¹ Teerai rudo, mudisise zvipo zveMweya, kakuru kuti muprofete. ² Ngokuti uwo unoreketa ngendimi aareketi kunevanhu asi kunaMwari; ngokuti apana munhu unomuzwa, asi unoreketa zvakafishika muMweya; ³ Asi ngenjira imweni uwo unoprofeta unoreketa kuvanhu zvinoaka, zvinoembedzera nezvinonyaradza. ⁴ Uwo unoreketa ngendimi unodziaka, asi uwo unoprofeta unoaka chiara. ⁵ Ndaida kuti imwimwi mweshe murekete ngendimi, asi kupinda izvo, kuti muprofete. Ngokuti uwo unoprofeta, mukuru kupinda uwo unoreketa ngendimi, asi kuti umweni akakhumucha, kuti chiara chiakiwe. ⁶ Asi zvino, hama, kudai ndechiuya kwomuri, ndechireketa ngendimi ndinozomudetsera ngenjiranyi, ngepabanze pokuti ndirekete kwomuri ngenjira inomuunzira chioniso nokuti ruziyo nokuti chiprofeti nokuti chidzidziso. ⁷ Kunyazwi zviro zvisina kupona zvinorira, kunyazwi iri nyere nokuti chidangari, kudai zvisikaparadzani mukurira kwazvo, kungaitwa maziirwenyi kurira kwazvo? ⁸ Ngokuti kudai gwama rikarira kusikaziikanwi, ndiani unozodzinasirira kuenda kuhondo? ⁹ Ndizvo nemwiwo pachenyu, kudai mwechiereketa ngendimi izvo zvisikanasi kuzwisisika, zvingaita maziikanirwenyi izvo zvinoereketwa? Ngokuti ngokudaro munozoreketa kunedutu. ¹⁰ Dziripo ndimi dzembeu dzakaparadzana dzakawanda munyika, akuna naimwe yadzo isikaronzi chiro. ¹¹ Ndizvo kudai ndisikazii biningidzo reizwi, ndinozoita munhu mupara kwaari unoreketa nouwo unoreketa unozoita munhu mupara kwendiri. ¹² Ndizvo nemwiwo pachenyu, kwechioneka kuti munodisisa kuwa nezvipo zvoMweya, tsvakai kuti muwanzwe mukuaka chiara. ¹³ Ndizvo uwo unoreketa ngendimi, ngaakumbire simba rokukhumucha. ¹⁴ Ngokuti kudai ndechikumbira ngendimi, mweya wangu unokumbira, asi mupinimidzo wangu auzkwisisi. ¹⁵ Tchii chandinofanira kuita? Ndichazokumbira mumweya, ndechikumbira ngomupinimidzowo. Ndinozoemba mumweya, ndechiemba ngomupinimidzowo. ¹⁶ Ngenjira imweni, kudai wechibonga mumweya, uwo usikazii ungazoita maronzereyi kuti: “Ameni,” apo wobonga, kwechioneka kuti iye aazii chaunoronza? ¹⁷ Ngokuti ngegwinyiso iwewe unonasa kubonga, asi umweni aazi kuakiwa. ¹⁸ Ndinobonga Mwari, ngokuti ndinoreketa ngendimi kupinda imwimwi mweshe. ¹⁹ Asi muchiara ndingada kuti ndirekete mazwi mashanu ngokupinimidza kwangu, kuti ndidzidzise vamweni, kupinda kureketa mazwi ari gumi remakumi emazana ngendimi dzisikaziikanwi. ²⁰ Hama, musaita vana mukufunga kwenyu. Asi munezvakashata itai vana, asi mukufunga kwenyu itai vabva muzero. ²¹ Kwakanyorwa muMUpango kuti: “Ngevanhu vendimi dzimweni, ngemuromo yevenyika mukanza ndinozoereketa kuneava vanhu; kunyazwi zvakadaro, avazondizwi”, unoronza Mambo Mwari. ²² Ndizvo ndimi dzwioniso, haiwa kwavari vanotenda, asi kwavari vasikatendi; asi kuprofeta kuri chioniso, haiwa kwavari vasikatendi, asi kwavari vanotenda. ²³ Ndizvo, kudai chiara cheshe chaungana pamwepo, navo veshe vechireketa ngendimi, kukapoteramwo munhu usikazii nokuti usikatendi, wakadaro aazoronzi here kuti muri vanopenga? ²⁴ Asi kudai veshe vechiprofeta, oroopoteramwo umwe usikatendi, munhu mupara nokuti usikazii, iye unooniswa kushaisha kwake ndivo veshe, unotongwa ndivo veshe. ²⁵ Zvakafishika zvemwoyo wake zvinooneswa; nokudaro unozowa pashi ngehope yake nokudira Mwari, echironza kuti: “Mwari uri pakati penyu ngegwinyiso.” ²⁶ Ndizvo chiinyi, hama? Apo mwooungana pamwepo, uwo nouwo unenduyo, chidzidziso, chioniso, ndiminokukhumucha. Zviro zveshe ngazviitwe zvinoaka. ²⁷ Kudai aripo munhu nokuti ngouri unoreketa ngendimi, ngavaite vairi nokuti vasikapindi vatatu, ngavaite ngekuteererana; noumweni ngaakhumuche. ²⁸ Asi kudai pasina unokhumucha,ngaanyarare muchiara, ngaadzireketere ega ne kunaMwari. ²⁹ Vaprofeti vairi nokuti vatatu ngavarekete nevamweni ngavazvipime. ³⁰ Asi kudai chiro chechioniswa kuno umweni unogara apo, wokutanga ngaanyarare. ³¹ Ngokuti imwimwi mweshe mungaprofeta ngokutererana, kuti veshe vadzidze nokuti veshe vaembedzerwe. ³² Nekuti mweya yevaprofeti inopfaira vaprofeti. ³³ Ngekuti Mwari andiyepi Mwariwehohoho, asi wokunyarara. Kudai ngezvezvakaita kuzviara zveshe zvevakacheneswa. ³⁴ vakadzi ngavanyarare muzviara. Ngokuti akutenderwi kwavari kuti varekete. Asi ngavapfaire kudai ngezvinoronzwa ngeMupango. ³⁵ Kudai vechida kuzia chiro, ngavabvunze kuvamuna vavo vaakanyi. Ngokuti zvinotsverudza kuti mukadzi aerekete muchiara. ³⁶ Nokuti izwi raMwari rakatanga kubuda kubva kwomuri here? Nokuti rakagumira imwimwi mwega here? ³⁷ Kudai aripo munhu unofunga kuita muprofeti kana wemweya, ngaazvitende izvo zvendinonyora kwomuri, kuti mupango yaMambo. ³⁸ Asi kudai aripo munhu usikabatiki ngeizvi, musabatikawo ndiye. ³⁹ Ndizvo, hama dzangu, emurirai kuti muprofete, musarambidza kureketa ngendimi. ⁴⁰ Asi zveshe ngazviitwe ngenjira inofanira nokutererana.