¹ Zvino ndinoti: Mwari wakarasha vanhu vake here? Haiwa! Nokuti neni vo ndiri muIsraeri, worudzi rwaAbhurahamu, weimba yaBenjanimi. ² Mwari haana kurasha vanhu vake vaakaziva pakutanga. hamuzii kuti Rugwaro runoti kudini pamashoko aEria here? Kuti unokumbira kunaMwari pamusoro pavaIsraeri, achiti: ³ Ishe, vakavuraya vaporofita venyu, vakaputsa aritari dzenyu, ini ndakasiyiwa ndoga, zvino vanotswaka kundivuraya. ⁴ Asi Mwari unomupingurei? ''Unoti: Ndakazvisiira varume vanezvuru zvinomwe, vasina kufugamira Baari''. ⁵ Zvino sazvo nenguva inovo variyo vakasara, vakasanangurwa nenyasha ⁶ Asi kana kuketwa kuri kwenyasha, kunenge kusiri kwamabasa, kana zvisakadaro, nyasha hadzisiripi nyasha. Asi kana kuri kwamabasa hakuzati kuchiri kwenyasha. Kana zvisakadaro basa harizati richibasa. ⁷ Zvino tichatikudini? VaIsraeri havana kuwana zvavakanga vachitsvaka, asi vakasanangurwa ndivo vakazviwana; vamwe vakawomeswa, ⁸ sezvazvakanyorwa, zvechinzi: Mwari wakavapa mweya wehope; meso, kuti varege kuwona, nenzee, kuti varege kunzwa, kusvikira zuva renhamashi. ⁹ NaDhavhidhi vo unoti: Tafura yavo ngaiitwe musungo, neriva, ¹⁰ Meso avo ngaasvipirwe, varegere kuvona; Mukotamise mushana yavo misi yeshe. ¹¹ Saka ndinoti: Vakagumbuswa kuti vawe here? Haiwa! Asi nokuwa kwavo ruponeso rwakasvika kuvahedheni, kuti vamutsirwe godo. ¹² Zvino kana kuwa kwavo kwakafumisa nyika, nokutapudzwa kwavo kwakafumisa vahedheni, zvikuru sei kudzara kwavo? ¹³ Ndinotaura kwamuri, imimi vahedheni. Zvandiri muapostora wavahedheni, ndinokudza basa rangu. ¹⁴ Zvimweni ndingamusa godo kunevenyama yangu, ndiponese vamweni. ¹⁵ Nokuti kana kurashwa kwavo kuri kuyananiswa kwenyika, kugamuchirwa kwavo kuchagoveiko, asi vupenyu pakufa? ¹⁶ Zvino kana chibereko chokutanga chiri chitsvene, bundu rose rakadaro vo; kana mudzi uri mutsvene, matavi akadaro vo. ¹⁷ Zvino, kana mamwe matavi akavhuniwa, iwe, muorivhi wokudondo ukabatanidzwa pakati pawo, ukava nomugove pamwe chete nawo pamudzi napamafuta omuorivhi, ¹⁸ usazvikudza kumatavi, kana uchizvikudza, hauzi iwe unotakura mudzi, asi mudzi ndiwo unokutakura iwe. ¹⁹ Zvino iwe uchati, matavi akavhuniwa, kuti ini ndibatanidzwe. ²⁰ Ndizvozvo; vakavhuniwa nokusatenda kwavo, iwe unomira nokutenda kwako. Usazvikudza, asi utye. ²¹ Nokuti kana Mwari asina kurega matavi awo, haangakuregi newe vo ²² Zvino tarira vunyoro nokukasharara kunavakawa, asi kwauri vunyoro bwaMwari, kana uchigara pavunyoro bwake;kana zvisakadaro, newe uchatemwa vo. ²³ Naivo vo, kana vasingagari pakusatenda kwavo, vachabatanidzwa; nokuti Mwari unogona kuvabatanidza zve. ²⁴ Nokuti kana iwe wakatemwa kumuorivhi, uri wokudondo pakusikwa kwawo, ukabatanidzwa pamuorivhi wakanaka, zvichipesana nokusikwa kwazvo zvikuru sei ava vari matavi awo,vangabatanidzwa pamuorivhi wavo! ²⁵ Nokuti hama dzangu, handidi kuti musaziva chakavanzika ichi, kuti murege kuva namanyawi; kuti kuwomeswa kwomoyo kwakavuya pamusoro pavamwe vavaIsraeri kusvikira kuzara kwavahedheni kwapinda. ²⁶ Nazvo rudzi rweshe rwavaIsraeri ruchaponeswa;sezvazvakanyorwa zvichinzi: PaZiyoni pachabuda Musununguri; Uchabvisa kusada MwarikunaJakobho. ²⁷ Iyi ndiyo sungano yangu navo, Musi wandichabvisa zvivi zvavo. ²⁸ Kana iri Vvhangeri, avo vavengi vaMwari nokuda kwenyu; asi kana kuri kusanangurwa, vadikanwa nokuda kwamadzibaba. ²⁹ Nokuti zvipo zvaMwari nokudana kwake hazvishandurwi. ³⁰ Nokuti semi kare makanga musingatereri Mwari, asi zvino makanzwirwa ngoni nokusaterera kwavo. ³¹ saizvo naivo zvino havana kuterera, kuti nengoni dzakaitirwa imi naivo vanzwirwe vo ngoni. ³² Nokuti Mwari wakavapfigira veshe pakusaterera kwavo, kuti avazwire ngoni yeshe. ³³ Haiwa kufuma kwokuchenjera nokuziva kwaMwari kwakadzika sei! Kutonga kwake hakunganzverwi, nenzira dzake hadzingarondwi! ³⁴ Nokuti ndianiko wakanga ari murairi wake? ³⁵ Ndiani wakatanga kumupa, kuti aripirwe zve? ³⁶ Nokuti zvose zvinobva kwaari, zviripo naye, zviripo nokuda kwake. Ngaave nokubwinya nokusingaperi. Ameni