¹ Xana amisvitivi, vamakwerhu (nivulavula ni lavativaka nawu), lesvaku nawu wufuma munhu hi nkama lowu ahanyaka ke? ² Svifana ni wansati lweyi atekiweke: Abohekile ka nuna wa yena hi nawu, loko nuna ahahanya; kambe loko nuna afile, wansati lweyi atshunxiwile nawini lowu awumuboha ka nuna wa yena. ³ Hikolaho, loko atekana ni wanuna mun'wana, kasi nuna wa yena wahahanya, atahlayiwa muwosvi; kambe loko nuna wa yena afile, atshunxekile nawini; svihlaya lesvaku loko atekana ni wanuna mun'wana, angakala angavuliwi muwosvi. ⁴ Svivulaka lesvi vamakwerhu: Na n'wina mifile hi tlhelo ra Nawu, hikuva miyendla miri wun'we na Kriste; svihlaya lesvaku miva mun'wana, anga yena lweyi apfuxiweke xikarhi ka vafi lesvaku hiveka mihandzu leyitsakisaka Xikwembu. ⁵ Hikuva, loko hahahanyela sva ntumbuluku wa hina, kunavela lokunga ni kujoha, loku akupfuxiwa hi mhaka ya Nawu, akutirha ka svirho sva hina, kutani mihandzu yakona akuli kufa. ⁶ Kambe svosvi hitshunxiwile Nawini, lesvi hingafa hi tlhelo ra lesvi ahibohiwile hi svona khale; hi kolaho ke, hitirhela Xikwembu hi ndlela leyimpsha ya Moya, kungali hi leyi ya khale ya lesvitsaliweke Nawini. ⁷ Loko svilitano, ahitavula yini ke? Xana Nawu i kujoha ke? Nikutsongo! Hambi svilitano, aningatativa lesvi kujoha kunga xisvona, loko Nawu awungavanga kona; hikuva aningatativa lesvi kunavela lokobiha kunga xisvona, loko Nawu awungahlayanga wuku: “Ungatshuki unavela!” ⁸ Kambe kujoha kukumile ndlela hi mhaka ya xileriso, kutani kupfuxile kunavela ka tinxakaxaka ndzeni ka mina; hikuva handle ka Nawu, kujoha kufile. ⁹ Khale, anili lweyi ahanyaka na angali hansi ka Nawu; kambe hi kuta ka xileriso, kujoha kupfuka kuhanya, kutani mina nifa. ¹⁰ Kukumeka lesvaku xileriso lexi axili xonihanyisa, xihundzukile xonilovisa. ¹¹ Hikuva kujoha kukumile ndlela hi mhaka ya xileriso, kutani kunikanganyisile, ni kunidlaya hikolaho ka xileriso lexi. ¹² Hikolaho-ke, nawu hi woxe wuhlawulekile, na xona xileriso xihlawulekile, xilulamile, hi lexinene. ¹³ Loko svilitano, xana xilo lexinene, hi xona lexinganivangela rifu ke? Nikutsongo! Kambe i kujoha, lesvaku kujoha loku kutikomba lesvi kunga svona; kutani kunivangele rifu hi kutirhisa xilo lexinene; asvili lesvaku, hi mhaka ya xileriso, kujoha kukombisisa svinene kubiha kakona. ¹⁴ Hasvitiva lesvaku Nawu i wa Moya; kasi mina, ni munhu wa miri ntsena, nixavisiwile kuva xikarawa xa kujoha ¹⁵ Mhaka hi lesvaku mina n'winyi anitwisisi lesvi nisviyendlaka, hikuva aniyendli lesvi ninavelaka kusviyendla, kambe niyendla lesvi nisvivengaka. ¹⁶ Svosvi-ke, loko niyendla lesvi ninganaveliki kusviyendla, nitwanana ni Nawu lesvaku wululamile. ¹⁷ Hikolaho-ke angahali mina lweyi avangaka svona, kambe i kujoha loku kuyakeke ka mina. ¹⁸ Hikuva nasvitiva lesvaku lesvinene asviyakanga ka mina, hi lesvaku mirini wa mina avunene abziyakanga; hilesvo-ke kunavela kuyendla lesvolulama ku kona ka mina; kambe kusviyendla aku kona. ¹⁹ Hikuva lesvinene lesvi ninavelaka kusviyendla, anisviyendli, kambe lesvobiha lesvi ninganaveliki kusviyendla, nasviyendla. ²⁰ Svikomba lesvaku loko niyendla lesvi ninganaveliki kusviyendla, angahali mina hi nexe lweyi asviyendlaka, kambe i kujoha loku kuyakeke ka mina. ²¹ Hikolaho, nikuma lesvi ka mina: Loko ninavela kuyendla lesvolulama, lesvobiha nasvona sviko na ka mina. ²² Moyeni wa mina nitsakela Nawu wa Xikwembu; ²³ kambe ka svirho sva mina nikuma nawu wun'wana, lowulwaka ni nawu lowu wufambisaka miyanakanyu ya mina; wuniyendla mubohiwa nawini wa kujoha lowufumaka svirho sva mina. ²⁴ Yo! Mina munhu wa khombo lerikulu! I mani lweyi angatanitshunxa mirini lowu wuniyisaka kufeni xana? ²⁵ Akukhensiwe Xikwembu ha Yesu Kriste, Hosi ya hina! Kuhetisela mhakeni leyi, ningaku: Mina, hi miyanakanyu ya mina, hambi nitirhela Nawu wa Xikwembu, hi miri wa mina nitirhela nawu wa kujoha.