¹ Munhu mun'wana ni mun'wana aativeke hansi ka vuhosi, hikuva aku na vuhosi lebzingahumiki ka Xikwembu; kutani vuhosi lebzinga kona, bzivekiwile hi Xikwembu. ² Hikolaho lweyi ayeyisaka vuhosi, ayeyisa kulerisa ka Xikwembu; kutani lavayeyisaka, vativangela kuyavanyisiwa. ³ Tihosi i valala kungali ka lavayendlaka lesvinene, kambe ka lavayendlaka lesvobiha. Xana ulava kuhanya na ungachavi mahlweni ka hosi ke? Yendla lesvinene, yitakukhensa; ⁴ hikuva hosi i nandza wa Xikwembu kukupfuna. Kambe loko uyendla lesvobiha, ufanele kuchava, hikuva hosi ayitameli tlhari mahala; yirhumiwile hi Xikwembu kuva mukhatisi wa lweyi anga mujohi. ⁵ Hikolaho svafanela lesvaku munhu ativeka hansi ka vuhosi, kungali ntsena hikolaho ka kuchava kubiwa, kambe kuli hikolaho ka ripfalu. ⁶ Nakambe hi svona lesviyendlaka lesvaku mihumesa rhesa; hikuva tihosi i vatirhi va Xikwembu, lavatinyiketaka kutirha ntirho wolowo. ⁷ Nyikani hinkwavu timfanelo ta vona; lweyi afanelaka kuyamukela rhesa, aanyikiwe; lweyi afanelaka nyiko, aanyikiwe, lweyi afanelaka kuxiximiwa, aaxiximewe; lweyi afanelaka kuchaviwa, aachaviwe. ⁸ Mingatshukeni miva ni nandzu ka munhu ni mun'we, loko wungali wa kurhandzana; hikuva, lweyi arhandzaka wa le kwavu, ahetisisile Nawu. ⁹ Hakunene milawu leyinge: “Ungatshuki uwosva, ungatshuki udlaya, ungatshuki uyiva, ungatshuki unavela sva van'wana”, hambi yili milawu yin'wana hinkwayu, yikatsiwa ka rito leringe: “Rhandza munhukuloni kufana ni loko utirhandza. ¹⁰ Lweyi anga ni rirhandzu, angayendleli munhukulobze svobiha. Hikolaho, rirhandzu rihetisisa Nawu. ¹¹ Yendlani lesvi, hikuva nitiva lesvaku i nkarhi wihi svosvi: Hi wona nkama wa n'wina wa kupfuka vurhongweni; hikuva namuntlha, kuponisiwa ku kusuhi kutlula siku leri hipfumeleke ha rona. ¹² Vusiku bzihundzile, vuxa bzitshinele. Hikolaho, ahicukumeteni mintirho ya munyama, kutani hitamela matlhari ya kuvonakala. ¹³ Ahifambeni kuvonakeleni, kufana ni vanhu lavafambaka ninhlekanhi, kungali hi minkhuvu ni kupopsa, kungali hi lesvobiha ni vunghwavana, kungali hi kuholova ni vukwele; ¹⁴ kambe miyambala Hosi Yesu Kriste, kutani mingatsetseleleni sva nyama ya n'wina, hi kuyikolwisa kunaveleni ka yona.