¹ Asi inini, hama, ndainga ndisikakoni kureketa komuri kudai ndivo voMweya, asi kudai ndivo venyama, kudai ngevana vadoko munaKristu. ² Ndakamupa mukaka, haiwa kudya kwakagwinya, ngokuti mwainga musati mwakona. Haiwa, kunyazwi nazvino, amusati mwakona. Ngokuti muchiri wenyama ³ Ngokuti kwechioneka kuti kuripo pakati penyu ndurumwa nehasha, amurivopi here venyama, mwechihamba ngomuitiro wevanhu? ⁴ Ngokuti apo umwe unoti, “Inini ndiri waPhauri,” noumweni unoti, “Inini ndiri waAporosi,” amuri vanhupi here? 5 ⁵ Ndizvo Aporosi uri anani? NaPhauri uri anani? Varanda vemwakatenda kubudikidza ndivo, umwe ngaumwe kudai ngezvaakapuwa ndiMambo. ⁶ Inini ndakasima, Aporosi wakadiridzira, asi Mwari wakameresa. ⁷ Ndizvo andiyepi unosima uri chiro, nokuti unodiridzira, asi ndiMwari ega unomeresa. ⁸ Uwo unosima nouwo unodididzira chiro chimwe, asi umwe ngaumwe unozoashira mubairo wake, kudai ngemushando wake. ⁹ Ngokuti tiri vashandi pamwepo naMwari; imwimwi muri munda waMwari. Imwimwi muri mhatso yaMwari. ¹⁰ Kudai ngenyasha dzaMwari dzakapuwa kwendiri, kudai ngomuaki uri ngwazi newakangwara ndakaisa tsikiro, asi umweni unoaka padera paro. Muaki umwe ngaumwe ngaangware ngenjira yaanoaka ndiyo padera paro. ¹¹ Ngekuti akuna naumwe ungaaka tsikiro rimweni, kwega iro rakaakwa, tsikiro iro ndiJesu Kristu. ¹² Asi kudai munhu echiaka padera peiro tsikiro, ngomukore, sirivha, mapuwe anomutengo mukuru, mimbiti, mwenje, mahlanga, ¹³ mushando wemunhu weshe unozooniskwa, ngekuti zuva iro rinozouonisa, ngokuti unozooniskwa ngemuriro, nemuriro wemene unozoedza mushando wemunhu weshe kuti wakadini. ¹⁴ Asi kudai mushando wemunhu nokuti ngouri wechizotsima waakaaka padera paro, ena unozoashira mushando. ¹⁵ Kudai mushando womunhu nokuti ngouri wechizopiskwa, ena unozorashikirwa ndiwo, asi muaki emene unozoponeskwa, asi kufanana ngeuno tiza ngepamuriro. ¹⁶ Amuzii here kuti imwimwi muri temperi yaMwari nekuti Mweya waMwari unogara mukati mwenyu? ¹⁷ Kudai munhu kunyazwi ndiani echishaishira temperi yaMwari, Mwari unozomushaishirawo. Ngokuti temperi raMwari rakachena, ndimwi. ¹⁸ Munhu asadzichengedzera pachake. Kudai munhu echipinimidza kuti wakangwara pakati penyu paneiyi nguva, ngaaite benzi, kuti aite wakangwara. ¹⁹ Ngokuti ungwaru hweiyi nyika upenzi kunaMwari. Ngokuti kwakanyorwa kuti, “Unobata vakangwara muurimbwi hwavo.” ²⁰ Zve unoti, “Mambo Mwari unozia mikarakadzo yevakangwara kuti iri isina shkwiro.” ²¹ Ndizvo munhu asaganza ngevanhu. Ngokuti zviro zveshe ngezvenyu, ²² kunyazwi Phauri nokuti Aporosi nokuti Khefasi nokuti nyika nokuti kupona nokuti rufu nokuti zviro zviripo nokuti zviro zvichazouya. Zveshe ngezvenyu ²³ Nemwi muri vaKristu, naKristu ngewaMwari.