¹ Lanya wapado, meiwa lararu wapa lamabu, pape lut leta liipo, Yesus sa nul nia murid ipa, sope nasii tusia, ² Yene yawar mewa, ladok be lamabu wane, kukura, wane labedel Ine layantul to pape lanin ananta liipo. ³ Yene yabe solsi be lasui lanouw, pape meipa nyanni pa simasil, meipa auta langai delo limpon hana kukura mesia lapo lo ta anlau. ⁴ Wanto ni muridipa lasiibbe Yesus sa. Ia bi ne polota meta meta nahan caam sibe roti polota amnyat dadi wane ane ? ⁵ Mansope, Yesus sa natunsi mewa lopa manin rota fita ? Ia binne roti fit. ⁶ Bepol ido Yesus sa sil sibe lakatoun po boat, sope nal roti fit pa, bepol namnan asi sope nakapeley be be ni kuli-kuli ipa lahan meiwa Ia ma buapa. ⁷ Tua murid-murid lanin duun i luki nul namwan asi bepol Yesus sol ni murid Ipa belakasam tumtua duun ipa be la han me iwa la mabu wapa. ⁸ Metmabuapa nanan aya nyaiuni maton anan wa liianapa lararu i mai pa ambe karajan fit sifon, ⁹ meiwa lanan apido luki met calan Hat bepol Yesus sa. sol sibe lasuy latan. ¹⁰ Mansope Yesus sa mapil be le ,ai suy be wanilo rum. Tua nia muridipa laaya ladok dal manuta. ¹¹ (YESUS SA LASOL LI BE NATIN LEAATA ANANDOK DOSORONGGA) Met, Farisi pa layan wapa, ladok lahababi gali tua Yesus sa, tumtua lasiw benatin le ata anapo sorrongga, bela tofon Ni. ¹² Bepol Yesus sa nasil be duu beama wo tuni mora pa sope nasui meiwa sansu wake lemsap leata lem be tagini ? Yene jin ilo amtolon apa be mewanta leketema jiam be sansan wane nemampo." ¹³ Bepol Yesus sa cita bol meipa, sunsui ia wanilo be lakarouwi. ¹⁴ Murid-murid laharandur lut roti, wapa lapaen roti iketi wa ambe wanilo apa. ¹⁵ Yesus sa nacubun besi, makalar ababan mewa kukura met farisi tua ragi Herodes sa. ¹⁶ Mansope ni murid-murid ipa lasuiy. Tumtusi to met sana tu met saana, kukura siwa lapen roti poapa ? ¹⁷ Ilo sia lum lewapa Yesus sa nasui be sia. Mewa muun purin tua mawasan po ? Mewa mimnyainipa liinnasibe simtoow ? ¹⁸ Mewa mimtaginni pape mempo ? To mimtalantuni pape matanopo ? mewasanpo. ¹⁹ Waya kapelei roti limpa be mahan met calan lim api do mararu ambe karanjang fita ? "Labine karanjang lahemai lol." ²⁰ Tua roti fit be met calan hat wanido karanjan fit sifon, tumtua anan imaiypa mararu ambe lasuiy labinne karanjang fit. ²¹ Mansope nasiiy besi mewa mun hata-tan lepurin. ²² Wapeido, Yesus tu murid-murid ipa ladok lo Betsaida. Mewaipa sia , lut met wapa tagipa amala, be Yesus sa bisara sauw met pa. ²³ Yesus sa dui sauw metwa tagipa mala kapyapa be nuti tabol kaliwpa. Mansope Yesus sa nakapi tagipa, tua nahata koka pa be met wa tagipa amala apa. Yesus sa natunni., awa nyem walawin leisanato ? ²⁴ Mansope met wapa nem laiya tu nasuiy yene yem met pape dadia ayta sitan. ²⁵ Bepolido Yesus sa nahata kapyapa be met wa tagipa mala, pei mansope met wapa nakapou I tagipa, to tagipa amuuw, ru memheiy. ²⁶ Mansope Yesus sa solibe suuy la nouw, tu nasuii beyi, awa sun be kaliuw i lopare. ²⁷ Bepol wapa Yesus sa tua ni murid-murid Ipa, la be kaliw kaliwpo Kaisarea Fipili. Ladok sorom Yesus sa natun ni murid kalipo meido labine yene Ido meta bela Yene ? ²⁸ Lasuiy labine Yohanes pembabtis metsia labine Elia, sia wei labine nabi sana wapa. ²⁹ Bepol, Yesus sa natumpo sia po mewido Yene meta bela Yene ? Petrus sa nasuiiy bine awaido Kristus sa. ³⁰ Yessu sa nasosor si be bine mewa masui akok leigana be metti gana are. ³¹ Wapa Yesus sa natin asuiy be nia mirid-murid Ipa anta makai macobey nasinsara lesimabu tua tua-tua Yahudilakasuli kaela imam-imam to ahli taurat ipa labuni lanyan tul hei suiwei. ³² Yesus sa nasuiy lewane tua antapyouw wapa.Petrus du Yesus sa be sua bitpa be bin be I ³³ Wapa ido naka wai be nem murid-murid Ipa, Yesus sa biin be Petrus sa tu nasuiy, "cita boline imbelisawa kukura, mewa mimawasan leta anapo Allah po pape leta anapo macobeiy." ³⁴ Bepol ido Yesus sa nul met mabu, tua ni muri-murid Ipa nasuiy besia metta namuu tumdele na manyangkal sui bitipa be bab nisalibpa, mansope bedeli Ine. ³⁵ Meta namu beababan ni nyawapa anta amin pape meta be ni nyawapa amin deline tumtu injil ne anta ni nyawapa anhei. ³⁶ Meti sana napen naror maten wane pape ni nyawapa amin nido ? ³⁷ Anta leta nape nambe nabai ni nyawa papa ? ³⁸ Meta be namay kukur Ine tua nik asuine po sansan wa namtolon po to nasal aneh, anta makai macobey namai naakui met wapa wa anta Ia dok tua mana ni kemulian Pa tua ni malaikat-malaikat wa la narowapa.