¹ Kunyazwi ndikanyaereketa ngendimi dzevanhu nedzengirosi, asi ndisina rudo, ndiri thusi rinoita bope nokuti ngoma yesimbi inorira. ² Kunyazwi ndinokuprofeta, ndikazia zvakafishika zveshe nokuzia kweshe, kunyazwi ndinokugonda kweshe, kunokwana kudusa mitunhu, asi ndisina rudo, andiri chiropi. ³ Ndikapa zveshe zvendinazvo kukovera varombo, nokuti ndikapa muiri wangu kupishwa, asi ndisina rudo, azvindidetseri chiro. ⁴ Rudo rinoemerera nekunakisa. Rudo rinenyasha, rudo arina ndurumwa nokuti kudziganzisa, nokuti kudzitunhumadza. ⁵ Ariti zvisikafaniri. Rudo aridzitsvakiri zvarwo, aritseneswi nokutikureketa zvakashata. ⁶ Aridakari ngezvisikazi kutendeka, asi runodakara ngezvegwinyiso. ⁷ Rinodumaidza zviro zveshe, runotenda zviro zveshe, runogondera zviro zveshe, rinoshingirira zviro zveshe. ⁸ Rudo ariperi. Asi kudai kunyaripo kuprofeta, kunozopera; kunyaripo kureketa ngendimi, dzinozonyarara; kunyaripo kuzia, kunozopera. ⁹ Ngokuti tinozia zvimweni nesu tinoprofeta zvimweni, ¹⁰ asi, apo zvaguma zvakaperera, izvo zvisikazi kuperera zvinozopera. ¹¹ Apo ndichiri mwana mudoko, ndakareketa, ndaireketa kudai ngemwana mudoko, ndakapinimidza kudai ngomwana mudoko, ndakazia kudai ngemwana mudoko; apo ndaa munhu wakura, ndakarasha zvouhwana. ¹² Ngokuti zvino tinoona ngomuchiboniboni mumauma, asi ngenguva iyo tinozoonana hope kuhope. Zvino ndinozia zvimweni, asi ngenguva iyo ndinozonasa kuzia kudai ngezvendakaziikanwa. ¹³ Ndizvo zvino zvinogara kugonda, kutenda norudo, izvi zvitatu: asi chikuru chazvo chakapindisisa kukura rudo.