¹ , vamakwerhu, mijondzile ka hina hilaha mifanelaka kuhanya hakona lesvaku mitsakisa Xikwembu, kutani mihanyile hi ndlela yoleyo. Hikolaho, ha mikombela hi matimba ni kumikhutaza hi vito ra Hosi Yesu, lesvaku miya mikula, na mili karhi mihanyisa svosvo. ² Hikuva mitiva lesvi hingamileleta svona hi matimba ya Hosi Yesu; ³ nasvona kurhandza ka Xikwembu hi loku: Hi lesvaku miyendliwa lavabaseke, hi kuhambana ni vuwosvi hinkwabzu. ⁴ Mun'wana ni mun'wana wa n'wina aative kuhlayisa miri wa yena hi ndlela leyobasa ni leyolulama, ⁵ kungali hi kunavela lokobiha, kufana ni vamatiko lavangativiki Xikwembu. ⁶ Amhakeni leyi, kungavi ni lweyi ajohelaka makwavu, kumbe kumukanganyisa, hikuva Hosi i murihiseli wa svilo lesvi hinkwasvu, hilaha hingamibzela khale ni kumitsundzuxa svinene hakona. ⁷ Hikuva Xikwembu axihivitanelanga kuhanya kutshakeni, kambe kubaseni. ⁸ Hikolaho, lweyi ayalaka xitsundzuxu lexi, angasoli munhu, kambe asola Xikwembu lexi ximunyikaka Moya wa xona Lowokwetsima. ⁹ Loko tili ta kurhandzana ni vamakwenu Hosini, amifaneli kutsaleliwa nchumu hi tona; hikuva i Xikwembu lexi ximijondziseke kurhandzana; ¹⁰ kutani hi svona lesvi misviyendlaka ka vamakwerhu hinkwavu lavanga tikweni hinkwaru ra Makedoniya. Hambi svilitano, hamikhutaza vamakwerhu, lesvaku miya mahlweni, mikula rirhandzwini lero. ¹¹ Kunavela ka n'wina lokukulu akuve kuhanya hi kurhula, mitikarhatela sva n'wina, mitirha hi mavoko ya n'wina, hilaha hingarhanga hi mitsundzuxa hakona. ¹² Hi mukhuva lowu, mitaxiximiwa hi va le handle, mingahatikiseli munhu ni mun'we. ¹³ Vamakwerhu, nilava lesvaku mitiva ntiyiso hi tlhelo ra lava vayetleleke vurhongo bza rifu, mitakala mingavaviseki kukota van'wana lavangaliki ni kulangutela. ¹⁴ Hikuva lesvi hipfumelaka lesvaku Yesu afile, atlhela apfuka kufeni, hi ndlela yoleyo, hi pfumela lesvaku lavatiyetleleleke, Xikwembu xitavapfuxa na Yesu kufeni, xivavuyisa svin'we na yena. ¹⁵ Lesvi himibzelaka svona hi vito ra Hosi, hi lesvi: Hina hingatava hahahanya loko Hosi yivuya, hingakala hingarhangeli lavatiyetleleleke; ¹⁶ hikuva Hosi hi yoxe yitaxika hi le tilweni, hi mpfumawulu wa rito ra kulerisa, hi kuhuwelela ka ntsuminkulu, ni kuba ka mhalamhala ya Xikwembu, kutani lavafeleke ka Kriste, vatarhanga vapfuka kufeni;