¹ Varhandziwa, mingapfumeleni ka mimoya hinkwayu, kambe kambisisani mimoya kutiva lesvaku hakunene i ya Xikwembu; hikuva vaprofeta va mavunhwa vahangalakile misaveni. ² Mitativa Moya wa Xikwembu hi ndlela leyi: Moya wun'wana ni wun'wana lowuvulaka lesvaku Yesu atile misaveni tani hi munhu i wa Xikwembu. ³ Kambe moya wun'wana ni wun'wana lowu wungapfumeliki lesvaku Yesu Kriste atile tani hi munhu ahi wa Xikwembu, kambe lowo i moya wa Antikriste, lowu mitweke ta wona lesvaku wata; kutani ni svosvi wu kona laha misaveni. ⁴ Vananga, n'wina mi va Xikwembu, kutani mivahlulile va mavunhwa; hikuva Moya lowunga ka n'wina wutlula hi vukulu moya lowu wunga misaveni. ⁵ Vona i va misava, hi kolaho vavulavula hi sva laha misaveni, kutani va laha misaveni vavayingisa. ⁶ Hina hi va Xikwembu. ⁷ Varhandziwa, ahirhandzaneni, hikuva rirhandzu i ra Xikwembu; hi kolaho mani na mani ⁸ lweyi anga ni rirhandzu apsaliwile hi Xikwembu, nasvona ativa Xikwembu. ⁹ Xilesvo, rirhandzu ra Xikwembu ritikomba ka hina hi ndlela leyi: Hi lesvaku Xikwembu xirhume N'wana wa xona lweyi angapsaliwa ali yexe kuta laha misaveni, lesvaku hitakota kuhanya hikolaho ka yena. ¹⁰ Leri hi rona rirhandzu ra ntiyiso, hikuva ahi hina hingarhandza Xikwembu, kambe hi xona xihirhandzeke, kutani xirhumela N'wana wa xona lesvaku ava mukutsuli wa svijoho sva hina. ¹¹ Varhandziwa, lesvi Xikwembu xihirhandzeke hi ndlela leyi, na hina hifanela kurhandzana. ¹² Aku na munhu ni mun'we lweyi atshamaka avona Xikwembu; loko hina hirhandza Xikwembu, xona xi le ka hina, kutani rirhandzu ra xona rihetisekile ka hina. ¹³ Lesvi svihiyendla hitiva lesvaku hi le ka xona, na xona ka hina, hikuva xihinyikile Moya wa xona. ¹⁴ Kutani na hina hisvivonile, hiva hiveka vumboni, lesvaku Tatana arhumele N'wana kuva Muponisi wa misava. ¹⁵ Mani na mani lweyi avulaka lesvaku Yesu i N'wana wa Xikwembu, Xikwembu xi le ka yena, na yena a le ka Xikwembu. ¹⁶ Hikolaho, hina hasvitiva, nasvona hapfumela ka rirhandzu leri Xikwembu xinganarona ka hina. Xikwembu i rirhandzu, lweyi atshamaka rirhandzwini atshama ka Xikwembu, ni Xikwembu xi le ka yena. ¹⁷ Xilesvo loko rirhandzu rihetisekile ka hina, hi tatiya nhlana lesvaku ka siku ra kuyavanyisa hitava hitshembekile; hikuva lesvi Kriste anga xisvona na hina hi va svona misaveni leyi. ¹⁸ Ka rirhandzu aku na kuchava. Kambe, rirhandzu lerihetisekeke rihlongola nchavo, hikuva rirhandzu lerihetisekeke risusa kuchava; hikuva kuchava kufambelana ni xikhatiso, kutani lweyi achavaka angahetisekanga rirhandzwini. ¹⁹ Hina hamurhandza, hikuva hi yena arhangeke ahirhandza kusungula. ²⁰ Loko munhu aku: “Mina nirhandza Xikwembu”, kambe ahambula makwavu, i muhembi; hikuva lweyi angarhandziki makwavu lweyi amuvonaka hi mahlo, angakoti kurhandza Xikwembu lexi angaxivoniki. ²¹ Kutani Nawu lowu xihinyikeke wona, hi lesvaku lweyi arhandzaka Xikwembu, afanela nasvona kurhandza makwavu.