¹ Ndizvo apo takakorera kushingirira, takapinimidza kuti kwakanaka kuti tisiiwe sure tega muAtenesi. ² Nesu takatuma Thimothi, hama yedu nomushandi waMwari muvhangeri raKristu, kuti amugwinyise nokumuembedzera mukutenda kwenyu. ³ Kuti asazoapo munhu unokutukuswa ngemadambudziko aya. Ngegwinyiso imwimwi mwemene munozia kuti izvi ndizvo zvetakaemeserwa. ⁴ Ngegwinyiso, apo petainga nemwi, takambomuronzera kuti tinozorwadziwa ngokutambudzwa, kudai ngezvakaitika, kudai ngezvomunozia. ⁵ Ngeiyi ndaa ininiwo apo ndakakorera kushingirira, ndakatumira kuti ndizie ngendaa yokutenda kwenyu, ndechitya kuti pamweni muedzi wainga amuedza nemushando wedu waizoita usina shkwiro. ⁶ Asi Thimothi apetuka kwetiri kubva kwomuri, wakatiunzira mashoko anodakadza okutenda kwenyu nerudo rwenyu. Wakatironzerawo kuti munonasa kupinimidza tisu ngenguva dzeshe, mwechishuwira kutiona, kudai tisuwo tinoshuwira kumuona. ⁷ Ngendaa yeizvi, hama, takagwinyiswa ndimwi mukutama kwedu kweshe nokutambudzika kubudikidza ngokugonda kwenyu. ⁸ Ngokuti zvino tinopona, kudai imwimwi mwechiangira kuema mwakagwinya munaMambo. ⁹ Ngekuti tingaita mabongereyi kuna Mwari ndimwi, ngendaa yekudakara kweshe kwetinodakara ndikwo ngendaa yenyu pamberi paMwari wedu? ¹⁰ Tinokumbira kakuru usiku nemasikati kuti tione hope dzenyu nokuzadzisa kunyazkwi chiri chinotamika mukugonda kwenyu. ¹¹ Zvino Mwari wedu naBaba emene naMambo wedu Jesu ngaatungamirire njira yedu kwomuri. ¹² NaMambo ngaaite kuti muwande nokuwanza rudo pakati penyu umwe kune umweni nokunevanhu veshe, kudai ngezvetinoitawo isusu kwomuri. ¹³ kuti ena agwinyise mwoyo yenyu mukucheneswa kuti muite vasina ndaa pamberi paMwari wedu naBaba, pakuuya kwaMambo wedu Jesu pamwepo nevatswene vake veshe.