¹ Uripo here unendaa kune umweni, unoshinga kuenda koomangara pamberi pevasikazi kutendeka, asikaendi pamberi pevakacheneswa? ² Imimi amuzii here kuti vakacheneswa vanozotonga nyika? Kana nyika inozotongwa ndimwi, amukoni here kutonga ndaa dzakatsonga? ³ Amuzii here kuti tinozotonga ngirosi? Kuna zwiro zwijinji zvokupona! ⁴ Ndizvo kudai munendaa dzekugura dzekupona, ngei mechiisa pamberi pavo nhaya idzo kuita vatongi vasina chimiro kwacho muchiara? ⁵ Ndinoreketa izvi kuti ndimutsverudze. Chiri gwinyiso here kuti apana naumwe munhu wakangwara pakati penyu, ungakona kugura ndaa pakati pehama dzake. ⁶ Asi mutendi unomangarira mutendi umweni wake, izvi zvino gadzwa pamberi me mutongwe asikatendi! ⁷ Ndizvo ngegwinyiso dziripo ndaa pakati penyu, kuti munomangarirana umwe noumweni kuronza kukorera kwenyu. Amutendi ngenyi kushaishirwa? Amutendi ngenyi kubirwa? ⁸ Asi imwimwi munoshaisha mwemene nokubirana, nokuna vatendi ngokudaro. ⁹ Amuzii here kuti vasikazi kururama avazogari nhaka youmambo waMwari? Musachengedzerwa! Akunavasvinuki, vadiri vemuedzaniso, vaombi, vashaishi, vanoshanja nevamuna, ¹⁰ mbavha, vaemuri,varadzi, vatuki, vanoba, avatongozogari nhaka youmambo waMwari. ¹¹ Nevamweni venyu vaiya vakadaro. Asi mwakashambwa nokucheneswa nokupembedzwa, muzita raMambo Jesu Kristu, muMweya waMwari wedu. ¹² “Zviro zveshe zvinotenderwa kwendiri,” asi andizvopi zviro zveshe zvinondinakira. “Zviro zveshe zvinotenderwa kwendiri,” asi andizonyiswi ngechiro nachimwe. ¹³ “Kurha ngekwendani, nendani ngeyokurha.” Asi Mwari unozoparadza zveshe chimwe ngachimwe. Muiri ausiri wokuomba akadi, asi ngowaMambo naMambo ngowomuiri. ¹⁴ Mwari wakamusa Mambo naye unozotimusawo ngesimba rake. ¹⁵ Amuzii here kuti miiri yenyu inhengo dzaKristu? Ndizvo ndinozotora here nhengo dzaKristu ndidziite nhengo dzemhombwe? Haiwa! ¹⁶ Amuzii here kuti uwo unokwambatirana nemhombwe, unoita muiri umwe nayo? Ngokuti wakati, “Vairi vanozoita nyama imwe.” ¹⁷ Asi ena wasunganidzwa naMambo unoita mweya umwewo naye. ¹⁸ Tizai kuomba! Chishaishi cheshe chaanoita munhu chiri ngekubanze kwomuiri; asi ena unoomba unoshaishira muiri wake. ¹⁹ Amuzii here kuti muiri wenyu itemperi yeMweya Wakachena uri mukati mwenyu, womwakaashira kubva kunaMwari, nemwi amuchiri venyu? ²⁰ Ngekuti imwimwi mwakatengwa ngemutengo. Ndizvo kudzai Mwari mumiiri yenyu.