¹ Andizi kusunguka here? Andisiri mupostori here? Andizi kuona Jesu Mambo wedu here? Imwimwi amusiri mushando wangu munaMambo here? ² Kudai ndisiri mupostori kunevamweni, zvakanyadaro kwomuri ndiri mupostori, ngokuti imwimwi muri chioniso choupostori wangu munaMambo. ³ Uku ndikwo kudzirwira kwangu kwavari vanonditonga. ⁴ Atitenderwi here kuti tirhe nekumwa? ⁵ Atitenderwi here kuhamba murwendo rwedu tine mukadzi mutendi, kudaiwo ngevamweni vevapostori nehama dzaMambo naKhefasi? ⁶ Nokuti inini ndega naBhanabhasi, atitenderwi here kurekera kudzishandira? ⁷ Ndiani mujoni unoshanda mushando woujoni ngemare yake? Ndiani unosima munda wemivhini, asikadyi michero yawo? Ndiani unousha zvifuyo, asikadyi mukaka wazvo? ⁸ Ndinoreketa izvi here ngomushuma wevanhu? Mupango aironziwo kudaro here? ⁹ Ngokuti kwakanyorwa muMupango yaMosi kuti: “Usazosungira pamuromo wen'ombe apo inopura zviyo.” In'ombe here yaanopinimidza ndiyo Mwari? ¹⁰ Nokuti aareketi ngendaa yedu tega here? Eya, zvakanyorwa ngendaa yedu, ngokuti uwo unorima unosisira kuti arime echigonda, nouwo unopura, unosisira kuti apure echigonda kuashira. ¹¹ Kudai isusu takakusha kwomuri zviro zveMweya zvakanaka, indaa huru here kudai techizokukura zviro zvenyu zvenyika? ¹² Kudai vamweni vanouku kutenderwa padera penyu, kunozopinda kwakaitawani kwetiri isusu? Kunyazwi atizi kushandisa uku kutenderwa, asi tinosengerera zviro zveshe kuti tisazopinga vhangeri raKristu. ¹³ Amuzii here kuti avo vanoshanda pane zvakacheneswa, vanorha kwezviro zvomutemperi? Naavo vanoshandira pamaarita, vane zvikoaniswa zvavo zvepaarita? ¹⁴ Ngokudaro Mambo wakapanga kuti avo vanochumaira vhangeri, vapone ngezvevhangeri. ¹⁵ Asi inini andizi kushandisa chimwe cheizvi zviro. Nokuti andizi kunyora izvi kuti zviitirwe kwendiri, ngokuti zvirinane kuti ndife, pane kuti munhu aite kuti kuganza kwangu kuitwe kusina shwiro! ¹⁶ Ngokuti kudai ndechichumaira vhangeri, andina chiro chokuganza ndicho, ngokuti ndamanikidzwa. Ngokuti indaa kwendiri kudai ndisikachumairi vhangeri! ¹⁷ Ngokuti kudai ndechiita izvi ngokuda kwangu, ndinoona mubairo; asi kudai ndechizviita ngokusikada kwangu, ndino ungwariri hunogondwa kwendiri. ¹⁸ Ndizvo mubairo wangu ngoweyi? Izvi zvega, apo ndechichumaira vhangeri, ndichumaire vhangeri ngenyasha, kuti ndisashandisa kweshe kutenderwa kwangu muvhangeri. ¹⁹ Ngokuti kunyazwi ndaiga ndiri wakasunhurika kunevanhu veshe, ndakadziisa pashi muusungwa kwavari veshe, kuti ndiuyirwe ngevakapinda kuwanda. ²⁰ KuvaJudha, ndakaita kudai ngomuJudha, kuti ndiuyirwe ngavaJudha. Kwavari vari pashi peMupango, ndakaita kudai ngouri pashi peMipango, kunyazwi ndisiri pashi peMupango ndemene, kuti ndiuyirwe ngaavovari pashi peMupango. ²¹ Kwavari vasina Mupango ndakaita kudai ndivo vasina Mupango, (kunyazwi andizi kusunhurika kubva kuMupango yaMwari, asi ndiri pashi peMupango yaKristu,) kuti ndiuyirwe ngaavo vasina Mipango. ²² Kwavari vakarembedzeka, ndakaita wakarembedzeka, kuti ndiuyirwe ngevakarembedzeka. Ndakaita zviro zveshe kuvanhu veshe, kuti ngenjira dzeshe ndiponese vamweni. ²³ Neni ndinoita izvo zveshe ngendaa yevhangeri, kuti ndionewo chikoaniswa muzvifumiso zvaro. ²⁴ Amuzii here kuti avo vanorumba mujaho, vanorumba veshe, asi ndiumwe unoashira muthuso? Nokudaro rumbai imwimwi kuti muuashire. ²⁵ Mutambi weshe wemutambo unodzibata muzviro zveshe. Unoita kudaro kuti aashire dzungudza rinoora. Asi isusu tinoashira risikaori. ²⁶ Ndizvo inini andirumbi kudai ngomunhu usikazii nokuti kuambana kudai ngounoambana nedutu; ²⁷ asi ndinoponda muiri wangu, ndechiuisa muuranda, kuti ngesure ndapedza kuparidzira kunevamweni, inini pachangu ndiite unorashwa.