¹ Loko svilitano vamakwerhu, na mikhongotela hikolaho ka timpsalu ta Xikwembu, lesvaku minyiketa miri wa n'wina hinkwawu, wuva mhamba leyihanyaka, leyihlawulekeke, leyitsakisaka Xikwembu; hi wona magandzelela ya n'wina ya ntiyiso. ² Mingalandzeni hanyela ra nguva leyi, kambe mipfumela kuhundzuka miva vampsha kupimiseni ka n'wina, mitakota kutwisisa lesvi kurhandza lokunene ka Xikwembu, lokukhensekaka ni kuhetiseka, kunga svona. ³ Hikuva, hikolaho ka timpsalu leti ninganyikiwa tona, nibzela mani na mani wa n'wina, niku: Mingatshukeni mitikulisa hi vutlhari bza n'wina; kambe mifanele kutitsongahata, miya hi mpimo wa kupfumela loku Xikwembu xiyaveleke mun'wana ni mun'wana wa n'wina. ⁴ Hikuva kukota lesvi hinga ni svirho lesvinyingi mirini wuli wun'we, nasvona svingaliki na ntirho wun'we, ⁵ hi ndlela yoleyo, na hina, hambi hili vanyingi, hi miri wun'we ka Kriste, kutani mani na mani wa hina i xirho ka mun'wana ⁶ Hikolaho, lesvi hinga ni tinyiko letihambaneke, hi kuya hi lesvi Xikwembu xihinyikeke svona, hikokolaho loko hili ni nyiko ya kuprofeta, ahiyitirhiseni hi mpimo wa kupfumela ka hina; ⁷ loko hili ni nyiko ya kutirhela van'wana, ahivatirheleni. Lweyi anga ni nyiko ya kujondzisa, aajondzise; ⁸ lweyi anga ni nyiko ya kukhongotela, aakhongotele; lweyi anyikaka, aanyike hi mbilu leyobasa; lweyi afambisaka van'wana, aavafambise hi kutivonela; lweyi ayendlaka mintirho ya timpsalu, aayiyendle hi kutsaka ⁹ Rirhandzu ringatshuki riva ni kukanganyisa. Vengani lesvi sva kubiha, minamarhela lesvinene. ¹⁰ Tolovelanani, mirhandzana tani hi vamakwavu, mitlula van'wana hi kuxiximana ¹¹ Mingaloloheni akutikarhateni ka n'wina, mingatsaneni kuhlayisaneni, hisekani moyeni, mitirhela Hosi. ¹² Tsakani kulanguteleni, tiyiselani maxangwini, hitekani kukhongeleni. ¹³ Pambulelani vahlawuliwa va Xikwembu loko vapfumala, migingiriteka kuyamukeleni ka vayendzi ¹⁴ Katekisani lava vamixanisaka; katekisani, mingarhuketeleni. ¹⁵ Tsakani ni lavatsakaka, mirila ni lavarilaka. ¹⁶ Hanyisanani hi moya wun'we; mingatshukeni minavela lesvitlakukeke, kambe mitolovelana ni lavatitsongahataka; mingativoneni na mili lava vatlhariheke. ¹⁷ Mingarihiseleni svobiha hi lesvobiha. Ringetani kuyendla lesvinene ka vanhu hinkwavu. ¹⁸ Yendlani hinkwasvu lesvi misvikotaka, hi tlhelo ra n'wina, kuhanyisana ni vanhu hinkwavu hi kurhula. ¹⁹ Varhandziwa, mingatshukeni mitirihisela mili n'wina; kambe tshikelani vukarhi bza Xikwembu, hikuva kutsaliwile vaku: “Kurihisa i ka mina; hi mina lweyi ningatarihisela, kuvula Hosi.” ²⁰ Hikolaho: “Loko nala wa wena ali ni ndlala, muphamele; loko ali ni torha, musiyele anwa; hikuva loko uyendlisa svosvo, utamuhlengeletela mpfundze nhlokweni ya yena.” ²¹ Ungatshuki uhluliwa hi lesvobiha, kambe hlula lesvobiha hi lesvinene.