¹ Hi kuvona lesvaku ahingahakoti kutiyisela, hitihlawulele kusala hili hexe le Atena. ² Kutani hi mirhumele Timotewu makwerhu, lweyi atirhelaka Xikwembu kufana na mina ntirhweni wa Evhangeli ya Kriste; lesvaku atamitiyisa ni kumikhutaza kupfumeleni ka n'wina; ³ ni lesvaku kungavi na mun'we lweyi atsekatsekisiwaka hi kuxaniseka loku; hikuva masvitiva na n'wina lesvaku hi svona lesvi hiyaveliweke svona. ⁴ Hikuva loko hahali le ka n'wina hi mitivisile na svingasihumelela lesvaku hitavona maxangu. Kutani svifambise svosvo, hilaha mitivaka hakona. ⁵ Hikolaho, hi kuvona lesvaku aningahakoti kutiyisela, nirhumelile rito, lesvaku nitatwa ta kupfumela ka n'wina. Anichava lesvaku kumbexana muringi angava amiringile, ni lesvaku kutikarhata ka hina kungava ka hava. ⁶ Kambe svosvi Timotewu wahakuvuya hi le ka n'wina kutani ahitisele mahungu lamanene ya kupfumela ka n'wina ni ya rirhandzu ra n'wina; ahitivisile lesvaku mahaya mahlweni mihiyanakanya hi moya lowunene masiku hinkwawu, minavela kuhivona kufana ni lesvi na hina hinavelaka kumivona. ⁷ Hikolaho, vamakwerhu, maxangwini ni le mahlomulweni hinkwawu ya hina, hikumile kuchaveleliwa hi kupfumela ka n'wina; ⁸ hikuva svosvi hihanya hi lesvi miyimeke na mitiyile Hosini. ⁹ Xana kukhensa ka hina ka Xikwembu hikolaho ka n'wina kungava loku koyini, kutsakeni hinkwaku loku hikutwaka mahlweni ka Xikwembu xa hina hikolaho ka n'wina? ¹⁰ Hikhongela xona hi matimba vusiku ni nhlekanhi, na hili karhi hikombela kuvonana na n'wina hi mahlo, lesvaku hita tatisa lesvipfumalekaka kupfumeleni ka n'wina. ¹¹ Mawaku loko hingapfuleliwa ndlela ya kuta koseyo ka n'wina hi Xikwembu Tatana wa hina hi xiviri, svin'we ni Hosi ya hina Yesu. ¹² Ingi Hosi yingakulisa ni kuyandzisa rirhandzu leri mirhandzanaka ha rona ni kurhandza van'wana, kufana ni lesvi na hina himirhandzisaka xisvona; ¹³ hi ndlela yoleyo, yitatiyisa timbilu ta n'wina, kutani mitapfumala xisolo, miva lavahlawulekeke mahlweni ka Xikwembu Tatana wa hina, siku leri Hosi ya hina Yesu angatavuya hi rona, svin'we ni vahlawuliwa va yena hinkwavu. ¹⁴ Hikuva lesvi hipfumelaka lesvaku Yesu afile, atlhela apfuka kufeni, hi ndlela yoleyo, hi pfumela lesvaku lavatiyetleleleke, Xikwembu xitavapfuxa na Yesu kufeni, xivavuyisa svin'we na yena. ¹⁵ Lesvi himibzelaka svona hi vito ra Hosi, hi lesvi: Hina hingatava hahahanya loko Hosi yivuya, hingakala hingarhangeli lavatiyetleleleke; ¹⁶ hikuva Hosi hi yoxe yitaxika hi le tilweni, hi mpfumawulu wa rito ra kulerisa, hi kuhuwelela ka ntsuminkulu, ni kuba ka mhalamhala ya Xikwembu, kutani lavafeleke ka Kriste, vatarhanga vapfuka kufeni;