¹ Ndizvo kudai kuripo kunyaradzwa munaKristu, kudai kuripo kuembedzerwa kwerudo, kudai kuripo kuiyana kweMweya, kudai dziripo nyasha dzinorudo nekuitirwa nyasha, ² itai kuti kudakara kwangu kuite kwakaperera; muite vane mupinimidzo umwe, munerudo rimwe nechisungo chimwe nomupinimidzo umwe. ³ Musaita chiro ngokudzida nokuti ngokudzitunhumadza, asi mukupfaa kwomupinimidzo umwe ngaumwe ngaaerenge kuti vamweni vanomupinda ngokunaka. ⁴ Umwe ngaumwe ngaarekere kuningira zviro zvake, asi ngaaringire zvevamweni. ⁵ Uyu mupinimidzo ngaugare mukati mwenyu uwo wainga mukati mwaKristu Jesu, ⁶ uwo, kunyazwi wainga mumuemo waMwari, aazi kupinimidza kuti chiri chiro chekukara kuedzana naMwari. ⁷ Asi wakadziita usina shwiro, echidzitorera muemo wemuranda, akabarwa mumuemo wemunhu. Apo echioneka anomuemo wemunhu, ⁸ wakadzipfaisa pachake, akaita unozwisisa metsa pakufa, kunyazwi rufu repamuchinjiko. ⁹ Ndizvo Mwari wakamukudza kakuru, akamupa zita riri padera pezita reshe. ¹⁰ Kuti ngezita raJesu mabvi eshe agwadame, evari mudenga nevari munyika nevari pashi penyika. ¹¹ kuti ndimi dzeshe dzitende kuti Jesu Kristu ndiye Mambo, kuti Mwari Baba akudzwe. ¹² Ndizvo, vanodikanwa vangu, kudai ngezvemwakandizkwa ngenguva dzeshe, haiwa panguva dzendiripo dzega, asi zvino munopinda kakuru apo ndisipo, shandirai ruponeso renyu mukutkya nomukuhuta. ¹³ Ngokuti ndiye Mwari unoshanda mukati mwenyu, echimuita kuti mukone mweshe kuda nokushandira kudakara kwake kwakanaka. ¹⁴ Itai zveshe pasina kuvhuruvhuta nekuti kuita hasha. ¹⁵ kuti muite vasina chevanoitirwa ndaa, vakanaka, muri vana vaMwari musina ndaa pakati pomubarirwana wakashongoroka newakapauka, mujeke pakati pavo kudai ngenyeredzi dzinojeka padera penyika. ¹⁶ Ngekubatisisa izwi rekupona kunoita kuti ndiwe nacho chekuganza ndicho ngezuva raKristu, kuti andizi kutera kurumba pasina shkwiro nekuti kutera kushanda pasina shkwiro. ¹⁷ Asi kunyazwi ndechidururwa padera pomudiro nemushando wokugonda kwenyu, ndinodakara ndechidakara nemwi mweshe. ¹⁸ Nekudaro dakaraiwo imwimwi, mudakare neni. ¹⁹ Asi ndinogonda munaMambo Jesu kutumira Thimothi kwomuri ngokukasira kuti neni ndidakadzwe ngemashoko enyu. ²⁰ Ngokuti andina munhu umweni wakadai ndiye, ungazonasa kumutambudzikira imwimwi ngokugara kwenyu. ²¹ Ngokuti veshe vanodzitsvakira zvavo, haiwa izvo zvaJesu Kristu. ²² Asi imwimwi munozia kugondeka kwake Thimothi, kuti kudai ngomwana unababa, ngokudaro ena wakashanda neni mukuhambisa vhangeri. ²³ Ndizvo ndinogonda kuti ndinozomutumira ngekukasira apo ndazoona zvooitika kwendiri. ²⁴ Asi neni ndinogonda munaMambo kuti ndinozokasira kuuyayo. ²⁵ Asi ndapinimidza kuti zvinosisira kuti nditumire Ephafrodhitusi kwomuri, hama yangu, inoshanda pamwepo neni, nouri joni pamwepo neni, nhumwa yenyu, nounoshandira kutama kwangu. ²⁶ Ngokuti waimushuwira imwimwi mweshe, naye wakatambudzika kakurutu ngokuti mwakazwa kuti wairwara. ²⁷ Ngegwinyiso wairwara ari paduze pokufa. Asi Mwari wakamuitira nyasha, haiwa kwaari kwega asi nokwendiriwo, kuti ndisatambudzika padera pokutambudzika. ²⁸ Ndizvo ndinopinda kuda kumutumira kwomuri, ndizvo kuitira kuti mumuonezve mudakare, kuti neni ndisanyanya kutambudzika. ²⁹ Ndizvo muashireyi munaMambo ngokudakara kweshe; mureemedze vakadaro. ³⁰ Ngokuti wakaapasinde pokufa ngendaa yemushando waKristu, echipira kupona kwake mungozi, kuti apedzise izvo zvaifanira zvemushando wenyu kwendiri.