¹ Ndinomuziisa, hama, vhangeri iro rendakparidzira kwomuri, remwakaashirawo, rimunoema mukati mwaro. ² kubudikidza ndiro munoponeswa; ngemazwi awo endakachumaira kwomuri, kudai mwechiabatisisa, ngepabanze pokuti mwakatenda pasina shkwiro. ³ Ngokuti ndakapa kwomuri kutanga, icho chendakaashirawo inini, kuti Kristu wakafira zvishaishi zvedu, kudai ngezvakanyorwa, ⁴ nokuti iye wakaikwa, zve, wakamuswa ngezuva rechitatu, kudai ngezvakanyorwa. ⁵ Nokuti wakaoneka kunaKhefasi; ngesure kwakaoneka kunegumi navairi. ⁶ Ngesure wakaoneka kunehama dzinopinda mazana mashanu vari pamwepo, vazhinji vavo vachiripo metsa nazvino, asi vamweni vavo vakafa. ⁷ Apo wakadzionesa kunaJakobe, ngesure wakaoneka kuvapostori veshe. ⁸ Pakupedzisira wakadzionisazve kwendiri, kudai ngouwo wakabarwa nguva isati yaguma. ⁹ Ngokuti inini ndiri mudoko wevapostori, andisisiri kudaidzwa kuti ndiri mupostori, ngokuti ndakatambudza chiara chaMwari. ¹⁰ Asi ngenyasha dzaMwari ndiri munhu wakadai zvino, nenyasha dzake dzakapuwa kwendiri, adzizi kuoneka dzisina shwiro; asi ndakashanda kakurukupinda veshe, kunyazwi andinipi, asi inyasha dzaMwari dzaiya mwendiri. ¹¹ Ndizvo kunyazwi ndini nokuti ndivo, ndiyo njira yetinochumaira ndiyo nenjira yemwakatenda ndiyo. ¹² kudai Kristu echichumairwa kuti wakamuka kubva kwevakafa, kunoronzwa ngenyi ngevamweni pakati penyu, kuti akuna kumuka kubva kwevakafa? ¹³ Asi kudai kusina kumuka kwevakafa, zvino Kristu aazi kumuswawo. ¹⁴ kudai Kristu asikazi kumuswa, kuchumaira kwedu akuna shkwiro nokugonda kwenyu akuna shkwiro. ¹⁵ Isusu tinooneka tiri zvapupu zvekunyepa zvaMwari, ngokuti takapupura ndiMwari kuti wakamusa Kristu, uwo waasikazi kumusa, kuti riri gwinyiso kuti vakafa avamuswi. ¹⁶ Ngokuti kudai vakafa vasikamuswi, zvino Kristu aazi kumuswa. ¹⁷ Kudai Kristu asikazi kumuswa, kugonda kwenyu akuna shkwiro nemwi muchirimwo muzvishaishi zvenyu. ¹⁸ Zvino naavowo vakafa munaKristu vakarova. ¹⁹ Kudai mukupona uku kwega tino kugonda munaKristu, tinofanera kukungurirwa kupinda vanhu veshe. ²⁰ Asi zvino, Kristu wakamuskwa kubva kwevakafa, wakaita muchero womutanguro weavo vakafa. ²¹ Ngokuti kufa kwakaguma kubudikidza ngomunhu, kumukazve kwevakafa kwakaguma kubudikidza ngomunhu ²² Ngokuti kudai ngezvevanofa veshe munaAdhamu,ndizvo veshe muna Kristu vachaitwa vanopona. ²³ Asi umwe ngaumwe kudai ngeurongwa wake. Kristu ndiye muchero womutanguro, zvino pakuuya kwake avo vari vaKristu. ²⁴ Apo kunouya magumo, paanozopa umambo kunaMwari Baba, apo apedza kuparadza kutonga kweshe neumambo weshe nesimba reshe. ²⁵ Ngokuti kunofanira kuti atonge metsa aisa eshe magaa ake pashi petsoka dzake. ²⁶ Gaa rekugumisira rinozoparadzwa rufu. ²⁷ “Ngokuti Mwari wakapfaisa zviro zveshe pashi petsoka dzake.” Asi apo peizwki: “Zviro zveshe zvapfaiswa,” zviri pamhene kuti azvironzi kuti iye wapfaiswa, uwo wakapfaisa zviro zveshe pashi pake. ²⁸ Apo zviro zveshe zvapfaiswa kwaari, zvino Mwana komana emene unozopfairawo uwo wakapfaisa zveshe zviro pashi pake, kuti Mwari aite zveshe munezveshe. ²⁹ Kudai zvisikazi kudaro, vanozoiteyi avo vakabhabhatidzirwa vakafa? Kudai vakafa vasikamuskwi, ndizvo vanobhabhatidzirirweyi vakafa? ³⁰ Isusu tinogara