¹ Ndizvo pakupedzisira, hama, tinomukumbira nokukumbira munaMambo Jesu kuti, kudai ngezvemwakaashira kwetiri njira inofanera yekuhamba ndiyo nekumudakadza Mwari, kudai ngezvomunohamba, kuti muwanze kudaro. ² Ngekuti munozia kupanga kwetakamupanga kubudikidza ndiMambo Jesu. ³ Ngokuti uku ndikwo kuda kwaMwari, kucheneswa kwenyu; kuti murekere kupomba, ⁴ kuti umwe ngaumwe wenyu azie njira yokudzitorera mukadzi pachake mukucheneswa nemukureremedza, ⁵ haiwa ngokuemura kwakashata, kudai ngevemadzinza vasikamuzii Mwari. ⁶ kuti kusaapo naumwe unopauka nokushaishira hama yake ngeiyi ndaa, ngokuti Mambo ndiye muunzidziri weizvi zveshe, kudai ngezvetakambomuronzera nokupupura kudaro. ⁷ Ngokuti Mwari aazi kutidaidzira kunezvisikazi kusukika, asi mune zvakacheneswa. ⁸ Ndizvo kunyazwi ndiani unoramba izvi, aarambi munhu akadi, asi unoramba Mwari, uwo unopa kwomuri Mweya mutswene wake . ⁹ Asi ngendaa yerudo pakati pehama amutami kuti munhu amunyorere, ngokuti imwimwi mwemene mwakadzidziswa ndiMwari kuti mudane umwe kuneumweni. ¹⁰ Ngegwinyiso munodzida hama dzeshe dziri muMasedonia mweshe. Asi tinomupanga, hama, kuti muwanze nokuwanzisisa. ¹¹ Kuti muedze kugara ngokunyarara nokubatika ngemushando yenyu yega nekushanda ngenyara dzenyu, kudai ngezvetakamupanga, ¹² kuti muhambe ngenjira inosisira pamberi pevari kubanze, musina chemunotama. ¹³ Hama, atidi kuti muite vasikazii, ngendaa yaavo vakaata, kuti musazotambudzika kudai ngavamweni vasina gonda. ¹⁴ Ngokuti kudai techitenda kuti Jesu wakafa nokumukazve, zvakanyadaro kubudikidza ndiJesu, Mwari unozovaunza pamwepo naye avo vakaata. ¹⁵ Ngokuti tinoronza izvi kwomuri ngeizwi raMambo, kuti isusu tichapona, tasara metsa kuuya kwaMambo, atitongozotangiri avo vakaata. ¹⁶ Ngekuti Mambo pachake unozodzaka kubva kudenga ngekudaidzira ngeizwi rengirosi huru nekuridzwa kwegwama raMwari, nevakafa vari munaKristu vanozotanga kumuka. ¹⁷ Zvino isusu tichapona tasara, tinozotorwa pamwepo navo mumakore kooshongana naMambo mudenga. Ngokudaro tinozogara naMambo mhera nariini. ¹⁸ Ndizvo embedzeranai ngemazwi aya.