¹ Isusu takagwinya tinofanera kutwara kurembedzeka kwevasina simba, haiwa kuti tidzidakadze pachedu. ² Umwe ngeumwe wedu ngaadakadze muakirwana wake ngezvakanaka, zvinomuaka., ³ Ngokuti Kristu aazi kudzidakadza pachake; asi, kudai ngezvakanyorwa: “Kutuka kweavo vakakutuka iwewe kwakawira padera pangu.” ⁴ Ngokuti kunyazwi ngezviri zvakanyorwa kare zvakanyorwa kuti isusu tidzidze, kuti kubudikidza ngokusengerera nokuembedzerwa kwezvinyorwa tiwe nekugonda. ⁵ Mwari wokusengerera nowokuembedzera ngaamupe kuti muite mupinimidzo umwewo umwe kunoumweni, kudai ngezvinoda Kristu Jesu, ⁶ kuti muri pamwepo ngeizwi rimwe mukudze Mwari naBaba waMambo wedu Jesu Kristu. ⁷ Ndizvo ashiranai umwe noumweni, kudai ndiKristu wakamuashirawo kuti Mwari akudzwe. ⁸ Ngokuti ndinomuronzera kuti Kristu wakaitwa muranda kune vakachekwa kuti waonise gwinyiso raMwari, kuti wagwinyisise zvigondiso zvakagondiswa kumadzibaba, ⁹ nekuitira kuti madzinza akudze Mwari ngendaa yenyasha dzake. Kudai ngezvakanyorwa kuti, “Ngeiyi ndaa ndinozomukudza pakati pevemadzinza, ndiembere kukudzwa kwezita renyu.” ¹⁰ Zve unoti: “Dakarai, imwimwi vemadzinza, pamwepo nevanhu vake.” ¹¹ Zve unoti: “Kudzai Mambo Mwari, imwimwi mweshe vemadzinza, vanhu veshe ngavamukudze.” ¹² Zve Isaya unoti: “Nzinde yaJese inozouya, nouwo unozomuruka kutonga padera pevemadzinza. Vemadzinza vanozogondera mwaari.” ¹³ Hino, Mwari wekugonda ngaamudzadze ngokudakara kweshe nokunyarara mukutenda, kuti kubudikidza ngesimba reMweya Wakachena muwe negonda rinorashikira. ¹⁴ Inini ndemene ndinonasa kuzia ndimwi, hama dzangu, kuti imwimwi mwemene mwakazara ngokunaka, mwakazara ngekuzia kweshe, munokonazve kupangana umwe kunoumweni . ¹⁵ Asi ndakanyora kwomuri ngokushinga yaamho ngezviro zvimweni, kumukarakadzisa ngendaa yenyasha dzakapuwa kwendiri ndiMwari, ¹⁶ kuti ndiite mushandiri waKristu Jesu kunevemadzinza mumushando woupristi muvhangeri raMwari, kuti vemadzinza vangaita mudiro unoashirika, wakacheneswa ngeMweya Wakachena ¹⁷ Ndizvo ndinakwo kuganza ngemushando wangu munaKristu Jesu ngezviro zvaMwari. ¹⁸ Ngokuti andizoshingi kuereketa ngezviro zvimweni kwega ngeizvo zvaakaita Kristu kubudikidza ndini kuitira kuti vemadzinza vapurutane, ngeizwi nomushando, ¹⁹ ngesimba rezvioniso nemishamiso, ngesimba roMweya waMwari, kuti kubvira ngeJerusarema nokunharaunda dzaro metsa kuguma Iririkomu ndakanasa kuparidza vhangeri raKristu. ²⁰ Nokudaro, ndakadisisa kuparidzira vhangeri pandau dzisaiziikanwa zita raKristu, kuti ndisazoaka padera petsikiro roumweni munhu, ²¹ asi kudai ngezvakanyorwa kuti: “Vanozoona avo vasikazi kuronzerwa mashoko ndiye, naavo vanozozwisisa uwo wevasikazi kuzwa ndiye.” ²² Iyi ndiyo ndaa yakandipinga kajinji kuti ndisauya kwomuri. ²³ Asi zvino, andisina ndau yekushanda kuneidzi nyika, ndinodisisa ngaaya makore akawanda kuti ndiuye kwomuri. ²⁴ Ndinogonda kuti ndinozomuona apo ndoopinda kuenda Sipeini, nokuperekedzwa ndimwi parwendo rwangu, apo ndambodakara pamwepo nemwi kamukuwo kadoko. ²⁵ Asi zvino, eya, ndirikuenda Jerusarema kooshandira vakacheneswa vaMwari. ²⁶ Ngokuti zvakavadakadza avo veMasedhonia neveAkhaiya kupa zvipo kunevarombo vari pakati pevakacheneswa muJerusarema. ²⁷ Vakadakara kuzviita, ngegwinyiso vona vane chikwereti kwavari; ngokuti kudai vemadzinza vakauya vakakoanisirana navo zvifumiso zvavo zvoMweya, vona vanofanera kuvashandira ngezviro zvevanotama zvomuiri. ²⁸ Ndizvo apo ndapedza kuita izvi nokuvaunzira michero iyi yakaunganidzwa, ndinozopinda kuenda Sipeini ngekwenyuyo. ²⁹ Neni ndinozia kuti apo ndoouya kwomuri, ndinozouya ngokufumiswa kwakazara kwaKristu. ³⁰ Kunemwi hama, ndinokumbira naMambo wedu Jesu Kristu norudo reMweya, kuti mutambudzike pamwepo neni mumukumbiro yenyu kunaMwari ngendaa yangu. ³¹ kuti ndinunurwe kubva kunevasikatendi vari muJudhia, nokuti nomushando wangu kuneveJerusarema uashirike kunevakacheneswa vaMwari, ³² ndizvo kuti ngokuda kwaMwari ndingauya kwomuri ngokudakara kuti ndizorore pamwepo nemwi. 33 Zvino Mwari wokunyarara ngaagare nemwi mweshe. Ameni. ³³ Rugare raIshe ngariwe nemwi. Amen