¹ 15Hina lava hinga ni matimba, hifanele kurhwala kuhluleka ka lava vanga ni gome, kungali kutitsakisa hina vinyi. ² Mun'wana ni mun'wana wa hina aatsakise munhukulobze, amunavelela lesvinene lesvimuyakaka ³ Hikuva hambi ali Kriste, angatitsakisanga, kambe, hilaha kutsaliweke hakona: “Kusandza ka lavakusandzaka kuniwele henhla.” ⁴ Hinkwasvu lesvi svitsaliweke hi lava va khale, svitsaliwile lesvaku hijondza ha svona, ni lesvaku hiva ni kulangutela, hikolaho ka kutiyisela ni kuchaveleliwa loku hikukumaka Matsalweni ⁵ Ingi Xikwembu lexi kutiyisela ni kuchaveleliwa svihumaka ka xona, xingaminyika n'wina hinkwenu kuyehleketa loku kufanaka, hi kulandza kululama ka Yesu Kriste, ⁶ kuyendlela lesvaku hinkwenu miva mbilu yin'we ni nomo wun'we, midzunisa Xikwembu, Tatana wa Hosi ya hina Yesu Kriste. ⁷ Hikolaho, yamukelanani, kukotisa lesvi Kriste na yena amiyamukeleke, kudzuniseni ka Xikwembu. ⁸ Hikuva namibzela lesvaku Kriste ave mutirhi ka Vayuda, kukombisa kutshembeka ka Xikwembu, ni kuyendla lesvaku svitshembiso lesvinganyikiwa vakokwana svihetiseka, ⁹ ni lesvaku vamatiko vatakota kudzunisa Xikwembu hikolaho ka timpsalu ta xona, hilaha svitsaliweke hakona aku: “Hikolaho, nitakudzunisa xikarhi ka vamatiko, nitayimbelela nitwalisa vito ra wena.” ¹⁰ Atlhela, aku: “N'wina vamatiko, tsakani, svin'we ni vanhu va Xikwembu.” ¹¹ Nakambe, vaku: “N'wina vamatiko hinkwenu, dzunisani Hosi, vanhu hinkwavu avayidzunise.” ¹² Kambe, Ezaya aku: “Hluke ra Yese ritahuma, yena lweyi ahumelelaka kutafuma matiko; ka yena, vamatiko vatava ni kulangutela.” ¹³ Ingi Xikwembu lexi kulangutela kuhumaka ka xona xingamitata hi kutsaka hinkwaku ni kurhula hinkwaku kupfumeleni, lesvaku, hi matimba ya Moya Lowokwetsima, kulangutela kumitalela, kuva kuhalakela. ¹⁴ Loko nili mina, vamakwerhu, natshemba lesvaku na n'wina mitaleliwile hi vunene, ni lesvaku mi ni vutivi lebzinyingi bza tinxakaxaka; masvikota ni kutsundzuxana ¹⁵ Hambi svilitano, nitinyikile matimba kumitsalela hi timhaka tin'wana, kutamitsundzuxa ha tona; niyendlile svosvo hikolaho ka timpsalu leti Xikwembu xininyikeke tona, ¹⁶ kuva mutirhi wa Yesu Kriste xikarhi ka vamatiko. Mina, kufana ni Muprista, nivula Mahungu Lamanene ya Xikwembu lesvaku vamatiko vava mhamba leyiyamukelekaka ka xona, leyihlawulekisiweke hi Moya Lowokwetsima. ¹⁷ Loko svilitano, hikolaho ka Yesu Kriste, natidzunisa hi ntirho wa mina wotirhela Xikwembu; ¹⁸ hikuva ningakala ningatiyi nhlana wa kuvula nchumu, handle ka lesvi Kriste angasviyendla ha mina, kutisa vamatiko kuyingiseni, hi marito ni mintirho, ¹⁹ hi matimba ya mahlori ni svihlamaliso, ni matimba ya Moya; hi ndlela yoleyo, nihaxile Evhangeli ya Kriste matlhelweni hinkwawu, kusukela le Yerusalema, kuyafika le Ilirika ²⁰ akuli kunavela ka mina lokukulu kuvula Evhangeli lomu vito ra Kriste aringasitiviwa kona, lesvaku ningatshuki niyaka masungulweni lawa mavekiweke hi munhu mun'wana. ²¹ Hilaha kutsaliweke hakona, “Lavakalaka vangabzeliwanga ta yena, vatavona; ni lavakalaka vangatitwanga ta yena, vatatwisisa.” ²² Hi yona mhaka leyi hakanyingi yinisiveleke kuta le ka n'wina. ²³ Kambe svosvi anahali na ntirho tikweni leri; kutani lesvi kunga ni malembe lawa yotala na ninavela kumiyendzela ²⁴ nitata ka n'wina loko ni ya le Xipanya, hikuva nitshemba lesvaku nitahundza nimivona; na svona, hi n'wina mingatanipfuna kuhundzela mahlweni, loko nitava nitiphinilenyana hi kutshama na n'wina. ²⁵ Kambe svosvi, nahaya le Yerusalema, niyatirhela vahlawuliwa va Xikwembu kona ²⁶ hikuva va le Makedoniya ni va le Akaya vatibohile hi kutsaka kuhlenga svopfuna svisiwana lesvinga kona xikarhi ka vahlawuliwa va le Yerusalema. ²⁷ Vatibohile hi ndlela yoleyo, kambe nasvona va ni timfanelo ka va le Yerusalema. Hikuva lesvi vamatiko vayaveliweke minkateko ya Moya leyinga ya Vayuda, na vona vafanele kutirhela Vayuda hi minkateko ya vona ya sva misava. ²⁸ Kutani-ke loko nitava nihetile svosvo, ni loko nitava nivekile male hinkwayu mavokweni ya vona, nitahundza hi le ka n'wina, loko ni ya le Xipanya. ²⁹ Nasvitiva lesvaku, loko nifika ka n'wina, nitamitisela minkateko hinkwayu ya Kriste ³⁰ Kutani na mikhongotela, vamakwerhu, hi Hosi ya hina Yesu Kriste ni rirhandzu ra Moya, lesvaku miniseketela hi matimba, mikhongelweni ya n'wina leyi minikhongelelaka ha yona ka Xikwembu ³¹ lesvaku nipona ka lava vangapfumeliki va le Yudeya, ni lesvaku ntirho lowu ningatawutirha le Yerusalema wuyamukeleka ka vakwetsimi va Xikwembu; 32 ³² hi ndlela leyi nitakota kumiyendzela hi kutsaka, loko Xikwembu xisvirhandza, kutani nikuma kuwisa na nili na n'wina. ³³ Xikwembu lexinyikaka kurhula axive na n'wina hinkwenu! Amen!