¹ Kutani svosvi akahali na kuyavanyisiwa ka lava vanga ka Kriste Yesu. ² Hikuva Nawu wa Moya lowunyikaka vutomi ha Yesu Kriste, wunitshunxile ka nawu wa kujoha ni wa rifu. ³ Lesvi Nawu wuhlulekeke kusviyendla, hi mhaka ya gome mirini wa laha misaveni, Xikwembu xisvikotile: Xiyavanyisile kujoha mirini hi kurhumela N'wana wa xona hi yexe, na ali ni miri lowufanaka ni miri wa hina wofumiwa hi kujoha, lesvaku atakota kuyavanyisa xijoho mirini. ⁴ Xikwembu xiyendlile lesvi, lesvaku hina hihanyaka kungali hi kulandza sva miri kambe hi kulandza sva Moya, hikota kuyingisa hi kuhetiseka svileriso lesvolulama sva Nawu. ⁵ Hikuva lavahanyaka hi kuyingisa miri, va ni miyanakanyu leyifumiwaka hi sva miri lowu; kambe lavahanyaka hi kuyingisa Moya, va ni miyanakanyu leyifumiwaka hi sva Moya. ⁶ Kunavela sva miri i rifu, kambe kunavela sva Moya i vutomi ni kurhula. ⁷ Hikolaho, kunavela lokufumiwaka hi miri kulwa ni Xikwembu, hikuva akulandzi Nawu wa Xikwembu; nasvona kungakala kungasvikoti. ⁸ Hi ndlela leyo, lavafumiwaka hi miri, vangakala vangatsakisi Xikwembu. ⁹ Kasi loko mili n'wina, amifumiwi hi miri, kambe mifumiwa hi Moya, loko hakunene Moya wa Xikwembu wuyakile ka n'wina. Loko munhu angali na Moya wa Kriste, ahi munhu wa yena. ¹⁰ Loko Kriste ali ka n'wina, hambi loko miri wa n'wina wufile hi mhaka ya xijoho, Moya wa hanya ka n'wina hi mhaka ya lesvi mingayendliwa lavalulameke hi Xikwembu. ¹¹ Kutani loko Moya wa Xikwembu lexingapfuxa Yesu xikarhi ka vafi wuyakile ka n'wina, yena lweyi apfuxeke Kriste xikarhi ka vafi, atahanyisa miri wa n'wina lowufaka, hi Moya wa yena lowuyakeke ka n'wina. ¹² Hikolaho, vamakwerhu, haboheka akuva hingahanyi hi kuyingisa miri. ¹³ Loko mihanya hi kuyingisa miri wa n'wina, mitafa; kambe loko midlaya mikhuva leyobiha ya miri hi matimba ya Moya, mitahanya. ¹⁴ Vanhu hinkwavu lavafambisiwaka hi Moya wa Xikwembu i vana va Xikwembu. ¹⁵ Hikuva Moya lowu minganyikiwa wona, awumiyendli svikarawa ni kutlhela wumivangela kuchava, kambe miyamukele moya lowu wumiyendlaka vana; lowu hihuwelelaka ha wona hiku: “Aba, Tatana!” ¹⁶ Moya, lowu wuyima ni mimoya ya hina kutiyisa lesvaku hi vana va Xikwembu. ¹⁷ Loko hili vana, svivula lesvaku hi vinyi va ndzhaka ya Xikwembu, nivaji va ndzhaka svin'we na Kriste; lesvi kunene hixanisekaka na yena, svivula lesvaku hitakwetsimisiwa na yena. ¹⁸ Hikolaho-ke, nitshemba lesvaku kuxaniseka ka nkama wa svosvi akufaneli kuringanisiwa ni kukwetsima loku hingatakombiwa kona. ¹⁹ Hikuva svivumbiwa hinkwasvu svilangutela, hi kunavela lokukulu, lesvaku Xikwembu xikombisa rivaleni vana va xona ²⁰ Lesvivumbiweke svinyiketiwe ka sva hava, kungali hi kurhandza ka svona, kambe hi kurhandza ka Lweyi asvinyiketeke. ²¹ Kambe kulangutela ku kona ka lesvaku svivumbiwa svosvo svitatshusiwa na svona vukaraweni bza lesvobola, sviyisiwa kutshunxekeni lokokwetsima lokunga ka vana va Xikwembu. ²² Hikuva hitiva lesvaku, kutafika namuntlha, svivumbiwa