¹ 10Vamakwerhu, kunavela ka mbilu ya mina ni xikhongelo lexi nikhongelelaka Vaisrayele ha xona ka Xikwembu, hi lesvaku vaponisiwa. ² Ningava mboni ya vona lesvaku vahisekela Xikwembu, kambe vahiseka na vangali na vutlhari; ³ hikuva lesvi vangativiki kululama loku kunyikiwaka hi Xikwembu, kutani valavaka kululama loku vatiyendlelaka hi voxe, avativeki hansi ka kululama lokunyikiwaka hi Xikwembu. ⁴ Hikuva makumu ya Nawu i Kriste, akuva mun'wana ni mun'wana lweyi apfumelaka ayendliwa lweyi alulameke. ⁵ Moxe atsalile lesvaku munhu lweyi alavaka kululama loku kuhumaka Nawini, atahanya hakona. ⁶ Kambe kululama lokuhumaka kupfumeleni, kuvula lesvi: “Ungatshuki utivutisa lesvaku xana lweyi angatatlhantukela tilweni i mani, hikuva kuvula lesvo i kuxikisa Kriste.” ⁷ Nasvona ungavutisi lesvaku xana lweyi angataxikela ndhawini ya vafi i mani, hikuva kuvula lesvo i kuhumesa Kriste xikarhi ka lava vafeke. ⁸ Kasi kululama kuvula lesvi: “Rito ri le kusuhi na wena, ri le non'weni wa wena ni le mbilwini ya wena.” Hi rona rito ra kupfumela leri hirichumayelaka hiku: ⁹ Loko uvula hi nomo wa wena lesvaku Yesu i Hosi, ni loko upfumela mbilwini ya wena lesvaku Xikwembu ximupfuxile xikarhi ka vafi, utaponisiwa. ¹⁰ Hikuva munhu apfumela hi mbilu, kutani svosvo svimuyendla ava lweyi alulameke; ativula svijoho sva yena hi nomo, kutani svosvo svimuyendla ava lweyi aponisiwaka ¹¹ Tsalwa rite: “Mun'wana ni mun'wana lweyi apfumelaka ka yena, angakala angakhomisiwi tingana.” ¹² Aku na kuhambana xikarhi ka Muyuda ni wamatiko, hikuva hinkwavu va ni Hosi yin'we, leyi minkateko ya yona yitalelaka hinkwavu lava vayikhongelaka. ¹³ Hikuva, “mun'wana ni mun'wana lweyi akhongelaka vito ra Hosi, ataponisiwa.” ¹⁴ Kambe vatakhongelisa kuyini ka lweyi vangasikipfumela ka yena xana? Vatapfumelisa kuyini ka lweyi avangasitwa ta yena ke? Vatasvitwisa kuyini, loko vangali na lweyi avachumayelaka xana? ¹⁵ Kutani vatavachumayelisa kuyini, loko vangarhumiwanga ke? Hilaha kutsaliweke hakona vaku: “Ahikutsakisa ka svona kuvona lavataka, vapaluxa Evhangeli!” ¹⁶ Kambe ahi hinkwavu lavayamukeleke Evhangeli, hikuva Ezaya ate: “Hosi, xana i mani lweyi akholweke lesvi hibzeliweke svona ke?” ¹⁷ Hikolaho-ke, kupfumela kuta hi kutwa, ni kutwa kuta hi kubzeliwa rito ra Kriste. ¹⁸ Kambe navutisa nili: Xana vangava vangaritwanga ke? Hakunene varitwile, hikuva: “mpfumawulu wa marito ya vona wutwakele misaveni hinkwayu, ni marito ya vona mafikile makun'wini ya misava.” ¹⁹ Kambe nitlhela nivutisa: Xana Vaisrayele vangava vangasvitivanga ke? Kurhanga Moxe ahlamula aku: “Nitayendla lesvaku miva ni vukwele ka tiko leringaliki nchumu; nitayendla lesvaku miva ni mahlundzu ka tiko leringaliki na kutwisisa.” ²⁰ Kutani Ezaya atiyisa ni kuyengetelela, aku: “Nikumiwile hi lava avanganilavi, nihumelele ka lava avangavutisi nchumu ha mina.” ²¹ Kambe loko akongoma Vaisrayele, ali: “Masiku hinkwawu nitshambulutile mavoko ya mina, nivitana vanhu lavatiyalisaka, vanga vakaneti ka lavalwaka na mina.”