خدایه کی اَمَأن همه اونِ جَه ئیم، و اون بواسطۀ اَمَأن عمل کونه. ⁷ خدا روح، هر کسِ رِه ایتَه جورِ خاص مردمِ منفعت رسَأننِ رِه عطا بِه. ⁸ مثلاً روح القدس، ایتَه یَ حکمت گوفتَنِه عَطایَه بخشه، و هون روح ایتَه دیگرَ علم و دانشِ گوفتَنَ عطا کونه. ⁹ و اینفرَ ایمان عطا کونه، و دیگری یَ شفا دَئَنِ قدرتَه. ¹⁰ و اینفر دیگرَ معجزه کودَأنِ قوّتَ، و دیگری یَ نبوّت کودَأنِ قدرتَ، و اوی تَه یَ عطا کونه کی بتَأنه تشخیص بده کَ روح خدا جَه یه و کَ روح نییه، اینفرَ قدرت دِهه به زبانایی کی یاد نیگیفته گب بزنه، و اینفر دیگرَ قدرت دِهه تا اون زبانانَ ترجمه بوکونه. ¹¹ ولی همۀ اَشَأنَ هون ایتَه روح انجام دِهِه و اونه کی خو اراده اَمرَه هر کسَ ایتَه عطایی بخشه. ¹² چون هر چند بدن ایتَه یه، ولی اعضایِ زیادی جَه چَأکوده بوبُسته، و بدنِ اعضا هر چند زیادد ولی ایتَه بدنَ چَأکوند، دربارۀ مسیح هم هَطویه. ¹³ چون همۀ اَمَأن ایتَه روح مرَه تعمید بیگیفتیم تا ایتَه بدنَ چَأکونیم، و چی یهودی و چی یونانی و چی غلام و چی آزاد، همه ایتَه روح جَه پورَه بوستیم. ¹⁴ چره کی بدنم نه ایتَه عضوِ جَه، بلکی اعضایِ زیادی مرَه چَأکوده بوبُسته. ^{15 16} اگر پا بوگویه:«چون من دست نییم، جُزِ بدن به حیساب نأیم» آیا اَ حرفِ وَسی جُزِ بدن به حیساب نَأیه؟ و یا اگر گوش بوگویه:«چون چوم نییم، بدنِ شینم نییم» آیا اَ دلیلِ وَسی دِ جُزِ بدن به حیساب نَأیه؟ ¹⁷ اگر همۀ بدن چوم بوبُسته بِه، چوطو وَأستی بیشتَأوسته بیم؟ و یا اگر همۀ بدن گوش بوبُسته بِه، چوطو وَأستی چیزی یَ بو بوکوده بیم؟ ¹⁸ ولی حقیقت اَنه کی خدا طبقِ خودشِ اِراده، هر عضوی یَ دوروست هو جایی کی لازم بو ایتَه بدنِ میَأن قرار بدَه. ¹⁹ ولی اگر بدن فقط ایتَه عضو بدَأشته بِه، دِ بدنی وجود نَأشته. ²⁰ در حالی کی اَطو نییه، و اعضا زیادد ولی بدن ایتَه یه.