hinkwasvu svakonya hi kuvaviseka loku kufanaka ni kuvaviseka ka kuveleka ²³ Akukonyi svivumbiwa ntsena, kambe na hina hingayamukela mihandzu yorhanga ya Moya Lowokwetsima, hakonya ndzeni ka hina, na hili karhi hilangutela kuyendliwa vana, kunga kuponisiwa ka miri wa hina. ²⁴ Hi ponisiwile nahili ni kulangutela loku; kasi lesvilanguteliwaka, loko svivonaka, asvahalanguteliwi. Xana munhu angalangutela lesvi asvivonaka ke? ²⁵ Kambe loko hilangutela lesvi hingasvivoniki, hisvilangutela hi kutiyisela. ²⁶ Hi mukhuva wolowo Moya na wona wahipfuna gomeni ra hina; hikuva ahitivi lesvi hinga svikombelaka ni ndlela leyi hifanelaka kukhongela ha yona, kambe Moya, wona ha woxe, wukhongela Xikwembu matshan'wini ya hina, loko hina hikonya kunene hingahumesi marito. ²⁷ Kutani Xikwembu lexikambaka timbilu, xitiva lesvi Moya wusvilavaka; xitiva lesvaku Moya wufanela kukhongelela vahlawuliwa va xona. ²⁸ Nakona hitiva lesvaku, svilo hinkwasvu svihlengela kun'we kutiyisa, lesvinene ka lava vaxirhandzaka, vanga lava xivavitaneke, hi kuya hi sviboho sva makungu ya xona. ²⁹ Hikuva lava xivativeke kahali kusunguleni, xilulamisile kahali khale lesvaku vatavonaka na vali lavafanaka ni N'wana wa xona, ni lesvaku ava yena wa mativula xikarhi ka vamakwavu lavanyingi. ³⁰ Kutani lava xingalulamisa ta vona khale, xitlhele xivavitana; ni lava xivavitaneke, xitlhele xivayendla vava lavalulameke; ni lava xingavayendla lavalulameke, xitlhele xivakwetsimisa ³¹ Loko svilitano, xana hingahavula yini timhakeni toleto ke? Loko Xikwembu xiyima na hina, i mani lweyi angalwaka na hina xana ke? ³² Xona, lexingatsetselelangiki N'wana wa xona wa xiviri kambe ximunyiketa hikolaho ka hina hinkwerhu, xana xingatsandzekisa kuyini kuhinyika svilo hinkwasvu mahala ke, kasi xihinyikile ni N'wana wa xona? ³³ I mani lweyi angamangalelaka lava Xikwembu xivahlawuleke xana? Xikwembu hi xona lexi xivanyikaka kululama. I mani lweyi angavavekaka nandzu xana? ³⁴ Yesu Kriste lweyi afeke, kumbe hingaku, yena lweyi apfuxiweke kufeni, anga yena lweyi atshameke vokweni ra xinene ra Xikwembu, kutani hi yena lweyi ahikhongelelaka. ³⁵ I mani lweyi angatahihambanisa ni rirhandzu ra Kriste? Xana mangava maxangu, kumbe nhlomulu, kumbe kuxanisiwa, kumbe ndlala, kumbe vusveti, kumbe makhombo, kumbe matlhari ke? ³⁶ Kukotisa lesvitsaliweke vaku: “Siku hinkwaru hadlayiwa hikolaho ka wena, hifanisiwa ni tinyempfu letiyaka kutlhaviweni.” ³⁷ Kambe, ka svosvo hinkwasvu, hihlula hiva hihlulisisa hikolaho ka yena lweyi angahirhandza. ³⁸ Hikuva nakholwisisa lesvaku, hambi ringava rifu kumbe vutomi, hambi tingava tintsumi kumbe matimba ya madimoni, hambi svingava lesvinga kona svosvi, kumbe lesvingatata, hambi yingava mimoya ya matimba ³⁹ leyinga henhla mpfhukeni kumbe leyinga hansi ka misava, hambi xingava xivumbiwa xihi ni xihi, nili: Axi kona lexingatakota kuhihambanisa ni rirhandzu ra Xikwembu leri ringa kona ka Kriste Yesu, Hosi ya hina.