¹ Ndizvo, hama dzangu, avo vendinoda nevendinoshuwira, kudakara kwangu nedzungudza rangu, ngokudaro emai mwakagwinya munaMambo, vanodikanwa vangu. ² Ndinopota Yuodhia, ndinopota Sintikhe, kuti vaano mupinimidzo umwewo munaMambo. ³ Zvechokwadi, ndinokumbirawo, iwewe mungani wangu wegwinyiso, detsera madzimai aya, ngokuti vakashanda pamwepo neni muvhangeri, pamwepo naKrementi nevamweni vangani vangu vendinoshanda navo, avo mazita avo ari mubhuku reupenyu. ⁴ Dakarai munaMambo ngenguva dzeshe; zve, ndinozoti, Dakarai. ⁵ Kupfaa kwenyu ngakuziikanwe kuvanhu veshe. Mambo waapaduzesinde. ⁶ Musanyunyutira chiro, asi muzviro zveshe kubudikidza ngomukumbiro nekupota pamwepo nokubonga, mikumbiro yenyu ngaiziikanwe kunaMwari. ⁷ Kunyarara kwaMwari, kunopinda kuzwisisa kweshe, kunozongwarira mwoyo yenyu nemipinimidzo yenyu munaKristu Jesu. ⁸ Pakugumisira, hama, zveshe zviri zvegwinyiso, zveshe zvinoreremedzeka, zveshe zviro zvakanaka, zveshe zviri zvakachena, zveshe zvinodikanwa, zveshe zvine mbiri yakanaka, kudai kuripo kunaka, kudai kuripo kukudzwa, pinimidzai ngeizvi zviro. ⁹ Rambai mwechiita zviro izvo zvemwakadzidza nekuashira nokuzwa nokuona mwendiri; naMwari wkunyarara unozogara nemwi. ¹⁰ Inini ndinodakara kakuru munaMambo kuti zvino pakupedzisira mwakafanira kufunga ndini; ngegwinyiso mwaipinimidza ndini, asi mwakatama nguva wekuzvionisa. ¹¹ Haiwa kuti ndinoreketa ngendaa yekutama; ngokuti ndakadzidza kugutiswa kunyazwi ngohuri ugaro wendinawo. ¹² Ndinozia kuita murombo nokuita mupfumi. Kuzviro zveshe nepakati pazvo zveshe, ndakadzidza zvakafishika zveshe kugutiswa nokuita nzara, zveshe kupfuma nourombo. ¹³ Ndingaita zveshe ndiye unondigwinyisa. ¹⁴ Asi mwakaita zvakanaka kuti mwakatambudzika neni mukutambudzika kwangu. ¹⁵ Imwimwi vaFiripi ngegwinyiso munozia kuti pakutanga kwevhangeri, apo pendakabva Masedhonia, apana chiara chakatambudzika neni ngendaa yokupa neyokuashira, asi imwimwi mwega. ¹⁶ Ngekuti kunyazwi apo pendaiya muThesaronika, mwakatumira kamwe nokwechipiri kundidetsera mukutama kwangu. ¹⁷ Haiwa kuti ndinotsvaka chipo, asi ndinotsvaka muchero yemunozo fumiswa ndiyo. ¹⁸ Asi ndaanazvo zviro zveshe, ndafumiswa. Ndagutiswa, ndaashira kubva kunaEphafrodhitusi zvipo zvemwakatumira kubva kwomuri, zviri gwema rakanaka, mudiro unoashirika unodakadza kunaMwari. ¹⁹ Asi Mwari wangu unozomugutisa ndizvo zveshe zvomunotama, kudai ngeupfumi hwake muuthende munaKristu Jesu. ²⁰ Kuna Mwari Baba wedu ngakugare uthende mhera nariini nariini. Ameni. ²¹ Tambisai vakacheneswa veshe vari munaKristu Jesu. Hama dzineni dzinomutambisa. ²² Veshe vakacheneswa vanomutambisa, kakuru avo vemhuri yaSiza. ²³ Nyasha dzaMambo Jesu Kristu ngadzigare nemweya yenyu.