¹ Pakupedzisira, hama dzangu, dakarai munaMambo. Kunyorazve kwomuri zviro izvo azvindinesi inini, asi kwomuri kungwaririka. ² Ngwarai imbwa, ngwarai vashandi vezvakashata, ngwarai ngaavo vanocheka nyama. ³ Ngokuti tisu tiri vakachekwa, avo vanodira Mwari muMweya nokuganza munaKristu Jesu, tisikagondi munyama ⁴ kunyazwi zvakadaro, inini pachangu ndinazvo zvendingagondawo munyama. Kudai aripo munhu unokarakadza kuti ungagonda nyama, inini ndingamupinda: ⁵ ndakachekwa ngezuva rechisere, ndiri worudzi revanhu veIsuraeri, ndiri wedzinza raBhenjamini, ndiri muHebheru wakabarwa ngevaHebheru; paMipango ndiri muFarisi. ⁶ Nendaa yokutsamwirira ndakaita mutambudzi wechiara. Ngendaa yekutendeka kweMupango ndakaita usina ndaa. ⁷ Asi izvo zvainga upfumi kwendiri, ndakazvierenga kuita zvisina shkwiro ngendaa yaKristu. ⁸ Eya ngegwinyiso, ndinoerenga zveshe kuti zviri zvisina shkwiro ngendaa yekunaka kukuru kwokumuzia Kristu Jesu, Mambo wangu. Ngendaa yake ndakatambudzika ngokurashikirwa ngezviro zveshe, neni ndinozvierenga kuti zviri marara, kuitira kuti ndiuyirwe naKristu, 9 ⁹ ndioneke mwaari ndisina kururama kuri kwangu, kunobva muMupango, asi ukwo kunouya kubudikidza ngokugonda munaKristu, kururama kunobva kunaMwari ngokugonda. ¹⁰ Inini ndinoda kumuzia Kristu nesimba rekumuka kwake, nokukowana naye mukutambudzika kwake, ndechitodzaniswa naye mukufa kwake, ¹¹ kuti zvanyadini ndihanire mukumuka kubva kwevakafa. ¹² Andikwopi kuti ndatohanira ichi nokuti kuita waperera zvino; asi ndinoangirira kuenda mberi kuti chiite changu icho chaakandibatira Kristu Jesu. ¹³ Hama, inini ndemene andifungi kuti ndakabata kuita changu; asi chiro chimwe chendinoita, ndinoriarwa zviri sure nokunanambira zviri mberi. ¹⁴ Ndinogwinyisira kuenda kumagumisiro, koopuwa chipo chokudaidzwa kunobva mudenga kuri munaKristu Jesu. ¹⁵ Ndizvo isusu teshe vakura ngatiwe nekufunga kwakadaro. Nokudai muno mufunga zvakasiana ngewechiri chiro, neichozve Mwari unozochionesa kwomuri. ¹⁶ Kwega ngatibatisise kuneizvo zvetakahanira kwezviri. ¹⁷ Hama, itai vanonditedzera wangu. Muningisise avo vanohamba kudai ngechionero chemunacho kwetiri. ¹⁸ Ngokuti vajinji vanohamba kudai ngemagaa omuchinjiko waKristu; ndakamuronzera ndivo kazhinji, nazvino ndinomuronzera ngokuchema. ¹⁹ Magumo avo kuparadzwa, chimwari chavo indani dzavo, navo vanoganza ngezvinodanisa zvavo; vanopinimidza ngezvomunyika. ²⁰ Asi nyika yedu iri mudenga, kubveyozve tinogarira kuuya kweMuponesi, Mambo Jesu Kristu. ²¹ Ena unozosandura muiri woupashi wedu, kuti uite unotodzana nomuiri wouthende wake, kubudikidza ngesimba iro rinomuitawo kuti akone kupfaisa zveshe pashi pake.