¹ Vonani rirhandzu leronghasi leri Tatana ahinyikeke rona, lesvaku hivuliwa vana va Xikwembu. Hikolaho, misava ayihitivi; hikuva ayimutivanga yena. ² Varhandziwa, svosvi hi vana va Xikwembu, asvisitikomba lesvi hingatava svona. Kambe hasvitiva lesvaku, loko yena atatikombisa ka hina, hitafana na yena, hikuva hitamuvona tani hi lesvi anga xisvona. ³ Kutani mani na mani lweyi amulangutelaka, watihlampsa yena hi yexe, kufana ni lesvi yena angatenga. ⁴ Mani na mani lweyi ayendlaka xijoho nasvona ayendla lesvi svinga handle ka nawu, hikuva xijoho i kuyendla lesvinga handle ka nawu. ⁵ Kambe masvitiva lesvaku yena atikombisile lesvaku asusa svijoho, nasvona ka yena aku na kujoha. ⁶ Mani na mani lweyi atshamaka ka yena angajohi; mani na mani lweyi ajohaka angamuvonanga, nasvona angamutivanga. ⁷ Vananga, mingakanganyisiweni hi munhu. Lweyi ayendlaka lesvilulameke alulamile, kufana ni lesvi yena alulameke. ⁸ Lweyi ajohaka i wa Diyavulosi, hikuva Diyavulosi i mujohi kusukela kusunguleni. Hi svolesvi sviyendleke lesvaku N'wana wa Xikwembu atikombisa lesvaku mitshunxiwa ka mintirho ya Diyavulosi. ⁹ Mani na mani lweyi apsaliwaka hi Xikwembu angayendli xijoho; hikuva mbewu ya xona yitshama na yena, angakala angajohi, hikuva apsaliwa hi Xikwembu. ¹⁰ Hikolaho, kuvonekaka lava vanga vana va Xikwembu ni lava vanga vana va Diyavulosi: Mani na mani lweyi angayendliki lesvinene, lweyi angarhandziki makwavu ahi wa Xikwembu. ¹¹ Hikuva leri hi rona rungula leri mingaritwa kusukela kusunguleni; lesvaku hifanela kurhandzana. ¹² Hingafaneni na Kayini lweyi aali wa lweyi wobiha, kutani adlaya makwavu. Xana amudlayile hi mhaka muni ke? Hikuva mintirho ya yena ayili leyobiha, kambe ya makwavu ayili leyolulama. ¹³ Vamakwerhu, mingahlamaleni loko misava yimivenga. ¹⁴ Hina hasvitiva lesvaku hihumile kufeni, hinghena vuton'wini, hikuva hirhandza vamakwerhu. Lweyi angarhandziki makwavu atshama kufeni. ¹⁵ Mani na mani lweyi ahambulaka makwavu i mudlayi. N'wina masvitiva lesvaku aku na mudlayi lweyi vutomi lebzingaheliki bzitshamaka ka yena. ¹⁶ Hitiva rirhandzu lesvi ringa svona loko hitiva yena lweyi anyiketeke vutomi bza yena hikolaho ka hina. Xilesvo na hina hifanela kunyiketa vutomi bza hina ka vamakwerhu. ¹⁷ Lweyi anga ni svilo sva misava leyi, kambe avona makwavu na ali kupfumaleni, kambe anonon'hwisa mbilu ya yena angamupfuni, xana rirhandzu rorhandza Xikwembu ringatshamisa kuyini ka yena ke? ¹⁸ Vananga, hingarhandzaneni hi marito, kumbe hi kuvulavula ntsena, kambe akuve hi mintirho ni ntiyiso. ¹⁹ Kutani, hitiva hakona lesvaku hi ni ntiyiso, xilesvo le mahlweni ka yena hirhulisa timbilu; ²⁰ na hili karhi hitiva lesvaku loko timbilu ta hina tihiyavanyisa, Xikwembu i xikulu kutlula timbilu ta hina, nasvona xitiva svilo hinkwasvu. ²¹ Varhandziwa, loko timbilu ta hina tingahiyavanyisi, hi ni kutshembeka loku kutiyeke ka Xikwembu. ²² Kutani hinkwasvu lesvi hisvikombelaka ka xona, hitanyikiwa svona; hikuva hihlayisa milawu ya xona, hiyendla lesvi svitsakisaka mahlweni ka xona. ²³ Kutani Nawu wa xona hi lowu: Hi lesvaku hifanela kupfumela ka Vito ra N'wana wa xona Yesu Kriste, ni lesvaku hifanela kurhandzana tani hilaha xihibzeleke hakona. ²⁴ Lweyi ahlayisaka milawu ya xona atshama ka xona, na xona ka yena. Xilesvo hitiva lesvaku xitshama ka hina; hikolaho ka Moya lowu xihinyikeke wona.