¹ Ivai vatedzereri vangu, kudai ndini ndiri mutedzereri waKristu. ² Zvino ndinomuirikidza ngokuti munondikarakadza ngezviro zveshe nokubatirira kuzviemeso kudai ngezvendakazvipira kwomuri. ³ Asi ndinoda kuti muzie kuti Kristu ndiye soro remunhu weshe, nomwamuna ndiye soro remukadzi wake, naMwari ndiye soro raKristu. ⁴ Tchero mwamuna unokumbira nokuti kuprofeta anesoro rakafukidzwa, aareremedzi soro rake. ⁵ Asi mukadzi weshe unokumbira nokuti kuprofeta anesoro rake risikazi kufukidzwa, aareremedzi soro rake, ngokuti kudai zvakadaro, zvakatodzana nokuparwa soro rake. ⁶ Ngokuti kudai mukadzi asikazi kudzifukidza pachake, ngaagundwe bvudzi rake. Asi kudai zvechidanisa kuti mukadzi agundwe nokuti kuparwa, ngaafukidze soro rake. ⁷ Ngokuti azvifaniri kuti mwamuna afukidze soro rake, ngokuti ena muedzaniso nouthende waMwari. Asi mukadzi ndiye uthende wemwamuna. ⁸ Ngokuti mwamuna aazi kubva kumukadzi, asi mukadzi wakabva kumwamuna. ⁹ Ngokuti mwamuna aazi kusikirwa mukadzi, asi mukadzi wakasikirwa mwamuna. ¹⁰ Ngeiyi ndaa kunosisira kuti mukadzi afukidze soro rake kuonisa kuti uri pashi pesimba remwamuna wake ngendaa yengirosi. ¹¹ Zvakanyadaro mukadzi aari ngekubanze kwomwamunapi, nokuti mwamuna aari ngekubanze kwomukadzipi kunaMambo. ¹² Ngokuti kudai ngomukadzi wakabva kuno mwamuna, ngokudaro mwamuna unobarwa ngemukadzi. Asi zviro zveshe zvakabva kunaMwari. ¹³ Dzigurirei mwemene; zvinosisira here kuti mukadzi akumbire kunaMwari anesoro risikazi kufukidzwa? ¹⁴ Amudzidziswi here ngechibarirwe chenyu kuti, kudai mwamuna ane bvudzi rakareba, rinomutsverudzisa, ¹⁵ asi kudai mukadzi anebvudzi rakareba, riri uthende kwaari? Ngokuti bvudzi rake rakahinwa kwaari kumufukidza. ¹⁶ Asi kuti aripo munhu unooneka, echida kuita hasha, atina muitiro wakadaro, kunyazwi nezviara zvaMwari azvinawo. ¹⁷ Asi ndechimupa uku kupanga, andimuirikidzi akadi, kuti munoungana pamwepo musikaunganiri zvakapinda kunaka, asi munounganira zvakapinda kushata. ¹⁸ Ngokuti kutanga kwazvo zveshe, naapo mwoungana muchiara, ndinozwa kuti kuripo kuparadzana pakati penyu; neni ndinotenda zvimweni zvazvo. ¹⁹ Ngokuti ngegwinyiso kunosisira kuti kuapo kuparadzana pakati penyu, kuti zvinase kuoneka pamhene kuti ngevari vanoashirika. ²⁰ Naapo mwaungana pamwepo, asikutipi murhe kurha kwaMambo. ²¹ Ngokuti apo nguva yaguma yokurha, munhu weshe unodzitorera kutangiravamweni kudya kwake; umweni unenzara noumweni waradza. ²² Chiinyi! Amuna here mhatso dzokudyira nedzokumwira? Nokuti munoshoora here chiara chaMwari nokuvatsverudza avo vasina chiro? Ndinozotinyi kwomuri? Ndinozomuirikidza ngeichi here? Ngendaa iyi andimuirikidzi. ²³ Ngokuti ndakaashira kubva kunaMambo, icho chendakapawo kwomuri, kuti Mambo Jesu ngousiku uhwo hwaakatengeswa ndihwo, wakatora chingwa; ²⁴ apedza kubonga, wakachigura, akati, “Uyu ndiwo muiri wangu, unogurwa ngendaa yenyu. Itai ichi mukundikarakadza. ²⁵ Ngokudarozve wakatora tsani, ngesure kwe kurha echiti, “Tsani iyi ndiyo chitenderano chitsva mungazi yangu. Itai ichi nguva dzeshe dzomunomwa kweiri, mukundikarakadza.” ²⁶ Ngokuti nguva dzeshe dzomunodya ichi chingwa nokumwa kuiyi tsani, munoteketesa kufa kwaMambo metsa auye. ²⁷ Ndizvo, kunyazwi ndiani unozorha chingwa nokuti kumwa kutsani yaMambo ngenjira isikafaniri, unozoita ndaa yomuiri neyengazi yaMambo. ²⁸ Asi munhu ngaadziringire pachake, adaro ngaarhe kuneicho chingwa nokumwa kuneiyo tsani. ²⁹ Ngokuti uwo unorha nokuti kumwa, asikanasi kuzwisisa muiri, unorhira nokuti kumwira kutongwa pachake. ³⁰ Ngeiyi ndaa vajinji venyu vakarembedzeka nokurwara, nevajinji vakafa. ³¹ Asi kudai isusu pachedu takadziringira, taizodai tisikatongwi. ³² Asi apo petinotongwa, tinoororwa ndiMambo, kuti tisazorashwa pamwepo nevenyika. ³³ Ndizvo, hama dzangu, apo mwoungana pamwepo kuti murhe, emeranai. ³⁴ Kudai aripo unenzara, ngaarhe kanyi, kuti kuungana kwenyu kusazoita kuti mutongwe. Ngendaa yezviro zvimweni ndinozozvirongedza ndika gumeyo.