¹ Andidi kuti muite vasikazii, hama, kuti madzibaba edu eshe aiya pashi pegore, navo veshe vakaambuka ruandhle. 2 ² Navo veshe vakabhabhatidzwa munaMosi mugore nomuruandhle, ³ navo veshe vakadya kudya kumwekwo kwomweya, ⁴ navo veshe vakamwa kumwa kumwekwo kwomweya. Ngokuti vakamwa kubva pabuwe romweya rakavateera, nebuwe iro rainga Kristu. ⁵ Asi Mwari aazi kudakadzwa ngevajinji vavo, ngokuti vakapedzwa mushango. ⁶ Zviro izvi zvinoita zvionero zvedu kuti isusu tisazoemura zvakashata, kudai ngezvakaemura avo. ⁷ Musazoita vanodira miedzaniso, kudai ngezvakaitwa ngevamweni vavo; kudai ngezvakanyorwa kuti: “Vanhu vakagara pashi kudya nokumwa, vakamirukazve kutamba.” ⁸ Atisisiri kudzipinza mundaa dzokuomba kudai ngezvevakaita vamweni vavo, vakauraiwa ngezuva rimwe vanhu makumi mairi namatatu emakumi emazana. ⁹ Atisisiri kuedza Kristu, kudai ngezvavakamuedza vamweni vavo, navo vakapedzwa ngenyoka. ¹⁰ Nemwi musazovhuruvhuta kudai ngezvevakavhuruvhuta vamweni vavo, navo vakapedzwa ngoMuurayi. ¹¹ Asi izvi zviro zvakaitwa kwavari kuita zvionero. Nazvo zvakanyorwa kuti zvitingwadze, isusu tagumirwa ngokupera kwenyika. ¹² Ndizvo ena unokarakadza kuti unoema, ngaangware kuti asazowa. ¹³ Akuna kuedzwa kwakamugumira ukwo kusikazi kugumira vanhu vamweni. Mwari unogondeka, naye aazotendi kuti muedzwe kupinda simba romunaro, asi pakuedzwa unozomunasirirazve njira yokupokonyoka ndiyo, kuti mukone kuwa nesimba rokushingirira. ¹⁴ Ndizvo, vanodikanwa vangu, tizai kubva mukudira miedzaniso. ¹⁵ Ndinoita kudai ngounoereketa kunevakangwara; pinimidzai pachenyu zvendinoronza. ¹⁶ Tsani yokubonga, yetinobonga ndiyo, andiyopi yokuiyana mungazi yaKristu here? Chingwa icho chetinogura, andichopi chokuiyana mumuiri waKristu here? ¹⁷ Ngokuti pane chingwa chimwe, isusu tinyari vajinji, tiri muiri umwe. Ngokuti isusu teshe tinorha chingwa chimwe. ¹⁸ Ningirai vaIsuraeri vari venyama. Avo vanorha midiro inopirwa, avana kuiyana here nearita? ¹⁹ Ndirikureketei zvino? Ndinozoronza here kuti chiro chakapirwa miedzaniso yokudira chine shwiro nokuti muedzaniso chiro chine shkwiro? ²⁰ Asi izvo zviro zvevanopira, vanozvipira kunemadhimoni, haiwa kunaMwari. Neni andidi kuti muiyane nemadhimoni. ²¹ Amungamwi kubva kunetsani yaMambo nokutsani yemadhimoni. Amukoni kudya kubva patafura raMambo nepatafura remadhimoni. ²² Nokuti isusu tinoda kumusa ndurumwa yaMambo here? Isusu takagwinya kumupinda here? ²³ “Zviro zveshe zvinotenderwa,” asi andizvopi zviro zveshe zvinodetsera. “Zviro zveshe zvinotenderwa,” asi andizvopi zviro zveshe zvinoaka. ²⁴ Kusazoapo munhu unodzitsvakira zvake, asi zvoumweni. ²⁵ Idyai cheshe chinotengeswa pamusika wenyama, musikabvunzi mubvunzo ngendaa yemhumba. ²⁶ Ngokuti, “Nyika ngeyaMambo Mwari, nazvo zveshe zvirimwo.” ²⁷ Kudai umwe weavo vasikatendi echimukoka koorha, nemwi mwechida kuenda, idyai cheshe chinoiswa pamberi penyu, musikabvunzi mubvunzo ngendaa yemhumba. ²⁸ Asi kudai aripo munhu unozoti kwomuri, “Ichi chakapirwa kune muedzaniso yokudira,” musachirha, ngendaa youwo wachironza kwomuri, uye ngendaa yemhumba. ²⁹ Andironzi ngendaa yemhumba yako, asi ngendaa yemhumba youmweni, ngokuti kusunhurika kwangu kunotongwa ngenyi ngemhumba youmweni? ³⁰ Kudai ndechirha ndechibonga, ngeyi ndechitukwa ngendaa yeizvo zvendinobonga? ³¹ Ndizvo kunyazwi mwechirha nokuti mwechimwa, kunyazwi chiinyi chomunoita, itai zveshe mukukudza Mwari. ³² Musapumhunisa vaJudha nokuti vaGiriki nokuti chiara chaMwari. ³³ kudai ndiniwo ndinoedza kudakadza vanhu veshe ngezviro zveshe zvendinoita, ndisikatsvaki kuuyirwa kwangu, asi kuuyirwa kwevajinji, kuti vaponeswe.