¹ Nemaererano ngeizvo zvemwakanyora: “Zvakanaka kuti munhu asagwama mukadzi.” ² Asi, ngendaa dzokuomba, munhu weshe ngaano mukadzi wake, nomukadzi weshe ngaano mwamuna wake. ³ Mwamuna ngaape kumukadzi wake izvo zvinomufanira, ngekudaro mukadzi ngaape kumwamuna wake. ⁴ Mukadzi aana simba rekutonga padera pomuiri wake, asi mwamuna. Ngokudarozve mwamuna aana simba rekutonga padera pemuiri wake, asi mukadzi. ⁵ Musanyimana, asi mwechiita ngekutenderana kwenguva, kuti mudzipire mukukumbira, mworomwozo kwambatirana, kuti Sathani asamuedza ngendaa yokutama simba kwenyu rekudzibata. ⁶ Asi ndinoronza izvi kumutendera, haiwa kumupanga. ⁷ Asi ndinoda kuti vamuna veshe vadai ndini. Asi munhu weshe unechipo chake chakaparadzana chinobva kunaMwari, umwe chembeu iyi noumweni chembeu imweni. ⁸ Asi ndinoti kwavari vasikazi kuroora, nokunevari shirikadzi, zvakanaka kwavari kudai vechigara kudai ndini. ⁹ Asi kuti vasina simba rekudzibata, ngavaroore, ngokuti kwakapinda kunaka kuroora kuno kutswa ngokuemura. ¹⁰ Kwavari vakaroora, ndinovapanga, asi andinipi, asi ndiMambo, kuti, “Mukadzi asaparadzana nemwamuna wake.” ¹¹ Asi kudai iye echiparadzana naye, ngaagare asikazi kuroorwa, nokuti ngaaiyaniswe nomwamuna wake zve, kuti mwamuna asazoramba mukadzi wake. ¹² Asi kunevamweni ndinoronza inini, haiwa Mambo. Kudai aripo mutendi, uno mukadzi usikatendi, nomukadzi uwo echitenda kugara naye, asamuramba. ¹³ Nemukadzi uno mwamuna usikatendi nomwamuna echitenda kugara naye, asamuramba. ¹⁴ Ngokuti mwamuna usikatendi unocheneswa kubudikidza ngomukadzi, nomukadzi usikatendi unocheneswa kubudikidza ngomwamuna. Dai zvisikazi kudaro, vana venyu vaizodai vasikazi kucheneswa, asi zvino vakacheneswa., ¹⁵ Asi kudai usikatendi echida kuenda, ngaaende. mutendi mwamuna nokuti mukadzi aazi kusungwa mundaa dzakadaro. Ngokuti Mwari wakatidaidzira kunyarara.16 ¹⁶ Iwewe mukadzi, unozia ngenyi kuti unozoponesa mwamuna wako? Iwewe mwamuna, unozia ngeyi kuti unozoponesa mukadzi wako? ¹⁷ Munhu weshe ngaapone dai ngezvaakamukoanisira Mambo, nokuneizvo zvaakamudaidzira Mwari. Ndizvo zvendinopanga kuzviara zveshe. ¹⁸ Uripo here panguvayo munhu wakadaidzwa akachekwa? Asazoita kuti chioniso chokuchekwa chiduswe. Uripo here panguvayo wakadaidzwa asikazi kuchekwa? Asachatsvaka kuchekwa. ¹⁹ Kuchekwa chiro chisina shwiro, nokusikachekwa chiro chisina shkwiro, kwega kungwarira Mupango yaMwari. ²⁰ Munhu weshe ngaagare mukudaidzwa kwaakadaidzwa kwokuri. ²¹ Wakadaidzwa here uri hloko? Usakaruka ndizvo. Asi dai ungasunuguka, ita zvakanaka. ²² Ngokuti uwo wakadaidzwa kunaMambo ari hloko, uri wakasunungurwa waMambo. Ngokudaro uwo wakadaidzwa ari wakasununguka, uri hloko yaKristu. ²³ Imwimwi mwakatengwa ngomutengo; musaita hloko dzevanhu. ²⁴ Hama, munhu weshe mukudaidzwa kwaakadaidzwa ndikwo, ngaagarepo pamberi paMwari. ²⁵ Hino ngemaererano ne avo vasati vakamborora, andina chironzo chaMambo. Asi ndinoronza kupinimidza kwangu, kudai ngouwo wakaitirwa nyasha ndiMambo kuita unogondeka. ²⁶ Ndizvo ndinopinimidza kuti zvakanaka, ngendaa yokutambudzika kuripo, kuti munhu agare kudai ngezvaari azvo. ²⁷ Wakasungirwa pamukadzi here? Usatswaka kusununguka. Wakasunungurwa here kubva pamukadzi? Usatswaka kuroora. ²⁸ Asi kudai waroora, auzi kushaisha. Nekuti dai mhandwe yaroorwa, aizi kushaisha. Asi vakadaro vanozoa nokutambudzika munyika, asi inini ndinoda kumungwadza. ²⁹ Asi ndinoronza izvi, hama, nguva idoko, kuti kubvira zvino, veshe avo vane vakadzi vaite kudai ngevasina; ³⁰ naavo vanochema, kuti vaite kudai ngevasikachemi; naavo vanodakara, vaite kudai ngevasikadakari; naavo vanotenga, vaite kudai ngevasikazi kuganya; ³¹ naavo vanoshandisa zvomunyika, vaite kudai ngevasikanyanyi kuzvishandisa, ngokuti muemo wenyika ino unopinda. ³² Asi ndinoda kuti imwimwi muite vasina zvokudembatemba. Murume usikazi kuroora unobatika ngezviro zvaMambo, ngenjira yaangamudakadza ndiyo Mambo. ³³ Asi uwo wakaroora, unobatika ngezviro zvomunyika, ngenjira yaangamudakadza ndiyo mukadzi wake. ³⁴ NEkudisisa kwake kwakapaurwa. Uwo usikazi kuroorwa nemhandwe unobatika ngezviro zvaMambo, kuti aite wakacheneswa zveshe muiri nEmweya. Asi uwo wakaroorwa unobatika ngezviro zvenyika, ngenjira yaangadakadza ndiyo mwamuna wake. ³⁵ Ndinoronza izvi kwomuri kuti mudetserwe, haiwa kuteya murau padera penyu, asi kuti zviitwe ngenjira inosisira, kuti mubatirire kunaMambo musikakangaidzwi. ³⁶ Asi kudai ngevakagondisana kuti aripo munhu unopinimidza kuti unoita zvisikasisiri kunemhandwe yake, yabva muzero, nokudai kwechisisira kudaro, echida kuroora. Asashaisha; ngavaroore. ³⁷ Asi iye unoema akagwinya mumwoyo mwake, asina chinomuangiridza, asi unesimba padera pokuda kwake, naye wakadziemesera mumwoyo mwake kuti unozongwarira mhandwe yake, unoita zvakanaka 38 ³⁸ Ndizvo, uwo unoroodza mhandwe yake kuti iroorwe unoita zvakanaka; nouwo usikairoodzi, unoita zvakapinda kunaka. ³⁹ Mukadzi unosungirwa kumwamuna wake nguva yeshe yaanopona mwamuna wake. Asi kuti mwamuna afa, wasununguka kuti aroorwe ngowaanoda, kwega ngenjira yaMambo. ⁴⁰ Asi unopinda kudakara kudai echindogara akadaro. Uku ndikwo kupinimidza kwangu. Ndinofunga kuti ndine Mweya waMwari.