¹ Zvino ngendaa yezviro zvinopirwa kumiedzaniso yokudira, tinozia kuti, “Teshe tinakwo kuzia.” Kuzia kunopara kudzikudza, asi rudo runoaka. ² Kunyazwi ndiani unopinimidza kuti unozia chiro, ena asati aanakwo kuzia kunodikanwa. ³ Asi munhu weshe unoda Mwari, unoziikanwa ndiye. ⁴ Ndizvo ngendaa yokudya izvo zvinopirwa kumiedzaniso, tinozia kuti, “Akuna muedzaniso munyika unopona,” nokuti, “Akuna Mwari umweni, asi umwe.” ⁵ Ngegwinyiso kunyazwi zvinyaripo zvinodaidzwa kuti zvimwari, mudenga nokuti munyika; kudai ngezvezviripo zvimwari zvizhinji nemadzimambo majinji, ⁶ asi kwetiri uripo Mwari umwe, ndivo Baba, zviro zveshe zviripo zvinobva kwaari, nesu tiripo ngokuda kwake, naMambo umwe Jesu Kristu, kubudikidza ndiye zviro zveshe zviripo, nesu kubudikidza ndiye tiripo. ⁷ Asi veshe avana kuzia uku. Ngokuti vamweni vechirovedzera kumuedzaniso metsa zvino, vachandopinimidza ngokudya kwevanodya kudai ngechiro chinopirwa kunemuedzaniso wokudira; nemhumba yavo isina simba inosvipiswa. ⁸ Asi kurha akuzotiunzi pamberi paMwari. Kunyazwi techirekera kurha, atiiti vakapinda kushata, kunyazwi techirha, atiiti vakapinda kunaka. ⁹ Asi ngwarai kuti kunyazwi ngeiri njira, uku kusunhurika kwenyu kusaita chipumhuniso kwavari vasina simba. ¹⁰ Ngokuti kudai munhu echizokuona iwewe unokuzia, wechidya mutemperi romuedzaniso wokudira, aizogwinyiswi here mhumba yake, isina simba, kurha zviro zvakapirwa kumiedzaniso yokudira? ¹¹ Ndizvo ngekuzia kwako ena asina simba unofa, hama iyo yaakafira Kristu. ¹² Ngekudaro apo pounoshaishira hama dzako nokuremadza mhumba yadzo isina simba, unoshaishira Kristu. ¹³ Ndizvo kudai chokudya chechiita kuti hama yangu iwe, andizodyi nyama mhera nariini, kuti ndisazoita kuti hama yangu iwe.