¹ Apo pendakauya kwomuri, hama, ndechichumaira chakafishikachaMwari, andizi kushandisa mazwi makuru nokuti ungwaru wakakura. ² Ngokuti ndakadziemesera kuti andizozii chiro pakati penyu kwega Jesu Kristu, uwo wakakohomerwa. ³ Neni ndakauya kwomuri ndakarembedzeka, ndechitka, ndechihuta kakuru. ⁴ Mazwi angu nokuchumaira kwangu kwaiya kusina mazwi okukoka oungwaru, asi mukuoniswa kwoMweya nokwesimba, ⁵ kuti kugonda kwenyu kusazotseama muungwaru hwevanhu, asi musimba raMwari. ⁶ Asi pakati pevabva muzero tinoreketa ungwaru, kunyazwi usiri ungwaru weiyi nyika nokuti wevatongi veiyi nyika, avo vanopera. ⁷ Asi tinoereketa ungwaru waMwari, wakafishika, wakafishwa, uhwo Mwari waakaemesa karetu nyika isati yasikwa, kuita uthende wedu. ⁸ Apana naumwe wevatongi weiyi nyika wakazkwisisa izvi; ngokuti dai vakazwisisa, vaizodai vasikazi kukohomera Mambo wouthende. ⁹ Asi kudai ngezvakanyorwa kuti, “Izvo zvisikazi kuoneka ngemadziso nokuti kuzwika ngenzee nokuti zvisikaziikanwi mumwoyo mwevanhu, izvo ndizvo zvaakanasirira Mwari kwavari vanomuda.” ¹⁰ Zviro izvi Mwari wakazvionisa kwetiri kubudikidza ndiMweya. Ngokuti Mweya unotsvakisisa zveshe, kunyazwi noudzamu hwaMwari. ¹¹ Ngokuti ndiani munhu unozia zvomunhu, kwega mweya womunhu uri mukati mwake? Ngokudarozve akuna unozwisisa zvaMwari, kwega Mweya waMwari. ¹² Asi isusu atizi kuashira mweya wenyika, sekuti Mweya unobva kunaMwari, kuti tizwisise zvipo zvakapuwa kwetiri ndiMwari. ¹³ Tinoreketa ngezviro izvi ngemazwi, haiwa akadzidziswa ngoungwaru wevanhu, asi ngemazwi akadzidziswa ndiMweya, mukududzira gwinyiso reMweya kwavari veMweya ¹⁴ Asi munhu wenyama aashiri zviro zveMweya waMwari, ngokuti zviri upenzi kwaari, naye aakoni kuzvizwisisa, ngokuti zvinotongwa ndiMweya. ¹⁵ Asi uwo weMweya unotonga zviro zveshe, asi ena emene aatongwi ngemunhu. ¹⁶ “Ngokuti ndiani wakazia mupinimidzo waMambo Mwari kuti amupange?” Asi isusu tinayo pfungwa yaKristu.