¹ Ngendaa yezvipo zveMweya, hama, andidi kuti muite vasikazii. ² Munozia kuti apo muchiri mahedheni mwaikweyiwa kuenda kune iyo miedzaniso isikareketi, kunyazwi mwaikweyiwa ngenjira yakadini. ³ Ndizvo ndinoda kuti muzwisise kuti akuna munhu, unoreketa ndiMweya waMwari,ungaronza kuti, “Jesu wakatukwa!” Zve, akuna munhu ungaronza kuti, “Jesu ndiMambo” kwega atungamirirwa ndiMweya Wakachena. ⁴ Hino zviripo zvipo zvakaparadzana, asi Mweya ndiumwe. 5 ⁵ kuripozve kuparadzana kwokushandira, asi Mambo ngeumwewo. ⁶ kuripozve kuparadzana kwemushando, asi Mwari umwe, uwo unoshanda zviro zveshe kwavari veshe. ⁷ Munhu weshe kunopuwa kuoniswa kwoMweya, kuti veshe vapfumiswe. ⁸ Ngokuti umwe kunopuwa kubudikidza ngeMweya izwi reungwaru, nekuno umweni kunopuwa izwi roruziyo, ngeMweya umwewo. ⁹ Kune umweni kunopuwa kugonda, kubudikidza ndiMweya umwewo, nokuno umweni kunopuwa zvipo zvokuponesa, kubudikidza ngeMweya umwewo, ¹⁰ nokuno umweni kunopuwa kuita mushando yokuita mishamiso, nokuno umweni kunopuwa kuprofeta, nokuno umweni kunopuwa kuzwisisa mweya, nokuno umweni kunopuwa kuereketa ngendimi dzakaparadzana, nokuno umweni kunopuwa kududzira ndimi. ¹¹ Asi izvi zveshe zvinoshandwa kubudikidza ngeumwe neMweya umwewo; unokoanisira kune munhu umwe naumwe, kudai ngokuda kwake. ¹² Ngokuti kudai ngomuiri umwe, unemarupande akawanda, nemarupande eshe omuiri akanyawanda ari muiri umwe, ndizvo zvakaitawo Kristu. ¹³ Ngokuti isusu teshe takabhabhatidzwa muMweya umwe kuita muiri umwe, vaJudha nokuti vaGiriki, vakasungwa nokuti vakasunhurika, nesu teshe takaitwa kuti timwe kuMweya umwewo. ¹⁴ Ngokuti muiri auisi rupande rimwe, asi mapande majinji. ¹⁵ Kudai tsoka yechiti: “Ngokuti andisi nyara, andichiri wemuiripi”, izvo zvingaita kuti isaita nhengo yomuiri . ¹⁶ Nokudai nzee yechiti: “Ngokuti andisi dziso, andichiri womuiripi;” izvo zvingaita kuti isaita nhengo yemuiri. ¹⁷ Kudai muiri weshe waiya dziso, kuzwa kwaizoapari? Kudai weshe wainga nzee, kunuhwidza kwaizoapari? ¹⁸ Asi Mwari wakaemesa marupande mumuiri umwe ngaumwe, kudai ngokuda kwake. ¹⁹ Kudai eshe ainga rupande rumwe, muiri waizoapari? ²⁰ Asi kunemarupande majinji, asi muiri umwe. ²¹ Dziso aringakoni kuronza kunenyara kuti: “Andikutami iwewe,” nokutizve soro aringakoni kuronza kudaro kunemirenje, “Andikutami iwewe.” ²² Haiwa, marupande omuiri awo anoningirika akarembedzeka, ndiwo anopinda kudikanwa, ²³ naawo marupande omuiri etinopinimidza ndiwo kuti aanyanyi kureremedzwa, ndiwo etinoreremedza kakuru, nemarupande edu asikanasi kuringirika, ndiwo anoningirika akapinda kunaka. ²⁴ Apo marupande edu anoningirika aatami kureremedzwa. Asi Mwari wakaronga muiri, echipa kureremedzwa kukuru kuno urwo rupande rwaikutama. ²⁵ Ena wakaita izvo kuti kusazoapo kuparadzana mumuiri, asi kuti marupande eshe angwarirane rumwe kune rimweni. ²⁶ Kudai rupande rumwe rwechitambudzika, marupande eshe anotambudzika pamwepo narwo; kudai rupande rumwe rwechiremeredzwa, marupande eshe anodakara pamwepo narwo. ²⁷ Nokudaro imwimwi muri muiri waKristu, uwo nouwo muri marupande awo. ²⁸ NaMwari wakamurudza muchiara, vokutanga vapostori, vechipiri vaprofeti, vechitatu vadzidzisi, ngesure vaiti vemishamiso, ngesure zvipo zvekuponesa, vadetseri, vatungamiriri nevaereketi vendimi dzakaparadzana. ²⁹ Veshe vapostori here? Veshe vaprofeti here? Veshe vadzidzisi here? Veshe vaiti vemishamiso here? ³⁰ Veshe vanezvipo zvekuponesa here? Veshe vanoreketa ngendimi here? Veshe vanodudzira here? ³¹ Asi itai vanodisisa zvipo zvakapinda kukura. Asi ndinomuonisa njira yakapinda kunaka.