¹ Mani na mani lweyi apfumelaka lesvaku Yesu hi yena Kriste apsaliwa hi Xikwembu, kutani mani na mani lweyi arhandzaka mupsali wa Kriste nasvona arhandza ni mupsaliwa wa yena. ² Hikohaho hitivaka lesvaku hirhandza vana va Xikwembu, loko hirhandza Xikwembu ni loko hihlayisa milawu ya xona. ³ Hikuva lesvi i rirhandzu ra Xikwembu, xilesvo ahihlayiseni Milawu ya xona, hikuva Milawu ya xona ayitiki. ⁴ Hikuva mani na mani lweyi apsaliweke hi Xikwembu, ahlula misava, kutani kuhlula loku, hi loku kuhlulaka misava, angakupfumela ka hina. ⁵ I mani lweyi ahlulaka misava xana? Ntsena lweyi apfumelaka lesvaku Yesu i N'wana wa Xikwembu. ⁶ Lweyi hi yena lweyi angata hi mati ni ngati,Yesu Kriste, kungali hi mati ntsena, kambe hi mati ni ngati. Kutani Moya hi wona mboni, hikuva Moya i ntiyiso. ⁷ Hikuva ku ni timboni tinharhu; ⁸ moya ni mati ni ngati, kutani vunharhu lebzi i xilo xin'we. ⁹ Loko hipfumela vumboni bza vanhu va misava, ahitiveni lesvaku vumboni bza Xikwembu i bzikulu ngopfu, hikuva vumboni bza Xikwembu hi lebzi xibzinyikeke mayelanu ni N'wana wa xona. ¹⁰ Lweyi apfumelaka ka N'wana wa Xikwembu, a ni vumboni le mbilwini, lweyi angapfumeliki ka Xikwembu axiyendla muhembi, hikuva angapfumelanga vumboni lebzi Xikwembu xibzinyikeke mayelanu ni N'wana wa xona. ¹¹ Kutani-ke, vumboni bzakona hi lebzi: Hi lesvaku Xikwembu xihinyikile vutomi lebzingaheliki, kutani, vutomi lebzi bzi le ka N'wana wa xona. ¹² Lweyi anga ni N'wana a ni vutomi; lweyi angaliki na N'wana wa Xikwembu anga na vutomi. ¹³ Nimitsalela svilo lesvi hinkwasvu, n'wina lava mipfumelaka ka N'wana wa Xikwembu, akuva mitativa lesvaku mi ni vutomi lebzingaheliki. ¹⁴ Loku hi kona kutshemba loku hinga nakona ka yena, hi lesvaku loko hikombela xokarhi mayelanu ni kurhandza ka yena, yena wahiyingisa. ¹⁵ Kutani-ke, loko hitiva lesvaku wahiyingisa ka hinkwasvu lesvi hikombelaka svona hasvitiva lesvaku hikumile lesvi hisvikombelaka ka yena. ¹⁶ Loko munhu avona makwavu na ali karhi ayendla xijoho lexi xingayisiki kufeni, afanela kukhongela, kutani Xikwembu xitanyika vutomi ka lava vangajohangiki xijoho xoyisa kufeni. Svijoho sviko na lesvi sviyisaka kufeni, kutani anivuli lesvaku kukhongeleliwa svona. ¹⁷ Hinkwaku kubiha i xijoho, kambe ku ni xijoho lexi xingayisiki kufeni. ¹⁸ Hasvitiva lesvaku mani na mani lweyi apsaliweke hi Xikwembu, angajohi; kambe lweyi apsaliweke hi Xikwembu watihlayisa, xilesvo lweyi wobiha angamukhumbi. ¹⁹ Hasvitiva lesvaku hi va Xikwembu, ni lesvaku misava hinkwayu yi le ka lweyi wobiha. ²⁰ Nasvona, hasvitiva lesvaku N'wana wa Xikwembu se atile, ni lesvaku ahinyikile kutwisisa lesvaku hitativa yena lweyi anga wa ntiyiso; kutani hi le ka lweyi anga ntiyiso, yena N'wana wa xona Yesu Kriste. Lweyi hi yena Xikwembu hi ntiyiso, ni vutomi lebzingaheliki. ²¹ Vananga, fularhelani.