¹ Lweyi anga ni kupfumela kutsongo, muyamukeleni, kambe mingakanetaneni na yena loko mihambana kuyehleketeni. ² Munhu lweyi anga ni kupfumela ali aja hinkwasvu; kambe lweyi anga ni kupfumela kutsongo aja matsavu ntsena. ³ Lweyi ajaka hinkwasvu angatshuki asola lweyi angajiki; ni lweyi angajiki hinkwasvu angatshuki athethisa lweyi ajaka, hikuva i Xikwembu lexi ximuyamukeleke. ⁴ Xana u mani wena uthethisaka mutirhi wa munhu mun'wana? Hambi ayima kumbe kuwa, svosvo svitiviwa hi n'winyi wa yena; kambe atayima, hikuva Hosi yasvikota kumupfuxa ayima ⁵ Mun'wana apimanisa lesvaku siku rin'wana ritlula lerin'wana; kasi mun'wana apimanisa lesvaku masiku hinkwawu mafana. Mun'wana ni mun'wana afanele kutipimanisela svinene hi yexe miyanakanyweni ya yena. ⁶ Lweyi ahlawulekisaka siku, arihlawulekisela Hosi; ni lweyi ajaka hinkwasvu, ajela Hosi, hikuva akhensa Xikwembu ha svona. Na yena lweyi angajiki hinkwasvu, ajela Hosi, kutani akhensa Xikwembu. ⁷ Hikuva anga kona ni mun'we wa hina lweyi atihanyelaka, nasvona anga kona lweyi atifelaka; loko hihanya, hihanyela Hosi; ⁸ loko hifa, hifela Hosi; hikolaho, hambi hihanya, hambi hifa, hi va Hosi. ⁹ Hikuva Kriste afile, atlhela apfuka ahanya, lesvaku atava Hosi ya lavafeke ni ya lava vahanyaka ¹⁰ Xana wena uyavanyisela yini makwenu ke? Nasvona umosolela yini? Kasi hinkwerhu hitahumelela mahlweni ka xiluvelo xa Xikwembu lesvaku hithethisiwa. ¹¹ Hikuva Matsalweni Hosi yili: “Mina nahanya, hikolaho vanhu hinkwavu vatanikhinsamela, hinkwavu vataku ni Xikwembu.” ¹² Hi ndlela yoleyo, mun'wana ni mun'wana wa hina atatihlamulela hi yexe mahlweni ka Xikwembu. ¹³ Loko svilitano, ahitshikeni kuyavanyisana. Matshan'wini ya svona, tiboheni lesvaku mingaveki ndleleni ya makwenu xomuphariyeta kumbe kumuwisa. ¹⁴ Nasvitiva ni kukholwa svinene, hikolaho ka Hosi Yesu, lesvaku axi kona xilo ni xin'we lexi, hi xoxe, xibiheke; kambe xilo xibihile ntsena ka yena lweyi apimisaka lesvaku xibihile. ¹⁵ Loko makwenu atwa kuvaviseka hi mhaka ya lesvi wena usvijaka, awahafambi hi rirhandzu. Ungatshuki ulovisa lweyi angafeliwa hi Kriste hi mhaka ya lesvi wena usvijaka. ¹⁶ Mingapfumeleni lesvaku lesvinga svinene ka n'wina svisoliwa. ¹⁷ Hikuva Mfumu wa Xikwembu ahi kuja, ahi kunwa; kambe i kululama ni kurhula ni kutsaka, hi matimba ya Moya Lowokwetsima. ¹⁸ Lweyi atirhelaka Kriste hi mukhuva wolowo, atsakisa Xikwembu, nasvona akhensiwa hi vanhu. ¹⁹ Loko svilitano ke, ahilaveni lesvihipfunaka kuhanya hi kurhula, ni kuyakisana. ²⁰ Ungahahluli ntirho wa Xikwembu hikolaho ka svakuja. Svilo hinkwasvu svibasile; kambe i kuhoxa loko munhu, hi kuja ka yena, akhunguvanyisa van'wana, ²¹ Svisasekile loko ungaji nyama kumbe unganwi vhinyu, ni loko utitsona xilo xihi ni xihi lexingakhunguvanyisaka makwenu. ²² Lesvi usvikholwaka wena mbilwini ya wena, ayive mhaka ya wena ni Xikwembu xa wena. Kukatekile munhu lweyi angatitwiki kuhoxa ka svilo lesvi avonaka lesvaku svibasile. ²³ Kambe lweyi akanakanaka, wathethisiwa loko aja, hikuva angayendli hi kukholwa; kutani xin'wana ni xin'wana lexingayendliwiki hi kukholwa, i xijoho.