¹ Nivula ntiyiso, ni wa Kriste, anihembi; ni ripfalu ra mina, hi kupfuniwa hi Moya Lowokwetsima, ritiyisa svona: ² Hi lesvaku ni ni kuvaviseka lokukulu mbilwini ni vusiwana lebzingaheliki, hikolaho ka vamakwerhu. ³ Hikuva anitanavela, mina hi xiviri xa mina, kuva lweyi acukumetiwaka, nihambanisiwa na Kriste hikolaho ka vona lava vanga va rixaka ra ka hina hi kuvelekiwa. ⁴ Nivula Vaisrayele, vona lava vangayendliwa vana va Xikwembu, vanyikiweke kukwetsima ka xona, ni mintwananu, ni Nawu, ni vukhongeli bza xiviri, ni svitshembiso. ⁵ Vakokwana va hina i va vona; na yena Kriste ahuma rixakeni ra vona, hi tlhelo ra kuvelekiwa. Xikwembu lexinga henhla ka svilo hinkwasvu, axivongiwe hilaha kungaheliki. Amen! ⁶ Asvivuli lesvaku rito ra Xikwembu ritsandzekile. Hikuva ahi hinkwavu lavahumaka ka Israyele lavanga Vaisrayele va xiviri; ⁷ na svona, ahi hinkwavu va rixaka ra Abrahamu lavangavuliwaka lesvaku i vana va yena va xiviri, hikuva Xikwembu xite: “Lava vahumaka ka Izaki hi vona lavangatavuliwa va rixaka ra wena.” ⁸ Svihlaya lesvaku ahi vona lavanga vana hi tlhelo ra sva ntumbuluku, lavanga vana va Xikwembu; kambe vana lavangavelekiwa hikolaho ka xitshembiso xa xona, hivona lavahlayiwaka lesvaku i va rixaka ra xiviri. ⁹ Hikuva rito ra xitshembiso hi leri ringe: “Nitavuya hi nkama lowuvekiweke, kutani Sara atava ni n'wana wamufana.” ¹⁰ Ahi svosvo ntsena, kambe Rabeka na yena, avelekile vana hi nuna mun'we ntsena, tatana wa hina Izaki. ¹¹ Kutani loko vana lava vangasivelekiwa, ni loko vangasiyendla xosaseka kumbe xobiha, Rabeka abzeliwile lesvaku: “Lweyi nkulu atatirhela lweyi ntsongo.” ¹² Akuli kuyendlela lesvaku makungu ya Xikwembu ya kutihlawulela lweyi ximulavaka, mayisiwa mahlweni, kungali hi kuvona mintirho ya munhu, kambe hikolaho ka kuvitana ka Xikwembu. ¹³ Svafana ni lesvitsaliweke vaku: “Nirhandzile Yakobe, kambe nivengile Esawu.” ¹⁴ Loko svilitano, xana hitakuyini ke? Xana Xikwembu xitirha hi kuhomboloka ke? Nikutsongo! ¹⁵ Hikuva xibzela Moxe xiku: “Nitatsetselela lweyi nirhandzaka kumutsetselela; lweyi nirhandzaka kumutwela vusiwana, nitamutwela vusiwana.” ¹⁶ Hikolaho-ke, ahi mhaka leyihumaka kurhandzeni ka munhu kumbe kutikarhateni ka yena, kambe yihuma ka Xikwembu, xinga xona xitsetselelaka. ¹⁷ Hikuva tsalwa ribzela Faro riku: “Loko nikukulisa, aniyendlela kukomba matimba ya mina hi wena, ni lesvaku vito ra mina ritwalisiwa misaveni hinkwayu.” ¹⁸ Loko svilitano ke, Xikwembu xitsetselela lweyi xirhandzaka kumutsetselela; kutani xinonon'hwisa lweyi xirhandzaka kumunonon'hwisa. ¹⁹ 19 Loko svilitano, utaku ka mina: “Xana xahavilela ha yini? Hikuva i mani lweyi angayalaka lesvi xona xisvirhandzaka?” ²⁰ Kasi u mani, wena munhu, kukanetana ni Xikwembu? Xana lexivumbiwaka xingahundzuka xivutisa muvumbi wa xona xiku: “Univumbisele yini xilesvi” ke? ²¹ Hi tlhelo rin'wana, xana muvumbi anga na wona matimba henhla ka vumba ra yena, akuva hi vumba ro ra rin'we, avumba xibza xin'we xa risima ni xin'wana xosoleka ke? ²² Kambe, hingakuyini ka svona, loko Xikwembu lexi axinavela kukomba kukariha ka xona ni kuyendla lesvaku ntamu wa xona wutiviwa, xivile ni mbilu leyoleha ngopfu, xilehisela svibza lesvi asvivumbeliwile kukarhateliwa ni kudlayeteliwa, xana? ²³ Kumbe, kuyini ka svona, loko xiyendlele kutivisa vukulu bza kukwetsima ka xona, henhla ka svibza lesvi asvivumbeliwile kutsetseleliwa, svinga svibza lesvi xisvilungiseke kahali kusunguleni lesvaku svitanyikiwa kukwetsima ka xona, ke? ²⁴ Svibza lesvi, hi hina lava xihivitaneke, hina hihumaka kungali xikarhi ka Vayuda ntsena, kambe ni le xikarhi ka vamatiko. ²⁵ Xihlayise svosvo bukwini ya Hozeya, loko xiku: “Lava avangali vanhu va mina, nitavavula vanhu va mina; ni wansati lweyi aangarhandziwi, nitamuvula murhandziwa. ²⁶ Kutani lava vangativisiwa lesvaku: ‘Ami vanhu va mina’, kona kolaho vatahlayiwa vana va Xikwembu lexihanyaka.” ²⁷ Na yena Ezaya wahuwelela hi ta Israyele, aku: “Hambi loko ntsengo wa Vaisrayele wukotisa sava ra lwandle, kutaponisiwa lava vasaleke ntsena; 28 ²⁸ hikuva Hosi yitahetisa mhaka ya yona misaveni, yiyitsema hi kuhantlisa.” 29 ²⁹ Svifana ni lesvi Ezaya angarhanga asvivula, loko aku: “Loko Hosi ya matimba hinkwawu ayingahisiyelanga vatukulu, ahitava hihundzukile hifana na Sodoma, ahitava hiringanisiwile na Gomora.” ³⁰ Hitakuyini ke? Hitaku: Vamatiko lava avangalandzi nawu wa kululama, vakume kululama koloko, hi mhaka ya kupfumela; ³¹ Kasi Vaisrayele lava avalava kululama loku kukumiwaka hi kuyingisa Nawu, avasvikotanga kuhetisisa Nawu lowu. ³² Hikolaho ka yini ke? Hikuva kulaveni ka vona, avangali na kupfumela, kambe avatshemba mintirho ya vona; vawele henhla ka ribze leriwisaka vanhu, ³³ hilaha kutsaliweke hakona vaku: “Vona, niveka Siyoni ribze leri khunguvanyisaka vanhu, ni ribze leriwisaka; kambe lweyi apfumelaka ka yena lweyi anga ribze leri, angakala angakhomiwi hi tingana.”