¹ Nokudha kokutenda takatambirwa, tirimurunyararo pamwepo na Mwari, ngokudha kwa Ishe wedhu Djesu Kirisitu. ² Ngokudha kwake taka puwa nyasha, no kutenda, idzo dzinoti simbisa. Ngatipfare norukariro kuti titcha puwa naMwari kuitira ramangwana, rugondeso kuti tipindeo mu ukuru waMwari. ³ Zwisiripi bhasi zwega, uyewo ngatipfare mumatambudziko, tinozviziya kuti matambudziko anobhara rubhudhiriro; ⁴ rubhudhiriro rinobhara kuphasiswa; uye kuphasiswa kuno bhara rugondeso kuitira ramangwana. ⁵ Rugondeso hari tswerusi, ngokuti rudho ra Mwari raka dhururwa mukati me mwoyo dzedhu ngokudha kwo Mweya Mutsweni, waakatipa. ⁶ Zwirokwazvo, patanga tisina simba pa mweya, Kirisitu wakafira atadzi munguwa yaaka sanangurwa na Mwari. ⁷ Zwino shupha munhu kufira munhu wakanaka. ⁸ Asi Mwari unoti pangidzira rudho rwaanaro kwetiri, ngokuti Kirisitu wakatifira patanga tiri muzvitema. ⁹ Uye, Mwari watitambira ngokudha kwe ngazi Yake pamutchinjikwa, titcha nunurwa, ngokudha kwake, mukutsamwa kwa Mwari. ¹⁰ Zwokuti patanga tiri apanduki, Mwari wakati songanisa bhudhikidze no rufu rwo Mwana Wake, kajinji paku kusonganiswa kwedhu naye, titcha nunurwa no upenyu waDjesu. ¹¹ Zwisiripi bhasi zwega, asi tinofharao ngokudha kwe zwiaa zwaakati itira Mwari pamusoro pa Ishe wedhu Djesu Kirisitu, wakaita kuti tisonganiswe na Mwari. ¹² Tchitema tchaka pinda munyika no munhu umwe bhasi, uye rufu rwakauya ngo pamusana po tchitema. Rufu rwaka bhararika ku anhu ese ngondawa yokuti munhu wese waka shaisha. ¹³ Kusati kwaizwa mutemo, tchitema tchanga tchiripo panyika, pasina mutemo hapana tchitema. ¹⁴ Zwakadharoko, rufu ranga riripo, kubvira munguwa ya Adamu kuzogumira pana Mozesi,, kunyangwe amweni haazii kuitao ushaishe wakaitwa na Adamu, uwo wanga ari tchipangidziro tcho waizodha kuwiya. ¹⁵ Kunyangwe zwidharo, pano musiyano pakati pe tchipo no hushaishe. Hino kudhai ese akatamika pamusana pe ushaishi wo munhu umwe, dzitchawandao nyasha dzaMwari notchipo tchoruponeso tcho munhu umwe, ndi Djesu Kirisitu. ¹⁶ Uye pano musiyano pakati po zwiya zwinopa Mwari no tchitadzo tchomunhu umwe bhasi. Ngodhii rimweni, kutongerwa pakuita zvakashata kwakauya noushaishi wakaizwa nomunhu umwe bhasi, uye ngo dhii rimweni, tchipo tcho nyasha tchakawiya pamusoro po ushaishi wakawanda, pakuregererwa. ¹⁷ Zwirokwazvo kuti pamusana po munhu umwe rufu rakawiya, asi mhinduro yo nyasha no tchipo zwitchagara zwiri mu upenyu pamusana pe umwe bhasi, Djeso Kirisitu. ¹⁸ Hino, se zwo anhu ese akasungwa pamusana poushaishi, ngokudha kwe nyasha ruponeso roupenyu rakawiya ku anhu ese. ¹⁹ Ngokudha kwo usahishi wakaizwa ngo munhu umwe bhasi, ajinji akazwii ashaishi, nomushobho umweo, ngo pamusana pokutenda kwo umwe, ajinji atcha regererwa. ²⁰ Mutemo wakapinda pakudha kutunhudzira ushaishi. Paka waka wanda ushaishi, nyasha dzakanyanyao kuwanda. ²¹ Izvi zwakaitika kuti, no mushobho umweo ushaishi waka pinza rufu, uyeo nyasha dzaka pindza ruponeso no upenyu usingaperi pamusana pa Djeso Kirisitu, Ishe wedhu.