¹ Ashirai munhu wakarembedzeka mukugonda, asi musikaphikisani naye. ² Munhu umwe unogonda kuti ungarha chero zveshe; umweni munhu wakarembedzeka unodya muriwo yemashakani. ³ Ena unorha asashoora usikarhi, naye usikarhi asatonga unorha, ngokuti Mwari wakamuashira. ⁴ Urianani iwewe unotonga muranda woumweni? Zviri pamberi pamambo wake kuti aeme nokuti kuwa. Asi unozoema, ngokuti Mambo unesimba rokuita kuti aeme. ⁵ Munhu umweni unoremeredza zuva rimwe kupinda rimweni, umweni unoremeredza mazuva eshe kuti akatodzana. Munhu weshe ngaanase kuzia mumupinimidzo wake. ⁶ Uwo unongwarira zuva, unoringwaririra kukudza Mambo. Nouwo unorha, unorhira kukudza Mambo ngokuti unobonga Mwari; apo usikarhi, nekudaha kwaMambo naye unobonga Mwari. ⁷ Ngokuti apana naumwe wedu unodziponera pachake ega, apanazve unodzifira pachake ega. ⁸ Ngokuti kudai techipona, tinoponera Mambo, nokuti dai techifa, tinofira Mambo; ndizvo zvino, kunyazwi techipona nokuti techinyafa, tiri vaMambo. ⁹ Ngokuti ngeiyi ndaa Kristu wakafa akaponazve, kuti aite Mambo wevakafa nevanopona. ^{10 11} Ngeyi iwewe wechiitira ndaa hama yako? Newe unoshoora ngeyi hama yako? Ngokuti isusu teshe tinozoema pamberi pechigaro chokutonga chaMwari. 11 Ngokuti kwakanyorwa kuti, “Kudai ngezvendinopona, unoronza Mambo Mwari, mabvi eshe anozondigwadamira nendimi dzeshe dzinozokudza Mwari.” ¹² Ndizvo, umwe ngaumwe wedu unozodzipingurira kunaMwari. ¹³ Ndizvo tisachaitirana ndaa umwe kunoumweni, asi zvirinane kuti mugure kuti asazoapo munhu unoisa chipumhuniso munjira yehama yake. ¹⁴ Ndinozia neni ndinoongiwa munaMambo Jesu kuti akuna chiro chinosvipisa mwechiri pachacho; asi chinoita chakasvipiswa kwaari unopinimidza kuti chakasvipiswa. ¹⁵ Ngokuti kudai hama yako yechisvipiswa mwoyo ngendaa yokudya kwako, ngokudaro auchahambi ngorudo. Usamuuraya ngokudya kwako uwo waakafira Kristu. ¹⁶ Ndizvo musatendera kuti kunaka kwenyu kureketwe ndikwo kuti kwakashata. ¹⁷ Ngokuti umambo waMwari andihwopi wokurha nekumwa, asi kutendeka nokunyarara nokudakara muMweya Wakachena. ¹⁸ Kunyazwi ndiani unoshandira Kristu ngokuita izvi unoashirika kunaMwari nokutedwa kunevanhu. ¹⁹ Ndizvo ngatitsvake izvo zvinounza kunyarara neizvo zvetingagwinyisana ndizvo umwe kunoumweni. ²⁰ Musaparadza mushando waMwari ngendaa yezvokurha. Ngegwinyiso zviro zveshe zvakacheneswa, asi zvakashata kunyazwi kunaani unoita kuti vanhu vamweni vawe ngezvaanodya; 21 ²¹ kwakanaka kurekera kudya nyama nokurekera kumwa vhini nokuti kurekera kuita chiro chimweni chinoita kuti hama yako ikugunwe. ²² Kugonda kwounakwo, ngakugare pakati pako naMwari. Unomuchena usikadziitiri ndaa pazviro zvaanotendera. ²³ Asi uwo unogononda watoitirwa ndaa, kudai echidya, ngokuti aaiti ngokugonda; ngokuti kunyazwi ngechiri chisikaitwi ngokugonda kushaisha.