10 ¹ ای دوستان، نخَأیم شومَأن اونچی کی اَمی اَجدادِ رِه اتفاق دکفته جَه بیخبر بیبید، کی اَمی پئران همه اَبرِ جیر ایسَه بود و همه تَه دریا جَه دوَأرستد، ² و همه تَه موسی مرَه اَبر و دریا میَأن تعمید بیگیفتد و نشان بدَأد کی خَأید موسی یَ پیروی بوکوند. ³ و همه تَه هون نانِ روحانی یَ بوخوردد ⁴ و هون آبِ روحانی جَه وَأخوردد، چره کی جی ایتَه صخره روحانی آب خوردد کی اوشَأنِ دونبال اَمویه، و اون صخره مسیح بو. ⁵ ولی خدا جی ویشترِ اوشَأن راضی نوبو، چره کی اوشَأنِ جنازه یان بیابانِ میَأن پراکنده بوست. ⁶ و اَ چیزان اتفاق دکفت تا اَمرِه درسِ عبرتی بیبه کی اوشَأنِ مَأنستَأن بدی دونبال نیبیم. ⁷ پس بعضی جی اوشَأنِ مَأنستَأن بُت پرست نیبید، هوطو کی کیتاب مقدسِ میَأن بینیویشته بوبُسته:«اسرائیلِ قؤم بینیشتد تا بوخورد و وَأخورد، و بازن ویریشتد تا رقص و خوشگذرانی بوکوند» ⁸ و زِناکاری نوکونیم، هوطو کی بعضی جی اوشَأن اَ کارَ بوکودد، و هو روزِ میَأن بیست و سه هزار نفر جی اوشَأن هلاکَ بوستد. ⁹ و مسیحَ امتحان نوکونیم، هوطویی کی بعضی جی اوشَأن بوکودد و سَمی لانتیانِ اَمرَه بمردد. ¹⁰ و شکایت نوکونیم، هوطویی کی بعضی جی اوشَأن بوکودد و فرشتۀ مرگ اوشَأنَ هلاکَ کود. ¹¹ و همۀ اَ چیزان نمونه رِه اوشَأنِ سر بأمو و اَمی درس گیفتنِ وَسی بینیویشته بوبُست، چره کی اَمَأن زمانهای آخرِ دورون زندگی کونیم. ¹² پس اونی کی گومان کونه اُستواره، مواظب بیبه کی نکفه. ¹³ هیچ وسوسه ایی شیمی سروخت نأمو دَأره کی آدمی رِه مناسب نوبوسته بِه، ولی خدا اَمینه و وَأنَأله شومَأن ویشتر جی شیمی طاقت آزمایش بیبید، بلکی هر وسوسه مرَه ایتَه راهِ فرارم فراهم کونه، تا بتَأنید اونَ تاب بأورید. ¹⁴ پس ای عزیزان، بُت پرستی جَه دوری بوکونید. ¹⁵ عاقلانِ اَمرَه گب زَئَن درم، دربارۀ اونچی کی گوفتَأن درم خودتان قضاوت بوکونید. ¹⁶ آیا پیاله پور جی برکت کی شامِ خداوندِ موقع خوریم و اونِ رِه شُکر کونیم، مسیحه خونِ میَأن شریک بوستَأن نییه؟ آیا اون نانی کی پارَه کونیم و خوریم، منظور مسیح بدنِ میَأن شریک بوستَأن نییِه؟ ¹⁷ جی اون جایی کی نان ایتَه یه، اَمَأنم با اَنکی اَمی تعداد زیاده ولی همه ایتَه بدنیم، چره کی همه ایتَه نانَ خوردَأن دریم. ¹⁸ اسرائیلِ قؤمَ فَأندرید، آیا اوشَأنی کی قربانیانِ گوشتَ خورد، مذبح خدمتِ میَأن شریک نیید؟ ¹⁹ پس می منظور چیسه؟ آیا می منظور اَنه کی واقعاً اَ بُتان خداید؟ یا اَنکی قربانیانی کی بُتانَ تقدیم بِهد ارزشی دَأرد؟ ²⁰ نه، بلکی می منظور اَنه کی اونچی کی بُت پرستان قربانی کوند، شیاطینَ تقدیم کوند نه خدایَ، و من نخَأیم شومَأن شیاطینِ مرَه شریک بیبید. ²¹ شومَأن نتَأنید هم خداوندِ پیاله جَه بوخورید و هم شیطانِ پیاله جَه، نتَأنید هم خداوندِ سفره دور بینیشینید و هم شیطانِ سفره دور. ²² آیا خَأئیم خداوندِ غیرتَ به جوش بأوریم؟ آیا اونِ جَه قویتریم؟ ²³ هر کاری کی مسیح قدغن نوکوده یَ شَه انجام دَئَن، ولی همه چی مفید نییه. هر کاری آزاده، ولی هر کاری صلاح نییه. ²⁴ هیچکس خو نفعِ فکر نیبه، بلکی دیگرانِ نفعِ دونبال بیبید. ²⁵ پس اَنِ وَسی کی شیمی وجدان ناراحتَ نیبه، گوشتی کی قصابی دورون فروشدَ بِهِنید و بوخورید و اصلاً وَأنورسید کی بُتِ رِه قربانی بوبُسته یا نه. ²⁶ چره کی جهان و هر چی اونِ میَأن نَهَه، خداوندِشینه. ²⁷ هر وخت ایتَه بی ایمان شمرَه خو خانه دعوت بوکود و خَأئید کی بیشید، هر غذایی شیمی پِش بنَه بوخورید و اَنِ وَسی کی شیمی وجدان ناراحتَ نیبه، اصلاً وَأنورسید کی اَن قربانی گوشته یا نه. ²⁸ ولی اگر کسی شمرَه بوگویه کی اَ گوشت، قربانی گوشته، فقط اونموقع اون کسی کی شمرَه بوگوفته وَسی، و وجدانِ وَسی اون غذایَ نوخورید. ²⁹ البته می منظور او شخصِ وجدانه، نه شیمی وجدان. شاید وأورسید:«چره من وَأستی دیگرانِ رِه می آزادی یَ محدودَ کونم؟ ³⁰ اگر غذایی یَ شُکرگزاری اَمرَه خورم، چره وَأستی اونچی کی خدایَ اونِ رِه شُکر بوکودِمِه وَسی مرَه اِفترا بزند؟» ³¹ پس چی بوخورید چی وَأخوردید، یا هر کارِ دیگری کی کونید، همه یَ خدا جلالِ رِه انجام بدید. ³² پس هیچکسَ ناراحتَ نوکونید، چی یهودیانَ، چی یونانیانَ، چی خدا کلیسایَ. ³³ هوطویی کی منم هر کاری دورون سعی کونم همه یَ راضی بوکونم، چره کی خودمِ نفعِ دونبال نییم، بلکی دیگرانِ منفعتِ فکرم تا نجات پیدا کوند.