¹ Loko tili ta minkama ni tinguva takona, vamakwerhu, amifaneli kutsaleliwa nchumu hi svona. ² Hikuva n'wina hi xiviri, masvitiva svinene lesvaku siku ra Hosi ritafika kufana ni muyivi lweyi ataka nivusiku. ³ Siku leri vanhu vangataku: “Kurhulile, aku na xa kukarhata”, hi wona nkama lowu kuwonheka kungatavawela henhla hi xitshuketa, kufana ni kulun'wa ka wansati lweyi angakusuhi ni kuveleka n'wana; vangakala vangaponi. ⁴ Kambe n'wina vamakwerhu, ami le munyameni; hi kolaho, siku rakona aringamitshuketi kufana ni muyivi. ⁵ Hikuva hinkwenu mi vana vakuvonakala, mi vana va nhlekanhi. Ahi va vusiku hina, kumbe va munyama. ⁶ Hikolaho hingatshuki hiyetlela kukota lesvi van'wana vayendlisaka svona, kambe ahihitekeni, hitikhoma. ⁷ Hikuva lavayetlelaka, vayetlela ni vusiku, ni lavadakwaka, vadakwa ni vusiku. ⁸ Kambe lesvi hina hinga va nhlekanhi, ahitikhomeni, hiyambala kupfumela ni rirhandzu xiva xitlhangu xa hina xifuveni, kutani nhlokweni hiyambala kulangutela ka kuponisiwa, xiva xigqoko xa hina. ⁹ . Xikwembu axihihlawulanga lesvaku xitahihlundzukela, kambe kuhinyika kuponisiwa hi Hosi ya hina Yesu Kriste. ¹⁰ Ahifelile lesvaku, hambi hihanya, kumbe hiyetlela, hitakuma vutomi svin'we na yena. ¹¹ Hikolaho, tiyisanani miyakisana, hilaha misviyendlaka hakona ni svosvi. ¹² Vamakwerhu, ha mikombela hi matimba lesvaku mixixima lavatirhaka xikarhi ka n'wina lava vamirhangelaka ndleleni ya Hosi, ni kumitsundzuxa; ¹³ mivaxixima svinene hi rirhandzu, hikolaho ka ntirho wa vona. Hanyani svin'we hi kurhula. ¹⁴ Kutani hamikhutaza vamakwerhu, hili: Layani malolo, mitiyisa lavahelaka matimba; pfunani lavanga ni gome, milehisela hinkwavu mbilu. ¹⁵ Vonani lesvaku kungavi ni lweyi atlheliselaka svobiha hi lesvobiha; kambe hi masiku hinkwawu, ¹⁶ ringetani kuyendlelana lesvinene, misviyendla ni le ka hinkwavu. ¹⁷ Tshamani na mitsakile masiku hinkwawu. Mingatshikeni kukhongela. ¹⁸ Ka hinkwasvu, khensani; hikuva hi kona kurhandza ka Xikwembu henhla ka n'wina ha Yesu Kriste. ¹⁹ Mingatimeni Moya. ²⁰ Mingasandzeni vuprofeta, ²¹ kambe kambisisani hinkwasvu, mitiya ka lesvinene. ²² Hambanani ni hinkwasvu lesvobiha sva tinxakaxaka. ²³ Ingi Xikwembu xa kurhula, xona ha xoxe, xingamiyendla lavahlawulekeke hi matlhelo hinkwawu. ²⁴ Ingi mimoya ya n'wina, ni timbilu ta n'wina, ni miri wa n'wina, svingatshama na svibasile, ²⁵ na svingali ni nandzu siku leri Hosi ya hina Yesu Kriste angatavuya.