¹ Kunozwika kuti kuripo kuomba pakati penyu, nokuomba kwakadaro apana pakati pevemadzinza; kwokuti munhu unotora mukadzi wababa ake. ² Nemwi munodzikudza! Amusisiri kubonda here, kuti uwo wakaita uku kushata aduswe pakati penyu? ³ Ngokuti inini ngegwinyiso ndisinyaripo nge muiri, asi ndiripo ngemweya; nazvino kudai ngouripo ndatomutonga munhu uwo wakaita icho chiro. ⁴ imwimwi mukaungana pamwepo muzina raMambo wedu Jesu, nomweya wangu uripo nesimba raMambo wedu Jesu, ⁵ munozopira munhu uyu kunaSathani kuti aparadzwe nyama, kuti mweya wake uponeswe ngezuva raMambo Jesu. ⁶ Kudziganzisa kwenyu akusi kunaka. Amuzii here kuti zvimumera zvishomanani zvinofemisa hlama yeshe? ⁷ Dusai mumera wekare, kuti muite hlama itsva, kudai ngezvomuri vasina mumera. Ngokuti Kristu gwai rePhasika redu wakabairwa kuita mudiro. ⁸ Ndizvo ngatingwarire mussangano wedhiri, haiwa ngomumera wekare, nokuti ngomumera wekururu nowokushata, asi ngechingwa chisina mumera, chokugondeka nechegwinyiso. ⁹ Ndakanyora kwomuri mutsamba yangu kuti musazwanana nevanoomba. ¹⁰ Izvi azvironzi vanoomba venyika iyi, nokuti vanoemura, nokuti mbavha, nokuti vanodira miedzaniso, ngokuti mukadaro, kukuda kuti mubve munyika. ¹¹ Asi zvino ndinonyora kwomuri kuti musazwanana nemunhu unozwi mutendi, kudai ari muombi, nokuti muemuri, nokuti mudiri wemiedzaniso, nokuti mutuki, nokuti chiradza, nokuti mupambi; nemunhu wakadaro. Haiwa, musarha naye. ¹² Ngokuti ndinenyi kuti nditonge avo vari vokubanze? Amutongi here avo wemukati? ¹³ Asi avo vokubanze Mwari unozovatonga. “Budisai munhu uwo wakashata kuti abve pakati penyu.”