¹ Munhu ngaapinimidze tisu kuti tiri vashandi vaKristu nevangwariri vezvakafishika zvaMwari. ² Kuneizvi kunotsvakisiswa kunemungwariri kuti aite unogondeka. ³ Asi kwendiri chiri chiro chidoko kuti nditongwe ndimwi nokuti ngokutonga kwomunhu. Asi inini andidzitongi pachangu. ⁴ Ngokuti andizii chiro chinondiitira ndaa pachangu, asi andipembedzwi ngeichi. Asi uwo unonditonga ndiMambo. ⁵ Ndizvo musatonga chiro nguva isati yaguma, Mambo asati auya, uwo unozounza mukujeka zviro zvakafishika zvechidima, naye uchabudisa pamhene mipinimidzo yomwoyo. Apo munhu weshe unozoashira kukudzwa kwake kunobva kunaMwari. ⁶ Inini ndakaedzanisa muedzaniso uyu kwendiri nokuna Aporosi ngendaa yenyu, hama, kuti mudzidze kubudikidza tisu biningidzo reizvo zvakanyorwa zvinoti: “Musapinda zvakanyorwa,” kuti kusazoapo naumwe wenyu unodzitunhumadza kurwisana umwe kunoumweni. ⁷ Ngokuti ndiani unokuita wakapinda vamweni? Unenyi chousikazi kuashira? Asi kuti wakachiashira, unoganza ngenyi, kudai ngousikazi kuchiashira kudai ngechipo? ⁸ Mava nazvo zweshe zwamaida. Mwaganya! Mwakaita madzimambo tisiripo! Ngegwinyiso ndingada kuti muite madzimambo kuti isusuwo tiite madzimambo nemwi. ⁹ Ngokuti ndinopinimidza kuti Mwari wakatiemesa isusu vapostori tiri vokugumisira kwavari veshe, kudai ngevanhu vakatongerwa rufu. Ngokuti takaitwa vokuringirwa kunyika, kungirosi nekunevanhu. ¹⁰ Tiri mapenzi ngendaa yaKristu, asi imwimwi muri vakangwara munaKristu. Isusu takarembedzeka, asi imwimwi mwakagwinya. Imwimwi munakwo kureredzwa, asi isusu atireredzwi. ¹¹ Metsa kuguma awa iri tine nzara nenyota, tiri mititinini, tinopamhadzwa, tiri vapepesheki. ¹² Tinotambudzika, techishanda ngenyara dzedu. Techitukwa, tinofumisa, apo techitambudzwa, tinoshingirira. ¹³ Apo techireiwa, tinoiyanisa. Takaitwa vakadai ngemarara enyika, tiri makoko ezviro zveshe. ¹⁴ Andinyori izvi zviro kumunyadzisa, asi kuti ndimupange kudai ngezvomuri vana vanodikanwa. ¹⁵ Ngokuti kunyazwi mungaane vadzidzisi vari makumi emazana gumi munaKristu, amuna madzibaba akawanda. Ngokuti munaKristu Jesu inini ndakamubara kubudikidza ngevhangeri. ¹⁶ Ndizvo ndinomupota, itai vanondiedzerera., ¹⁷ Ngendaa iyi ndakatumira kwomuri Thimothi, mwana wangu unodikanwa nounogondeka munaMambo, ena unozomuedzurira njira dzangu munaKristu, kudai ngezvendinodzidzisa kundau dzeshe muzviara zveshe. ¹⁸ Asi vamweni venyu vanodzikudza vechipinimidza kuti andiuyiyo kwomuri. ¹⁹ Asi ndinozouya kwomuri ngokukasira, kudai Mambo echitenda, neni ndinozozia, haiwa ngeizkwi raavo vanodzikudza, asi ngesimba ravo. ²⁰ Ngokuti umambo hwaMwari andiwopi weizwi, asi wesimba. ²¹ Munodeyi? Ndinozouya kwomuri nendonga here nokuti nerudo nemweya wakapfaa?