munyatwa ngeyi maawa eshe? ³¹ Ndinopika, hama, ngokuganza kwangu kwendinakwo ndimwi, munaKristu Jesu Mambo wedu, kuti ndinofa zuva ngezuva. ³² Kudai ngomushuma wevanhu ndakaambana nezvikara zvomushango muEfesu, kunondidetsereyi? Kudai vakafa vasikamuswi, “Ngatidye, techimwa, ngokuti mangwani tinozofa.” ³³ Musachengedzerwa: “Kuiyana nevakashata kunoparadza miitiro yakanaka.” ³⁴ Mukai mumipinimidzo yenyu yakarurama, murekere kuita zvakashata; ngokuti vanhu vamweni avana ruziyo raMwari. Ndinoreketa izvi kumunyadzisa. ³⁵ Asi umweni unozoti, “Vakafa vanoita mamusirweyi? Vanozouya nomuiri wakadini?” ³⁶ Iwewe benzi! Icho chounokusha, achingameri asi kuti chafa. ³⁷ Neicho chounokusha, aukushi uwo muiri unozoapo, asi tsangu yega, pamweni yekoroni nokuti yembeu imweni. ³⁸ Asi Mwari unopa muiri unomuemo wakadai ngokuda kwake, nokumbeu imwe ngaimwe unopa muiri wayo. ³⁹ Nyama yeshe aizi kuita nyama yembeu imweyo, asi iriyo mbeu imwe yenyama yevanhu, nembeu imweni yenyama yemhuka, nembeu imweni yenyama yeshiri, nembeu imweni yenyama yehove. ⁴⁰ Iriyozve miiri yomudenga nemiiri yomunyika, asi uthende hweiyo yomudenga ngewembeu imweni, nouthende hweiyo yomunyika ngohwembeu imweni. ⁴¹ Huriyo uthende umweni wezuva, uriyo uthende humweni womwedzi, uriyo uthende umweni wenyeredzi, nokuti nyeredzi imwe inosiyana nenyeredzi imweni uthende wayo. ⁴² Ndizvowo zvakaita kumuka kwevakafa. Muiri unokushwa mukuora, unomuswa mukusikaora. ⁴³ Unokushwa mukusikareremedzwa, unomuswa muuthende. Unokushwa mukurembedzeka, unomuswa musimba. ⁴⁴ Unokushwa uri muiri wenyama, unomuswa waa muiri womweya. Kudai uripo muiri wenyama, uripozve muiri wemweya. ⁴⁵ Kwakanyorwazve kuti, “Munhu wokutanga, Adhamu, wakaitwa munhu unopona,” Adhamu wokugumisira wakaitwa mweya unopa kupona. ⁴⁶ Asi andiwopi mweya wokutanga, asi wenyama; ngesure kwouya womweya. ⁴⁷ Munhu wokutanga wakabva mumavhu, munhu wemavhu. Munhu wechipiri wakabva mudenga. ⁴⁸ Avo vari vemavhu vakadai ngouwo wemavhu. Naavo vari vomudenga, vakadai ngouwo womudenga. ⁴⁹ Kudai ngezvetainga mumuemo wouwo wemavhu, zve, tinozowa nomuemo weuwo wemudenga. ⁵⁰ Zvino ndinoronza izvi, hama, nyama nengazi azvingakoni kugara nhaka yeumambo waMwari; nokuti zvinoora azvingagari nhaka yezvisikaori. ⁵¹ Ningirai, ndinomuronzera zvakafishika! Atizofi teshe, asi tinozotsandudzwa teshe. ⁵² Nenguva doko, ngokuphipha kwedziso, ngenguva yokuridzwa kwegwama rokugumisira. Ngokuti gwama rinozorira, nevakafa vanozomuswa vasikaori, nesu tinozotsandudzwa. ⁵³ Ngokuti muiri uyu unoora unosisira kupfeka usikachazoori, neuyu unofa unofanira kupfeka usikachazofi. ⁵⁴ Apo muiri uyu unoora wazopfeka usikachazoori, nouwo muiri unofa wazopfeka usikachazofi, naapo rinozozarisika izwi rakanyorwa kuti, “Kufa kwamedzwa ngokunyiswa.” ⁵⁵ “Iwewe rufu, kunyisa kwako kuri pari? Iwewe rufu, ukaira wako huri pari? ⁵⁶ Ukaira hworufu kushaisha, nesimba rekushaisha riri Mipango. ⁵⁷ Asi ngaabongwe Mwari, unotipa kunyisa kubudikidza ndiye Mambo wedu Jesu Kristu. ⁵⁸ Ndizvo, hama dzangu dzinodikanwa, itai vakagwinya, vasikatsukunuswi, ngenguva dzeshe mwechitsamwirira mumishando yaMambo, ngokuti munozia kuti mushando yenyu aiiti isina shkwiro munaMambo.