¹ Asi ngendaa yenguva nemikuwo, hama, amutami kunyorerwa ndizvo. ² Munonasa kuzia kuti zuva raMambo rinoguma kudai ngembavha inoguma usiku. ³ Apo vanozoti: “Kuripo kunyarara nokungwaririka,” zvino ngekukasira kuparadzwa kuchauya padera pavo, kudai ngokurwadziwa kunouya padera pemudzimai wosununguka, apana unozotiza ⁴ Asi imwimwi, hama, amuri muchidimapi, kuti iro zuva rimugumire kudai ngembavha. ⁵ Ngokuti imwimwi mweshe muri vana vokujeka nevemasikati; atisiri vousiku akadi nokuti vechidima. ⁶ Ndizvo zvino tisaata, kudai ngezvevanoita vamweni, asi ngatirambe techirinda, tingware. ⁷ Ngokuti avo vanoata, vanoata usiku, naavo vanodakwa, vanodakwa usiku. ⁸ Asi isusu tiri vemasikati ngatingware, takapfeka chihlangu chepaditi chokugonda norudo, nechiqoko kuita gonda reruponeso. ⁹ Ngokuti Mwari aazi kutiemesera ushungu, asi kuti tione kuponeswa kubudikidza ndiye Mambo wedu Jesu Kristu. ¹⁰ Uwo wakatifira kuti kunyazwi tichazwa nokuti taata, tipone pamwepo naye. ¹¹ Ndizvo embedzeranai umwe kuneumweni, muakane umwe kuneumweni, kudai ngezvamunoita. ¹² Asi tinomukumbira, hama, kuti mureremedze avo vanoshanda pakati penyu, vanomutungamirira munaMambo, vanomupanga. ¹³ Muvareremedze kakuru murudo ngendaa yemushando wavo. Iwai vanekunyarara pakati penyu. ¹⁴ Tinomukumbirawo, hama, pangai avo vane nungo, gwinyisai avo vane mwoyo inodemera, detserai avo vakarembedzeka, sengererai kwavari veshe. ¹⁵ Ngwarai kuti pasazoapo naumwe unounzidzira zvakashata kumunhu ngendaa yezvakashata, asi ngenguva dzeshe tsvakai kuita zvakanaka, umwe kwoumweni nokwavari veshe. ¹⁶ Dakarai nguva dzeshe. ¹⁷ Kumbirai ngokusikareki. ¹⁸ Bongai pazviro zveshe; ngokuti ichi chiri kuda kwaMwari muna Kristu Jesu kwomuri. ¹⁹ 9 Musadzima Mweya. ²⁰ Musashoora mazwi akaprofetwa. ²¹ Asi edzai zviro zveshe; batisisai izvo zvakanaka. ²² Swederai miemo yezveshe zvakashata. ²³ Mwari wekunyarara emene ngaamuchenese kakuru; mweya wenyu nemwoyo nemuiri ngazvingwarirwe kukuru, zvisina ndaa pakuuya kwaMambo wedu Jesu Kristu. ²⁴ Uwo wakamudaidza unogondeka, naye unozozviita. ²⁵ Hama, tikumbirirei. ²⁶ Chingamidzai veshe vatendi ngemuromo ngokucheneswa. ²⁷ Ndinomupanga kukuru ndiMambo kuti iyi tsamba idzidzwe kuhama dzeshe. ²⁸ Nyasha dzaMambo wedu Jesu Kristu ngadzigare nemwi.